Read Papantla Totonac Habakuk 2 Bible Online

Habakuk 2 - Papantla Totonac bible

Habakuk 2

¹Lo mi para tene warda i stashona mi mes riba e baluarte; i lo mi spera pa mira kiko E lo papia ku mi, i kiko mi mester kontesta ora mi wordu reprendi.

²E ora ei SENOR a kontestami i a bisa: "Skirbi e vishon i grab'e riba tablanan, pa esun ku les'e por kore.

³Pasobra e vishon lo ta pa e tempu stipula; e ta pura yega na e fin, i e lo no faya. Maske e ta tarda, sper'e; pasobra e lo bin sigur, e lo no tarda.

⁴"Mira, pa loke ta e hende orguyoso, su alma no ta rekto den dje; ma e hustu lo biba pa medio di su fe.

⁵Ademas, bina ta traishona e homber arogante, asina ku e no ta keda kas. E ta habri su apetit manera Seol, i e ta manera morto, nunka satisfecho. Tambe e ta reuni tur nashon serka dje i ta trese tur e pueblonan serka dje.

⁶"Tur esakinan lo no entona un proverbio di menospresio kontra dje, si, bofon i insinuashonnan kontra dje, i bisa: 'Ai di esun ku ta oumenta loke no ta di dje, i ta hasi su mes riku ku kosnan fia! Te ki tempu esaki mester sigui asina?'

⁷Esnan ku ta dunabo fiansa lo no lanta direpiente, i esnan ku ta kobrabo lo no spierta? Di berdat, lo bo bira botin pa nan.

⁸Pasobra bo a plunder hopi nashon, tur e pueblonan ku a keda lo plunder bo-- pa kousa di dramamentu di sanger humano i violensia hasi na e tera, na e stat i na tur su habitantenan.

⁹"Ai di esun ku ta hana mal ganashi pa su kas, pa pone su neishi na haltu, pa wordu libra for di e man di kalamidat!

¹⁰Bo a plania un kos bergonsoso pa bo kas dor di ruina hopi pueblo; asina bo ta peka kontra bo mes.

¹¹Siguramente e piedra lo sklama for di muraya, i e biga lo kontest'e for di e span di dak.

¹²"Ai di esun ku ta traha un stat ku dramamentu di sanger i ku ta funda un stat ku violensia!

¹³No ta e SENOR di ehersitonan a determina ku e trabou duru di e pueblonan ta solamente kombustibel pa kandela, i ku e nashonnan ta kansa nan kurpa pornada?

¹⁴Pasobra tera lo wordu yena ku konosementu di e gloria di SENOR, manera e awanan ta tapa laman.

¹⁵"Ai di bo ku ta hasi bo bisinanan bebe, ku ta meskla bo veneno den dje pa hasi nan burachi, pa asina wak nan desnudes!

¹⁶Lo bo wordu yena ku berguensa enbes di onor. Awor abo mes bebe i ekspone bo mes desnudes. E kopa den e man drechi di SENOR lo pasa ront bin pa bo, i berguensa grandi lo tapa bo gloria.

¹⁷Pasobra e violensia ku bo a hasi kontra Libano lo podera di bo, i e destrukshon di e bestianan lo terorisabo, pa motibu di e dramamentu di sanger di hende i e violensia hasi na e tera, na e stat i na tur su habitantenan.

¹⁸"Ki probecho e idolo tin, ora esun ku a trah'e a kaba di grab'e, of un imagen, un sinado di mentira? Pasobra esun ku a trah'e ta konfia den loke e mes a krea ora ku e ta traha idolonan ku no por papia.

¹⁹Ai di esun ku ta bisa na un pida palu: 'Spierta!' Na un piedra mudo: 'Lanta!' I esei ta bo sinado? Mira, e ta kubri ku oro i plata, i no tin rosea mes den dje.

²⁰Ma SENOR ta den Su tempel santu. Laga henter tera keda ketu Su dilanti."