Read Papantla Totonac Mikeas 3 Bible Online

Mikeas 3 - Papantla Totonac bible

Mikeas 3

¹I Mi a bisa: "Tende awor, kabesantenan di Jakob i gobernantenan di e kas di Israel. Boso no mester konose hustisia?

²Boso ku ta odia bondat i ta stima maldat, ku ta ranka e kueru di Mi pueblo kita for di nan kurpa i e karni for di nan wesunan,

³i ku ta kome e karni di Mi pueblo, ku ta ranka nan kueru kita for di nan kurpa, ku ta kibra nan wesunan, i ku ta kap nan na pida-pida manera karni pa bai wea, i manera karni den wea."

⁴E ora ei nan lo sklama na SENOR, ma E lo no kontesta nan. Alkontrario, E lo skonde Su kara pa nan e tempu ei, pasobra nan echonan tabata malu.

⁵Asina SENOR ta bisa tokante di e profetanan ku ta hasi Mi pueblo dwal; ora nan tin algu pa morde ku nan djente, nan ta grita: "Pas," ma kontra esun ku no ta pone nada den nan boka, nan ta deklara guera santu.

⁶Pesei lo ta nochi pa boso--sin vishon, i skuridat pa boso--sin adivinashon. Solo lo drenta ofer di e profetanan, i dia lo bira skur ofer di nan.

⁷E miradonan lo keda na berguensa, i e adivinadonan lo keda brongosa. Di berdat, nan tur lo tapa nan boka, pasobra no ta bin kontesta for di Dios.

⁸Ma alkontrario, ami ta yen di poder-- ku e Spiritu di SENOR-- i ku hustisia i kurashi pa hasi Jakob konose su echo di rebeldia, i Israel su pika.

⁹Awor tende esaki, kabesantenan di e kas di Jakob i gobernantenan di e kas di Israel, kendenan ta aborese hustisia i ta trose tur kos ku ta stret,

¹⁰kendenan ta konstrui Sion ku dramamentu di sanger i Jerusalem ku inhustisia violento.

¹¹Su lidernan ta pronunsia huisio pa plaka pasa bou di mesa, su saserdotenan ta instrui pa un preis, i su profetanan ta adivina pa plaka. Tog nan ta stens riba SENOR, bisando: "SENOR no ta meimei di nos? Kalamidat lo no bin riba nos."

¹²Pesei, pa kousa di boso, Sion lo wordu geplug manera un kunuku, Jerusalem lo bira un monton di ruina, i e seru di e tempel lo bira luganan haltu di mondi-sera.