Read Papantla Totonac Sofonias 3 Bible Online

Sofonias 3 - Papantla Totonac bible

Sofonias 3

¹Ai di e stat ku ta rebelde i kontamina, e stat tiraniko!

²E no a paga tino na ningun bos; e no a asepta instrukshon. E no a konfia den SENOR; e no a hala serka su Dios.

³Su prensnan ku ta den dje ta leon ku ta gruna, su huesnan ta lobo di atardi; nan no ta laga nada pa mainta.

⁴Su profetanan ta iresponsabel, hombernan traishonero; su saserdotenan a profana e santuario. Nan a viola lei.

⁵SENOR ta hustu den dje; E lo no hasi inhustisia. Tur mainta E ta saka Su hustisia na klaridat; E no ta faya. Ma e inhustu no konose berguensa.

⁶"Mi a korta nashonnan kit'afo, nan torennan di skina a keda na ruina. Mi a hasi nan kayanan keda desola, kaminda ningun hende no ta pasa; nan statnan ta keda ruina, sin ningun hende, sin ningun habitante.

⁷Mi a bisa: 'Siguramente lo bo respetaMi, asepta instrukshon.' Asina ku su luga di biba lo no wordu korta kita afo segun tur loke Mi a stipula tokante di dje. Ma nan tabata pura pa korumpi tur nan echonan.

⁸Pesei, spera riba Mi," SENOR ta deklara, "pa e dia ku Mi lanta pa plunder. Di berdat, Mi desishon ta pa reuni nashonnan, pa trese reinonan huntu, pa basha Mi indignashon riba nan, tur Mi rabia ardiente; pasobra henter tera lo wordu devora pa medio di e kandela di Mi zelo.

⁹"Pasobra e ora ei lo Mi duna e pueblonan lepnan purifika, pa nan tur por invoka e nomber di SENOR, pa sirbié den un akuerdo.

¹⁰For di e otro banda di e riunan di Etiopia Mi adoradonan, esnan di Mi ku a wordu plama, lo trese Mi ofrendanan.

¹¹Den e dia ei lo bo no sinti berguensa pa motibu di tur bo echonan pa medio di kualnan bo a rebeldia kontra Mi; pasobra e ora ei lo Mi kita for di meimei di boso esnan ku ta alegra ku orguyo, i nunka mas lo bo ta soberbe riba Mi seru santu.

¹²Ma lo Mi laga un pueblo umilde i mansu meimei di bo, i nan lo tuma refugio den e nomber di SENOR.

¹³E restante di Israel lo no hasi malu, ni papia mentira; tampoko un lenga enganoso lo no wordu hana den nan boka, pasobra nan lo kome i drumi sin ningun hende pa pone nan tembla."

¹⁴Grita di alegria, O yu muhe di Sion! Grita ku triunfo, O Israel! Alegra i regosiha di henter bo kurason, O yu muhe di Jerusalem!

¹⁵SENOR a kita Su huisionan kontra bo, El a kore ku bo enemigunan. E Rei di Israel, e SENOR, ta meimei di bo; lo bo no tin miedu di desaster mas.

¹⁶Den e dia ei lo wordu bisa na Jerusalem: "No tene miedu, O Sion; no laga bo mannan bira debil.

¹⁷SENOR bo Dios ta meimei di bo, un guerero viktorioso. E lo regosiha den bo ku alegria, E lo ta ketu den Su amor, E lo regosiha den bo ku gritu di alegria."

¹⁸"Lo Mi reuni esnan ku tin duele, pasobra nan ta anhela na e fiestanan stipula-- nan tabata di bo, O Sion; e reproche di eksilio ta un karga riba nan.

¹⁹Mira, e tempu ei Mi ta bai trata ku tur boso opresornan; lo Mi salba e kohonan i rekohe e eksiliadonan, i lo Mi kambia nan berguensa hasie alabansa i fama den henter tera.

²⁰Na e tempu ei lo Mi reuni boso, na e tempu ei lo Mi trese boso kas. Di berdat, lo Mi duna boso fama i alabansa meimei di tur e pueblonan di tera, dia ku dilanti di boso wowo Mi trese esnan di boso ku ta den koutiverio, bek," SENOR ta bisa.