Read Papantla Totonac Habakuk 3 Bible Online

Habakuk 3 - Papantla Totonac bible

Habakuk 3

¹Orashon di profeta Habakuk, segun Sigionot.

²SENOR, mi a tende e notisia tokante di Bo i mi tin miedu. O SENOR, rebiba Bo obra den kurso di e ananan, den kurso di e ananan, hasie konosi; den furia korda miserikordia.

³Dios ta bin for di Teman, i Esun Santu for di Seru Paran. Su splendor ta tapa e shelunan, i tera ta yen di Su alabansa.

⁴Su splendor ta manera e lus di solo; E tin rayonan briyante ku ta sali for di Su man, i eiden Su poder ta skondi.

⁵Pestilensia ta bai Su dilanti, i plaga ta sigui Su tras.

⁶El a para i a midi tera; El a wak i a spanta e nashonnan. Si, e serunan perpetuo a keda garna na pida-pida; e seritunan antiguo a kai den otro. Su kamindanan ta eterno.

⁷Mi a mira e tentnan di Kusan den aflikshon; e kortinanan di tent di e tera di Madian tabata tembla.

⁸SENOR Su furia a lanta kontra e riunan, of Bo rabia tabata kontra e riunan, of Bo furia tabata kontra laman, ku Bo a kore riba Bo kabainan, den Bo garoshinan di salbashon?

⁹Bo a saka Bo bog, e baranan di kastigu tabata prepara. Bo a spleit e tera pa medio di riunan.

¹⁰E serunan a miraBo i a tembla; e awaserunan pisa a pasa bai. E profundidat a halsa su bos, el a hisa su mannan na haltu.

¹¹Solo i luna a keda para na nan luga; nan a pasa bai pareu ku e lus di Bo flechanan, pareu ku e splendor di Bo lansa lombrante.

¹²Ku indignashon Bo a marcha pasa dor di e tera; ku rabia Bo a trapa e nashonnan.

¹³Bo a sali pa e salbashon di Bo pueblo, pa e salbashon di Bo ungi. Bo a dal e kabes di kas di e malbado pa habrie for di hep te na nek.

¹⁴Bo a bora kabes di su guereronan ku su mes lansanan. Nan a bin manera un warwaru pa plama nos; nan hubilo tabata manera di esnan ku ta devora e opriminan na sekreto.

¹⁵Bo a trapa riba laman ku Bo kabainan, riba olanan di hopi awanan.

¹⁶Mi a tende i mi paden a tembla; na e zonidu mi lepnan a tembla. Putrimentu ta drenta mi wesunan, i mi ta tembla kaminda mi ta para. Pasobra mi mester spera ketu asina pa e dianan di angustia, pa e pueblo ku ta bin invadi nos lanta.

¹⁷Maske e palu di figo no floria, i e matanan di wendruif no karga fruta, maske e kosecha di e palu di oleifi faya, i e kunukunan no produsi kuminda, maske e tou wordu korta kita for di e kura, i no tin baka den e stalnan,

¹⁸tog lo mi alegra den SENOR, lo mi regosiha den e Dios di mi salbashon.

¹⁹Senor DIOS ta mi fortalesa, i El a hasi mi pianan manera pianan di bina, i ta hasimi kana riba mi luganan haltu. Pa e direktor di kor, riba mi instrumentnan di kuerde.