Read Papantla Totonac Habakuk 1 Bible Online

Habakuk 1 - Papantla Totonac bible

Habakuk 1

¹E profesia ku profeta Habakuk a mira.

²Te ki tempu, O SENOR, lo mi sklama pa yudansa, i Abo no ta tende? Mi ta sklama na Bo: "Violensia!" Tog Bo no ta salba.

³Pakiko Bo ta hasimi mira inikidat, i ta hasimi mira maldat? Si, destrukshon i violensia ta mi dilanti; tin desunion i pleitu ta lanta.

⁴Pesei lei ta wordu ignora, i hustisia nunka ta wordu hasi. Pasobra e malbado ta rondona e hustu, pesei hustisia ta wordu perverti.

⁵"Mira entre e nashonnan! Opserva! Keda strana! Keda asombra! Pasobra Mi ta hasiendo algu den boso dianan-- boso lo no kere ni maske nan konta boso.

⁶Pasobra mira, mi ta bai lanta e kaldeonan, e pueblo kruel i violento ei ku ta marcha dor di henter mundu pa gara luganan di biba ku no ta di nan.

⁷Nan ta teribel i spantoso. Nan hustisia i outoridat ta prosede for di nan mes.

⁸Nan kabainan ta mas rapido ku leopardo i mas sabi ku lobo den oranan di atardi. Nan koredonan di kabai ta bin na kareda, nan koredonan di kabai ta bin for di leu; nan ta bula manera un aguila ku ta baha rapidamente pa devora.

⁹Nan tur ta bin pa violensia. Nan multitut di karanan ta avansa. Nan ta kolekta katibu manera ta kolekta santu.

¹⁰Nan ta hasi chercha di reinan; i pa nan, gobernantenan ta kos di hari. Nan ta hari tur luga fortifika, i ta montona tera pa traha baluarte pa kaptur'e.

¹¹E ora ei nan lo pasa bai manera bientu i sigui nan kaminda. Ma nan lo keda kulpabel, esnan ku nan forsa ta nan dios."

¹²No ta for di eternidat Bo ta, O SENOR, mi Dios, mi Santu? Nos lo no muri. Abo, O SENOR, a nombra nan pa huzga; i Abo, O Baranka, a stablese nan pa koregi.

¹³Bo wowonan ta muchu puru pa aproba maldat, i Bo no por wak maldat ku toleransia. Pakiko Bo ta wak ku toleransia riba esnan ku ta trata ku traishon? Pakiko Bo ta keda ketu ora ku e malbadonan ta traga esnan ku ta mas hustu ku nan?

¹⁴Pakiko Bo a traha hende manera piska di laman, manera bestia ku ta lastra, sin un gobernante riba nan?

¹⁵E kaldeonan ta saka nan tur ku anzue, ta kohe nan den nan reda, i ta hunta nan den nan reda ku nan ta uza pa trek piska hiba kantu. Pesei nan ta regosiha i ta kontentu.

¹⁶Pesei nan ta ofrese sakrifisio na nan reda, i ta kima sensia na nan reda ku nan ta uza pa trek piska hiba kantu; pasobra pa kousa di e kosnan aki nan ta kohe masha hopi mes, i nan kuminda ta abundante.

¹⁷Ta pesei nan mester hasi nan reda bashi i sigui mata nashonnan, sin miserikordia?