Read Papantla Totonac Numbernan 8 Bible Online

Numbernan 8 - Papantla Totonac bible

Numbernan 8

¹E ora ei SENOR a papia ku Moises, bisando:

²"Papia ku Aaron i bis'e: 'Ora bo ta aregla e lampinan, e shete lampinan mester lusa e espasio dilanti di e kandela.'"

³I asina Aaron a hasi; el a aregla e lampinan na e parti dilanti di e kandela, meskos ku SENOR a ordena Moises.

⁴Awor esaki tabata e kalidat di trabou ku e kandela tabata traha di dje: obra di oro bati-ku-martiu; for di su pia te na su flornan e tabata obra bati-ku-martiu; konforme e patronchi ku SENOR a mustra Moises, asina el a traha e kandela.

⁵SENOR a bolbe papia ku Moises, bisando:

⁶"Tuma e levitanan for di entre e yunan di Israel i purifika nan.

⁷I asina bo mester hasi ku nan pa purifika nan: sprengu awa di purifikashon riba nan, i laga nan pasa nabaha na henter nan kurpa, i laba nan pananan, i nan lo ta purifika.

⁸E ora ei laga nan kohe un bishe machu huntu ku su ofrenda di mainshi, esta, harina fini meskla ku zeta; i kohe un otro bishe machu komo un ofrenda pa pika.

⁹Asina bo mester presenta e levitanan dilanti di e tent di reunion i reuni henter e kongregashon di e yunan di Israel,

¹⁰i presenta e levitanan dilanti di SENOR; i e yunan di Israel mester pone nan mannan riba e levitanan.

¹¹E ora ei Aaron mester presenta e levitanan dilanti di SENOR komo un ofrenda di zoyamentu di e yunan di Israel, pa nan por a hasi e sirbishi di SENOR.

¹²"Awor e levitanan mester pone nan mannan riba kabes di e bishenan machu, i ofrese esun komo un ofrenda pa pika i e otro komo un ofrenda kima na SENOR, pa hasi ekspiashon pa e levitanan.

¹³I bo mester pone e levitanan dilanti di Aaron i dilanti di su yu hombernan, pa presenta nan komo un ofrenda di zoyamentu na SENOR.

¹⁴Asina bo mester separa e levitanan for di entre e yunan di Israel, i e levitanan lo ta di Mi.

¹⁵"Anto despues di esei e levitanan mag bai paden pa sirbi den e tent di reunion. Ma abo mester purifika nan i presenta nan komo un ofrenda di zoyamentu,

¹⁶pasobra nan ta henteramente duna na Mi for di entre e yunan di Israel. Mi a kohe nan pa Mi mes na luga di tur prome yu ku nase for di matris, e primogenitonan di tur e yunan di Israel.

¹⁷Pasobra tur primogenito entre e yunan di Israel ta di Mi, tantu entre hende komo entre bestia; riba e dia ku Mi a mata tur e primogenitonan den tera di Egipto, Mi a santifika nan pa Mi mes.

¹⁸Ma Mi a tuma e levitanan na luga di tur primogenito entre e yunan di Israel.

¹⁹I Mi a duna Aaron ku su yu hombernan e levitanan komo un regalo for di entre e yunan di Israel, pa hasi e sirbishi di e yunan di Israel na e tent di reunion, i pa hasi ekspiashon pa e yunan di Israel, pa no tin plaga meimei di e yunan di Israel ora nan yega serka di e santuario."

²⁰Asina Moises i Aaron i henter e kongregashon di e yunan di Israel a hasi ku e levitanan; konforme tur loke SENOR a ordena Moises tokante di e levitanan, asina e yunan di Israel a hasi ku nan.

²¹E levitanan tambe a purifika nan mes di pika i a laba nan pananan; i Aaron a presenta nan komo un ofrenda di zoyamentu dilanti di SENOR. Tambe Aaron a hasi ekspiashon pa nan pa purifika nan.

²²I despues di esei e levitanan a bai paden pa hasi nan sirbishi den e tent di reunion dilanti di Aaron i dilanti di su yu hombernan; meskos ku SENOR a ordena Moises tokante di e levitanan, asina nan a hasi ku nan.

²³Awor SENOR a papia ku Moises, bisando:

²⁴"Esaki ta loke ta konta pa e levitanan: for di bint'i sinku ana p'ariba nan mester drenta pa hasi sirbishi den e trabou di e tent di reunion.

²⁵Ma na edat di sinkuenta ana nan mester retira for di sirbishi den e trabou i no traha mas.

²⁶Sinembargo, nan mag asisti nan rumannan den e tent di reunion, pa kumpli ku kualke obligashon, ma nan mes no mag hasi ningun trabou. Asina bo mester trata ku e levitanan tokante di nan obligashonnan."