Read Papantla Totonac Nahum 3 Bible Online

Nahum 3 - Papantla Totonac bible

Nahum 3

¹Ai di e stat tur na sanger, yen-yen di mentira i kosnan horta; nunka e ta falta proi.

²E zonidu di zwip, e zonidu di batimentu di wil, kabainan ku ta galopia, i garoshinan ku ta bula riba kaminda!

³Koredonan di kabai ta ataka, spadanan ta lombra, lansanan ta briya, hopi morto, un monton di kadaver, i kurpanan morto na kantidat-- nan ta trompeka riba e kurpanan morto!

⁴Tur pa motibu di e tantu prostitushonnan di e prostituta, esun atraktivo, e maestra di bruheria, ku ta bende nashonnan pa medio di su prostitushonnan, i famianan pa medio di su bruheria.

⁵"Mira, Mi ta kontra bo," e SENOR di ehersitonan ta deklara; "I lo Mi hisa bo sayanan tapa bo kara kune, i mustra e nashonnan bo sunu, i e reinonan bo berguensa.

⁶Lo Mi tira sushedat riba bo i hasibo fis, i tenebo di spetakel.

⁷I lo sosode ku tur ku mirabo lo hui pa bo i bisa: 'Ninive a keda destrui! Ken lo tene duele di dje?' Unda lo Mi buska konsoladonan pa bo?"

⁸Bo ta miho ku No-amon ku tabata situa banda di e awanan di Neil, ku awa tur ront di dje, kual su baluarte tabata laman, kual su muraya tabata laman?

⁹Etiopia tabata su forsa, i Egipto tambe, sin limite. Put i Libia tabata entre su yudadonan.

¹⁰Sinembargo, el a bira un eksiliado, el a bai den koutiverio; tambe su yunan chikitu a wordu gespat na pida-pida na krusada di tur kaya; nan a tira lot pa su hombernan onorabel, i tur su gran hombernan a wordu mara ku kadena.

¹¹Abo tambe lo bira burachi; lo bo bai skonde. Abo tambe lo buska refugio kontra e enemigu.

¹²Tur bo fortinan ta palu di figo ku fruta hechu-- ora nan wordu sakudi, nan ta kai den boka di e komedo.

¹³Ata, bo pueblo ta manera muhe meimei di boso! E portanan di bo tera ta hanchu habri pa bo enemigunan; kandela ta kaba ku bo baranan di porta.

¹⁴Provee awa pa bo mes pa tempu di atake! Reforsa bo fortinan! Bai den e klei i traha e meskla! Kohe e forma di bloki!

¹⁵Aya kandela lo kaba ku bo, spada lo kap bo bash'abou; e lo kaba ku bo manera tirakochi ta hasi. Multiplika bo mes manera tirakochi ku ta lastra; multiplika bo mes manera tirakochi ku ta kriul den otro.

¹⁶Bo a oumenta bo negoshantenan mas ku e streanan di shelu-- e tirakochi ku ta lastra ta kome laga limpi-limpi i ta bula bai.

¹⁷Bo guardianan ta manera tirakochi ku ta kriul den otro. Bo ofisialnan ta manera un nubia di tirakochi ku ta pega na e murayanan di piedra riba un dia friu. Solo ta sali i nan ta bula bai, i e luga unda nan ta no ta konosi.

¹⁸Bo wardadonan di karne ta drumi, O rei di Siria; bo nobelnan ta sosega. Bo pueblo ta plama riba e serunan, i no tin ningun hende pa reuni nan.

¹⁹No tin alivio pa bo golpi, bo herida ta inkurabel. Tur ku tende tokante di bo lo bati man kontra bo, pasobra riba ken bo maldat no a pasa kontinuamente?