Read Papantla Totonac Zakarias 13 Bible Online

Zakarias 13 - Papantla Totonac bible

Zakarias 13

¹"Den e dia ei un fuente lo wordu habri pa e kas di David i pa e habitantenan di Jerusalem, pa pika i pa impuresa.

²"I lo sosode ku den e dia ei," e SENOR di ehersitonan ta deklara, "lo Mi korta kita e nombernan di e ldolonan for di e tera, i nan lo no wordu rekorda mas; i tambe lo Mi kita e profetanan i e spiritu impuru for di e tera.

³I lo sosode ku si ainda tin hende ta profetisa, anto su tata i su mama ku a han'e lo bis'e: 'Lo bo no biba mas, pasobra bo a papia mentira den e nomber di SENOR'; i su tata i su mama ku a han'e lo traspas'e ora ku e profetisa.

⁴"Tambe lo sosode den e dia ei ku kada un di e profetanan lo hana berguensa di su vishon ora ku e ta profetisa, i nan lo no bisti un mantel di lana pa papia mentira;

⁵ma e lo bisa: 'Mi no ta profeta; mi ta un kunukero, pasobra un hende a bendemi komo esklabu den mi hubentut.'

⁶Si un hende puntr'e: 'Kiko ta nifika e heridanan aki na bo pechu?' E ora ei e lo bisa: 'Esakinan ta e heridanan ku mi a hana den kas di mi amigunan.'

⁷"Spierta, O spada, kontra Mi Wardado, i kontra e Homber, Mi Kompanero," e SENOR di ehersitonan ta deklara. "Dal e Wardado mata pa e karnenan wordu plama; i lo Mi bira Mi man kontra e chikitunan.

⁸I lo sosode den henter e tera," SENOR ta deklara, "ku dos parti den dje lo wordu korta kita afo i lo perese, ma e di tres parti lo keda den dje.

⁹I lo Mi pasa e di tres parti dor di kandela, refina nan manera ta refina plata, i proba nan manera ta proba oro. Nan lo invoka Mi nomber, i lo Mi kontesta nan; lo Mi bisa: 'Nan ta Mi pueblo,' i nan lo bisa: 'SENOR ta mi Dios.'"