Read Papantla Totonac Nahum 1 Bible Online

Nahum 1 - Papantla Totonac bible

Nahum 1

¹E profesia di Ninive. E buki di e vishon di Nahum di Elkos.

²SENOR ta un Dios yalurs, i E ta tuma vengansa; SENOR ta tuma vengansa i ta yen di furia. SENOR ta tuma vengansa riba Su atversarionan, i E ta mantene furia kontra Su enemigunan.

³SENOR no ta rabia lihe i ta grandi den poder, i SENOR di ningun manera lo no laga e kulpabel sin kastigu. SENOR tin Su kaminda den warwaru i tempestat, i nubianan ta e stof bou di Su pianan.

⁴E ta reprende laman i ta hasie seku; E ta hasi tur e riunan bira seku. Basan i Karmelo ta marchita; e flornan di Libano ta marchita.

⁵Serunan ta tembla pa Su motibu, i e seritunan ta dirti; di berdat, tera ta bolter den Su presensia, mundu i tur e habitantenan den dje.

⁶Ken por para dilanti di Su indignashon? Ken por soporta e ardor di Su rabia? Su furia ta wordu basha manera kandela, i e barankanan ta wordu kibra na pida-pida Su dilanti.

⁷SENOR ta bon, un luga fortifika den e dia di angustia, i E konose esnan ku ta tuma refugio den djé.

⁸Ma ku un diluvio grandi E lo kaba ku su luga kompletamente, i lo persigui Su enemigunan te den skuridat.

⁹Kiko ku bo plania kontra SENOR, E lo kaba kune kompletamente. Angustia lo no lanta dos biaha.

¹⁰Manera sumpina tur bruha den otro, i manera esnan ku ta burachi di nan bibida, nan lo wordu devora manera palu seku di mainshi.

¹¹For di bo a sali un ku a plania maldat kontra SENOR, un konsehero malbado.

¹²Asina SENOR ta bisa: "Maske nan ta yen di forsa i asina hopi, tog nan lo wordu korta kita afo i lo disparse. Maske Mi a afligibo, lo Mi no afligibo mas.

¹³Pesei awor, lo Mi kibra e bara di su yugo for di riba bo, i lo Mi kibra bo kadenanan."

¹⁴SENOR a duna un mandamentu tokante di bo: "Bo nomber lo no keda pa semper mas. Lo Mi korta kita idolo i imagen for di kas di bo diosnan. Lo Mi prepara bo graf, pasobra bo ta abominabel."

¹⁵Ata, riba e serunan e pianan di esun ku ta trese bon nobo, ku ta anunsia pas! Selebra bo fiestanan, O Juda; kumpli ku bo promesanan. Pasobra nunka mas e malbado lo pasa dor di bo; el a keda kompletamente korta kita afo.