Read Papantla Totonac Nahum 2 Bible Online

Nahum 2 - Papantla Totonac bible

Nahum 2

¹Esun ku ta plama a bin kontra bo. Defende e forti, vigila e kaminda; faha bo lomba, hasi tur bo esfuerso.

²Pasobra SENOR lo restora e splendor di Jakob manera e splendor di Israel, maske ku sakeadonan a plunder nan i a destrui nan ramanan di wendruif.

³E eskudonan di su hombernan poderoso ta kolo kora, e guereronan ta bisti na skarlata, e garoshinan ta bin ku flambeu tur na flam ora ku e ta prepara pa marcha, i nan ta zwai ku e lansanan di palu di sipres.

⁴E garoshinan ta kore manera loko den e kayanan, nan ta basha-bin na kareda riba e plenchinan; nan aparensia ta meskos ku flambeu, nan ta kore bai-bin manera rayo di lamper.

⁵E ta rekorda su nobelnan; nan ta trompeka segun nan ta marcha; nan ta pura bai na su muraya, i e defensa ta wordu prepara.

⁶E portanan di e riunan ta wordu habri, i e palasio ta kai den otro.

⁷A wordu dekreta ku e lo keda bashi, ku e lo wordu hiba den eksilio, i ku su sirbientenan lo keha manera palomba, i bati riba nan pechu.

⁸Maske Ninive tabata manera un tanki di awa den tur su dianan, awor nan ta hui bai. "Para! Para!" nan ta grita; ma ningun hende no ta bolbe.

⁹Horta e plata! Horta e oro! Pasobra no tin limite na e tesoro-- rikesa di tur sorto di kos ku hende por desea.

¹⁰El a keda bashi! Si, e ta desola i ruina! Kurason ta dirti i rudia ta tembla! Tambe tin angustia den henter e kurpa, i e karanan di nan tur a bira blek!

¹¹Unda e kueba di e leonnan ta, i e luga di kome di e leonnan chikitu, kaminda e leon, e leon muhe, i e yu di leon tabata sluip, sin nada pa stroba nan?

¹²E leon a habraka sufisiente pa su yunan, a mata sufisiente pa su leonnan muhe, i a yena su luganan di drumi ku proi, i su kuebanan ku karni habraka.

¹³"Mira, Mi ta kontra bo," e SENOR di ehersitonan ta deklara. "Lo Mi kima su garoshinan hasi nan bira huma. Un spada lo devora bo leonnan yon. Lo Mi korta kita bo proi for di e tera, i bos di bo mensaheronan lo no wordu tendi mas."