Read Papantla Totonac Zakarias 1 Bible Online

Zakarias 1 - Papantla Totonac bible

Zakarias 1

¹Den e di ocho luna di e di dos ana di Dario, e palabra di SENOR a yega na profeta Zakarias, yu homber di Berekias, yu homber di Ido, bisando:

²"SENOR tabata masha rabia ku boso tatanan.

³Pesei bisa nan: 'Asina e SENOR di ehersitonan ta bisa: "Bolbe serka Mi," e SENOR di ehersitonan ta deklara, "pa Mi bolbe serka boso," e SENOR di ehersitonan ta bisa.

⁴"No sea manera boso tatanan, na kendenan e profetanan di prome aya a proklama, bisando: 'Asina e SENOR di ehersitonan ta bisa: "Bolbe awor for di boso mal kamindanan i for di boso mal echonan."' Ma nan no a skucha, ni a hasi kaso di Mi," SENOR ta deklara.

⁵"Boso tatanan, unda nan ta? I e profetanan, nan ta biba pa semper?

⁶Ma Mi palabranan i Mi statutonan ku Mi a ordena Mi sirbidonan, e profetanan, no a alkansa boso tatanan? "E ora ei nan a repent! i a bisa: 'Manera e SENOR di ehersitonan a propone pa hasi ku nos, segun nos kondukta i nos echonan, asina El a hasi ku nos.

⁷Riba e di bint'i kuater dia di e di diesun luna, ku ta e luna di Sebat, den e di dos ana di Dario, e palabra di SENOR a yega na profeta Zakarias, yu homber di Berekias, yu homber di Ido, bisando:

⁸Anochi mi a mira, i ata un homber tabata kore riba un kabai kora, i e tabata para meimei di e palunan di mirto ku tabatin den e vaye, ku kabainan kora, maron i blanku su tras.

⁹E ora ei mi a bisa: "Mi senor, kiko esakinan ta?" I e angel ku tabata papia ku mi a bisami: "Lo mi mustrabo kiko esakinan ta."

¹⁰I e homber ku tabata para meimei di e palunan di mirto a kontesta i a bisa: "Esakinan ta esnan ku SENOR a manda pa patruya tera."

¹¹Asina nan a kontesta e Angel di SENOR, Kende tabata para meimei di e palunan di mirto, i a bisa: "Nos a patruya e tera, i mira, henter e tera ta na pas i ta trankil."

¹²Anto e Angel di SENOR a kontesta i a bisa: "O SENOR di ehersitonan, kuantu tempu mas lo Bo no tene kompashon ku Jerusalem i ku e statnan di Juda, ku kualnan Bo tabata indigna pa e setenta ananan aki?"

¹³I SENOR a kontesta e angel ku tabata papia ku mi, ku palabranan karinoso, palabranan di konsuelo.

¹⁴E ora ei e angel ku tabata papia ku mi a bisami: "Proklama, bisando: 'Asina e SENOR di ehersitonan ta bisa: "Mi ta masha yalurs pa Jerusalem i pa Sion.

¹⁵Ma Mi ta masha rabia ku e nashonnan ku ta trankil di nan; pasobra mientras ku Mi tabata un poko rabia so, nan a laga e desaster oumenta."

¹⁶'Pesei, asina SENOR ta bisa: "Lo Mi bolbe na Jerusalem ku kompashon; Mi kas lo wordu traha den dje," e SENOR di ehersitonan ta deklara, "i nan lo span un lina-di-midi riba Jerusalem."'

¹⁷"Atrobe, proklama, bisando: 'Asina e SENOR di ehersitonan ta bisa: "Mi statnan lo bolbe basha ofer di prosperidat, i SENOR lo bolbe konsola Sion i lo bolbe skohe Jerusalem.

¹⁸Anto mi a hisa mi kara wak, i mira, tabatin kuater kachu.

¹⁹Pesei mi a bisa e angel ku tabata papia ku mi: "Kiko esakinan ta?" I el a kontestami: "Esakinan ta e kachunan ku a plama Juda, Israel i Jerusalem."

²⁰E ora ei SENOR a mustrami kuater homber di ofishi.

²¹I mi a bisa: "Kiko esakinan ta bin hasi?" I el a bisa: "Esakinan ta e kachunan ku a plama Juda, asina ku ningun hende no ta hisa su kabes; ma e hombernan di ofishi aki a bin pa terorisa nan, pa bash'abou e kachunan di e nashonnan ku a lanta nan kachunan kontra tera di Juda pa plam'e."