Read Papantla Totonac Hagai 1 Bible Online

Hagai 1 - Papantla Totonac bible

Hagai 1

¹Den e di dos ana di rei Dario, riba e prome dia di e di seis luna, e palabra di SENOR a yega pa medio di profeta Hageo na Zorobabel, yu homber di Salatiel, gobernado di Juda, i na Josue, yu homber di sumosaserdote Josadak, bisando:

²"Asina e SENOR di ehersitonan ta bisa: 'E pueblo aki ta bisa: "E tempu no a yega, esta, e tempu pa e kas di SENOR wordu traha di nobo.

³E ora ei e palabra di SENOR a bin pa medio di profeta Hageo, bisando:

⁴"Ta tempu pa boso mes si biba den boso kasnan fura, mientras ku e kas aki ta keda desola?"

⁵Pesei anto, asina e SENOR di ehersitonan ta bisa: "Pensa bon riba boso kondukta!

⁶Boso a sembra hopi, ma a kosecha poko; boso ta kome, ma no tin basta pa satisfase boso; boso ta bebe, ma no tin basta pa boso bira burachi; boso ta bisti pana, ma ningun hende su kurpa no ta keinta; i esun ku ta gana sueldo, ta gana sueldo pa hinka den un saku ku buraku."

⁷Asina e SENOR di ehersitonan ta bisa: "Pensa bon riba boso kondukta!

⁸Bai riba e serunan, buska palu i traha e tempel di nobo, pa Mi por ta kontentu kune i wordu glorifika," SENOR ta bisa.

⁹"Boso ta buska hopi, ma mira, boso ta hana poko; ora boso tres'e kas, Mi ta supl'e bai kune. Pakiko?" e SENOR di ehersitonan ta deklara. "Pa motibu di Mi kas ku ta keda desola, mientras ku kada un di boso ta kore bai na su mes kas.

¹⁰Pesei, pa boso motibu shelu no a laga su serena kai, i tera no a duna su fruta.

¹¹I Mi a yama pa un sekura bin riba e tera, riba e serunan, riba e mainshi, riba e bina nobo, riba e zeta, riba loke suela ta produsi, riba hende, riba bestia di kria, i riba tur e trabou di boso mannan."

¹²Anto Zorobabel, yu homber di Salatiel, i Josue, yu homber di sumosaserdote Josadak, huntu ku henter e restante di e pueblo, a obedese e bos di SENOR nan Dios i e palabranan di profeta Hageo, manera SENOR nan Dios a mand'e. I e pueblo a mustra reverensia pa SENOR.

¹³E ora ei Hageo, e mensahero di SENOR, a papia ku e pueblo pa medio di e mandato di SENOR, bisando: "'Mi ta ku boso,' SENOR ta deklara."

¹⁴Asina SENOR a anima e spiritu di Zorobabel, yu homber di Salatiel, gobernado di Juda, i e spiritu di Josue, yu homber di sumosaserdote Josadak, i e spiritu di henter e restante di e pueblo; i nan a bin traha riba e kas di e SENOR di ehersitonan, nan Dios,

¹⁵riba e di bint'i kuater dia di e di seis luna den e di dos ana di rei Dario.