Read Papantla Totonac Mikeas 1 Bible Online

Mikeas 1 - Papantla Totonac bible

Mikeas 1

¹E palabra di SENOR, ku a yega na Mikeas di Moreset den e dianan di Jotam, Akaz i Ezekias, reinan di Juda, ku el a mira tokante di Samaria i Jerusalem.

²Tende, O pueblonan, boso tur; skucha, O tera i tur loke ku e ta kontene, i laga Senor DIOS ta testigu kontra boso, Senor for di Su tempel santu.

³Pasobra mira, SENOR ta sali for di Su luga. E lo baha bin i trapa riba e luganan haltu di tera.

⁴E serunan lo dirti bou di djé, i e vayenan lo wordu gespleit, manera was dilanti di kandela, manera awa basha for di un luga steil.

⁵Tur esaki ta pa motibu di e rebeldia di Jakob i pa motibu di e pikanan di e kas di Israel. Kiko ta e rebeldia di Jakob? No ta Samaria? Kiko ta e luga haltu di Juda? No ta Jerusalem?

⁶Pasobra lo Mi hasi Samaria un monton di ruina den kunuku habri, luganan pa planta kunuku di wendruif. Lo Mi basha su piedranan abou den e vaye i hasi su fundeshinan keda bisto.

⁷Tur su idolonan lo wordu kibra na pida-pida, tur su ganashi lo wordu kima ku kandela, i tur su imagennan lo Mi hasi bira desola. Pasobra el a kolekta nan dor di ganashi di prostitushon, i na ganashi di prostitushon nan lo bolbe.

⁸Pa motibu di esaki mi mester lamenta i yora, mi mester kana pia abou i sunu; mi mester lamenta manera chakal i grita yora manera abestrus.

⁹Pasobra su herida ta inkurabel, pasobra esaki a yega na Juda; el a yega na porta di mi pueblo, te na Jerusalem.

¹⁰No konta esaki na Gad, no yora mes. Lora bo mes den stof na Bet-le-afra.

¹¹Sigui bo kaminda, habitante di Safir, den desnudes bergonsoso. E habitante di Zaanan no ta skapa. E lamentashon di Bet-esel: "E lo kita su sosten for di bo."

¹²Pasobra e habitante di Marot ta bira debil, sperando alivio, pasobra kalamidat a baha bin for di SENOR na e porta di Jerusalem.

¹³Gancha e kabainan na e garoshi, O habitante di Lakis-- e tabata e kuminsamentu di pika pa e yu muhe di Sion-- pasobra den boso a wordu hana e echonan di rebeldia di Israel.

¹⁴Pesei boso lo duna regalo di despedida na Moreset-gat; e kasnan di Akzib lo bira un engano pa e reinan di Israel.

¹⁵Ademas, lo Mi trese e konkistado kontra bo, O habitante di Maresa. E gloria di Israel lo drenta Adulam.

¹⁶Hasi bo mes pelon, i korta bo kabei kita tur afo, pa motibu di e yunan den kendenan bo tin delisia; pela bo kabes mes pelon ku aguila, pasobra nan lo bai for di bo den eksilio.