Read Papantla Totonac Mikeas 7 Bible Online

Mikeas 7 - Papantla Totonac bible

Mikeas 7

¹Ai di mi! Pasobra mi ta manera e pikidonan di fruta i manera e kosechadonan di wendruif. No tin ni un troshi di wendruif pa kome, ni un prome figo hechu ku mi ta desea.

²E persona fiel a perese for di e tera, i no tin persona rekto meimei di hende. Nan tur ta skonde lur pa drama sanger; kada un di nan ta yag riba e otro ku un net.

³Tur dos man ta eksperto den hasimentu di maldat. E prens ta eksigi regalo, e hues ta asepta plaka pasa bou di mesa, i e homber poderoso ta papia e deseo di su alma; asina nan tur ta konspira huntu.

⁴Esun di mas miho di nan ta manera un mata di sumpina, esun di mas rekto ta pio ku un trankera di kadushi. E dia ku boso pone un guardia, boso kastigu lo bin. E ora ei nan konfushon lo bin.

⁵No konfia bisina; no tene konfiansa den un amigu. Warda e portanan di bo boka for di esun ku ta drumi na bo pechu.

⁶Pasobra yu homber ta trata tata ku menospresio, yu muhe ta lanta kontra su mama, nuera kontra su suegra; un hende su enemigunan ta e hendenan di su mes kas.

⁷Ma pa loke t'ami, lo mi warda ku speransa riba SENOR; lo mi spera riba e Dios di mi salbashon. Mi Dios lo tendemi.

⁸No regosiha ofer di mi, O mi enemigu. Maske mi kai, lo mi lanta atrobe; maske mi biba den skuridat, SENOR ta un lus pa mi.

⁹Lo mi soporta e indignashon di SENOR, pasobra mi a peka kontra djé, te ora ku E pleita mi kaso i ehekuta hustisia pa mi. E lo sakami hibami na e lus, i lo mi mira Su hustisia.

¹⁰E ora ei esun ku ta mi enemigu lo mira, i berguensa lo tapa esun ku a bisami: "Unda SENOR bo Dios ta?" Mi wowo lo mira esun ku ta mi enemigu; e tempu ei e lo wordu trapa manera lodo di kaya.

¹¹Esaki lo ta un dia pa lanta bo murayanan. Riba e dia ei bo frontera lo wordu ekstendi.

¹²Esaki lo ta un dia ku nan lo bin serka bo for di Asiria i e statnan di Egipto, for di Egipto te na Riu Eufrates, i di laman pa laman i di seru pa seru.

¹³I tera lo bira desola pa motibu di su habitantenan, pa motibu di e fruta di nan echonan.

¹⁴Pastoria Bo pueblo ku Bo septer, e tou di Bo erensia ku ta biba solitario den mondi-sera, meimei di un kunuku fertil. Laga nan kome na Basan i Galaad manera den e dianan di prome aya.

¹⁵"Manera den e dianan ku boso a sali for di tera di Egipto, lo mi mustra boso milagernan."

¹⁶Nashonnan lo mira i keda brongosa di tur nan poder. Nan lo pone man na boka; nan orea lo bira sordo.

¹⁷Nan lo lembe stof manera kolebra, manera bestia ku ta lastra riba tera. Nan lo sali na temblamentu for di nan fortinan; ku temor nan lo bin serka SENOR nos Dios, i nan lo tin miedu Bo dilanti.

¹⁸Ken ta un Dios manera Bo, Kende ta pordona inikidat i ta pasa e akto di rebeldia di e restante di Su erensia forbei? E no ta keda rabia pa semper, pasobra E tin delisia den miserikordia ku no ta kambia.

¹⁹E lo tene kompashon ku nos atrobe; E lo trapa nos inikidatnan. Si, Abo lo tira tur nan pikanan den e profundidatnan di laman.

²⁰Lo Bo demostra berdat na Jakob i miserikordia ku no ta kambia na Abraham, kual Bo a hura na nos antepasadonan for di e dianan di prome aya.