Read Papantla Totonac Sofonias 1 Bible Online

Sofonias 1 - Papantla Totonac bible

Sofonias 1

¹E palabra di SENOR ku a yega na Sofonias, yu homber di Kusi, yu homber di Gedalias, yu homber di Amarias, yu homber di Ezekias, den e dianan di Josias, yu homber di Amon, rei di Juda:

²"Lo Mi kita tur kos kompletamente for di riba e superfisio di tera," SENOR ta deklara.

³"Lo Mi kita hende i bestia; lo Mi kita e parhanan di shelu i e piskanan di laman, i e ruinanan huntu ku e malbadonan; i lo Mi korta kita hende for di riba e superfisio di tera," SENOR ta deklara.

⁴"Asina lo Mi saka Mi man kontra Juda i kontra tur e habitantenan di Jerusalem. I lo Mi korta kita tur loke a resta di Baal for di e luga aki, i e nombernan di e saserdotenan ku ta adora idolo huntu ku e saserdotenan,

⁵i esnan ku ta buig pa e ehersito di shelu riba e daknan di kas, i esnan ku ta buig i ta hura na SENOR, i tog ta hura na Milkom,

⁶i esnan ku a stop di sigui SENOR, i esnan ku no a buska SENOR, ni a konsulta kuné.

⁷Keda ketu dilanti di Senor DIOS! Pasobra e dia di SENOR ta serka, pasobra SENOR a prepara un sakrifisio; El a konsagra Su invitadonan.

⁸Anto lo sosode ku riba e dia di e sakrifisio di SENOR lo Mi kastiga e prensnan, e yunan di rei, i tur ku ta bisti nan mes ku bistinan stranhero.

⁹I riba e dia ei lo Mi kastiga tur ku ta bula riba drempel di e tempel, ku ta yena e kas di nan senor ku violensia i engano.

¹⁰"I riba e dia ei," SENOR ta deklara, "lo tin e zonidu di sklamashon for di Porta di Piska, un yoramentu for di e di dos Distrikto, i un krakmentu duru for di e seritunan.

¹¹Grita yora, O habitantenan di Maktes, pasobra henter e pueblo di Kanaan lo wordu silensia; tur ku ta pisa plata lo wordu korta kita afo.

¹²I lo sosode na e tempu ei ku lo Mi ristra Jerusalem ku lanterna, i lo Mi kastiga e hombernan ku ta stagna den spiritu, ku ta bisa den nan kurason: 'SENOR lo no hasi ni bon ni malu!'

¹³Ademas, nan rikesa lo bira botin, i nan kasnan lo keda desola; si, nan lo traha kas, ma nan lo no biba den nan, i nan lo planta kunukunan di wendruif, ma nan lo no bebe nan bina."

¹⁴"E gran dia di SENOR ta serka; e ta serka i e ta bin masha lihe mes. Skucha! E sklamashon riba e dia di SENOR lo ta amargo. Ayanan e guerero ta grita.

¹⁵E dia ei ta un dia di furia, un dia di problema i angustia, un dia di destrukshon i desolashon, un dia di skuridat i tiniebla, un dia di nubia i skuridat profundo,

¹⁶un dia di trompet i gritu di bataya kontra e statnan fortifika i e torennan haltu di skina.

¹⁷I lo Mi trese angustia riba hende asina ku nan lo kana manera hende siegu, pasobra nan a peka kontra SENOR; i nan sanger lo wordu drama manera stof, i nan karni manera mest.

¹⁸Ni nan plata ni nan oro lo no por libra nan riba e dia di e furia di SENOR; i henter tera lo wordu destrui den e kandela di Su yalursheit, pasobra E lo pone un fin kompleto, si, un fin teribel, na tur e habitantenan di tera."