Read Papantla Totonac Hagai 2 Bible Online

Hagai 2 - Papantla Totonac bible

Hagai 2

¹Riba e di bint'i un dia di e di shete luna, e palabra di SENOR a yega pa medio di profeta Hageo, bisando:

²"Papia awor ku Zorobabel, yu homber di Salatiel, gobernado di Juda, i ku Josue, yu homber di sumosaserdote Josadak, i ku e restante di e pueblo, bisando:

³'Ken a keda entre boso ku a mira e tempel aki den su gloria di antes? I kon boso ta mir'e awor? Boso no ta hana ku e ta parse nada kompara ku e otro?

⁴Ma awor tene kurashi, Zorobabel,' SENOR ta deklara, 'tambe tene kurashi Josue, yu homber di sumosaserdote Josadak, i boso tur, yu di tera, tene kurashi,' SENOR ta deklara, 'i traha; pasobra Mi ta ku boso,' e SENOR di ehersitonan ta bisa.

⁵'Pa loke ta e promesa ku Mi a hasi na boso tempu ku boso a sali for di Egipto, Mi Spiritu ta permanese meimei di boso; no tene miedu!'

⁶"Pasobra asina e SENOR di ehersitonan ta bisa: 'Den poko tempu Mi ta bai sakudi un biaha mas e shelunan i e tera, e laman i e tera seku.

⁷I lo Mi sakudi tur e nashonnan; i nan lo bin ku e rikesa di tur nashon; i lo Mi yena e kas aki ku gloria,' e SENOR di ehersitonan ta bisa.

⁸'E plata ta di Mi, i e oro ta di Mi,' e SENOR di ehersitonan ta deklara.

⁹'E ultimo gloria di e kas aki lo ta mas grandi ku esun di prome,' e SENOR di ehersitonan ta bisa. 'I den e luga aki lo Mi duna pas,' e SENOR di ehersitonan ta deklara."

¹⁰Riba e di bint'i kuater dia di e di nuebe luna, den e di dos ana di Dario, e palabra di SENOR a yega na profeta Hageo, bisando:

¹¹"Asina e SENOR di ehersitonan ta bisa: 'Awor puntra e saserdotenan kiko lei ta bisa.

¹²Si un hende karga karni santu den e dobla di su bisti, i e dobla aki mishi ku pan, of kuminda kushina, bina, zeta of kualke otro kuminda, esaki lo bira santu?'" I e saserdotenan a kontesta i a bisa: "No."

¹³Anto Hageo a bisa: "Si un hende ku ta impuru, pa motibu di a mishi ku un kadaver, mishi ku kualke di e kosnan aki, esaki lo bira impuru?" I e saserdotenan a kontesta i a bisa: "E lo bira impuru."

¹⁴E ora ei Hageo a kontesta i a bisa: "'Asina e pueblo aki ta. I asina e nashon aki ta Mi dilanti,' SENOR ta deklara, 'i asina kada obra di nan mannan ta; i loke nan ta ofrese einan ta impuru.

¹⁵'Ma awor, pensa bon for di awor padilanti: prome ku un piedra a wordu poni riba un otro piedra den e tempel di SENOR,

¹⁶for di e tempu ei ora ku un hende yega banda di un monton di trigo di binti midi, tabatin solamente dies; i ora ku un hende yega na e baki-di-pers-wendruif pa saka sinkuenta midi, tabatin solamente binti.

¹⁷Mi a suta boso i tur obra di boso mannan ku bientu fuerte, beskem i hagel; tog boso no a bolbe serka Mi,' SENOR ta deklara.

¹⁸'Pensa bon for di awor padilanti, for di e di bint'i kuater dia di e di nuebe luna; for di e dia ku e tempel di SENOR a wordu funda, pensa bon:

¹⁹E simia ta den mangasina ainda? Ni e mata di wendruif, e palu di figo, e palu di granatapel i e palu di oleifi no a duna fruta. 'Ma for di awe padilanti lo Mi bendishona boso.'"

²⁰E ora ei e palabra di SENOR a yega pa di dos biaha na Hageo, riba e di bint'i kuater dia di luna, bisando:

²¹"Papia ku Zorobabel, gobernado di Juda, bisando: 'Mi ta bai sakudi e shelunan i e tera.

²²I lo Mi bolter e trononan di reinonan i destrui poder di e reinonan di e nashonnan; i lo Mi bolter e garoshinan i nan koredonan, i e kabainan i nan koredonan lo kai, kada un pa medio di spada di e otro.'

²³'Riba e dia ei,' e SENOR di ehersitonan ta deklara, 'lo Mi tumabo, Zorobabel, yu homber di Salatiel, Mi sirbido,' SENOR ta deklara, 'i lo Mi hasibo manera un renchi-di-seyo, pasobra Mi a skohebo,'" e SENOR di ehersitonan ta deklara.