Read Papantla Totonac Mikeas 5 Bible Online

Mikeas 5 - Papantla Totonac bible

Mikeas 5

¹"Awor reuni boso mes den trupanan, yu muhe di trupanan; nan a rondona nos; ku un bara nan lo dal e hues di Israel na su band'i kara.

²"Ma abo, Betlehem Efrata, muchu chikitu pa ta entre e famianan di Juda, for di bo lo sali Uno pa Mi pa ta Gobernante na Israel. Su origen ta for di hopi tempu pasa, for di e dianan di eternidat."

³Pesei E lo entrega nan te ora ku esun ku tin dolo di parto a hana yu. E ora ei esnan ku keda di Su rumannan lo bolbe serka e yunan di Israel.

⁴I E lo lanta i pastoria Su tou den e forsa di SENOR, den e mahestat di e nomber di SENOR Su Dios. I nan lo keda, pasobra na e tempu ei E lo ta grandi te na e finnan di tera.

⁵I Esun aki lo ta nos pas. Ora ku e asirio invadi nos tera, ora ku e trapa riba nos sitadelnan, e ora ei nos lo lanta kontra dje shete wardado di karne, si, ocho lider di hende.

⁶I nan lo pastoria e tera di Asiria ku spada, e tera di Nimrod na su entradanan; i E lo libra nos for di e asirio ora ku e ataka nos tera i ora ku e trapa nos teritorio.

⁷E ora ei e restante di Jakob lo ta meimei di hopi pueblo, manera serena for di SENOR, manera yobidanan di awa riba vegetashon ku no ta warda riba hende, ni ta tarda pa e yunan di hende.

⁸I e restante di Jakob lo ta entre e nashonnan, entre hopi pueblo, manera un leon entre e bestianan di mondi-sera, manera un leon chikitu entre tounan di karne, ku, si e pasa einan, ta trapa i ta sker, i no tin ningun hende pa reskata.

⁹Bo man lo wordu lanta kontra bo atversarionan, i tur bo enemigunan lo wordu korta kita afo.

¹⁰"I lo sosode den e dia ei," SENOR ta deklara, "ku lo Mi korta bo kabainan kita for di meimei di bo i destrui bo garoshinan.

¹¹Tambe lo Mi korta e statnan di bo tera kit'afo i basha tur bo luganan fortifika abou.

¹²Lo Mi korta tur bruheria kita for di bo man, i lo bo no tin miradonan di destino mas.

¹³Lo Mi korta bo imagennan graba kit'afo i bo pilarnan sagrado for di meimei di bo, asina ku lo bo no buig mas pa e obra di bo mannan.

¹⁴Lo Mi ranka bo imagennan di Asera kita for di meimei di bo, i destrui bo statnan.

¹⁵I lo Mi ehekuta vengansa ku rabia i furia riba e nashonnan ku no a obedese."