Read Papantla Totonac Zakarias 14 Bible Online

Zakarias 14 - Papantla Totonac bible

Zakarias 14

¹Mira, ta bin un dia pa SENOR ku e botin ku a wordu kita for di boso lo wordu parti entre boso.

²Pasobra lo Mi reuni tur e nashonnan kontra Jerusalem pa bataya, i e stat lo wordu kaptura, e kasnan lo wordu geplunder, e muhenan lo wordu viola, i mitar di e stat lo bai den eksilio, ma e restu di e pueblo lo no wordu korta kita for di e stat.

³E ora ei SENOR lo sali i bringa kontra e nashonnan ei, manera E ta bringa riba un dia di bataya.

⁴I den e dia ei Su pianan lo para riba Seru di Oleifi, ku ta keda dilanti di Jerusalem, parti pariba; i Seru di Oleifi lo spleit den dos for di pariba te pabou, kousando un vaye masha-masha grandi, asina ku mitar di e seru lo move den direkshon nort i e otro mitar den direkshon suit.

⁵I boso lo hui pasa dor di e vaye di Mi serunan, pasobra e vaye di e serunan lo yega te na Azal; si, boso lo hui meskos ku boso a hui pa e temblor den e dianan di Uzias, rei di Juda. Anto SENOR, mi Dios, lo bin, i tur e santunan huntu kuné!

⁶I lo sosode den e dia ei ku lo no tin lus; e fuentenan di lus lo mengua.

⁷Pasobra lo ta un dia uniko ku ta konosi pa SENOR--lo no tin ni dia ni anochi, ma ora nochi ta sera lo sosode ku tin lus.

⁸I lo sosode den e dia ei ku awanan bibu lo kore for di Jerusalem, esun mitar pa laman di pariba i e otro mitar pa laman di pabou; esaki lo sosode tantu den zomer komo den wenter.

⁹I SENOR lo ta rei riba henter e tera; den e dia ei SENOR lo ta e uniko, i Su nomber e uniko.

¹⁰Henter e tera for di Geba te na Rimon, pasuit di Jerusalem, lo wordu kambia den sabana; ma Jerusalem lo lanta i keda na su luga, for di Porta di Benjamin te na e luga di e Prome Porta, te na Porta di Skina, i for di Toren di Hananeel te na e bakinan-di-pers-wendruif di rei.

¹¹I lo tin hende ta biba den dje, i lo no tin maldishon mas, pasobra Jerusalem lo biba den siguridat.

¹²Awor esaki lo ta e plaga ku kual SENOR lo afligi tur e pueblonan ku a bai bringa kontra Jerusalem; nan karni lo putri mientras nan ta para riba nan pia, nan wowo lo putri den nan kash'i wowo, i nan lenga lo putri den nan boka.

¹³I lo sosode den e dia ei ku un paniko grandi for di SENOR lo kai riba nan; i nan lo gara man di otro, i man di esun lo lanta kontra man di e otro.

¹⁴I Juda tambe lo bringa na Jerusalem; i e rikesa di tur e nashonnan ront lo wordu rekohi: oro, plata i pananan na gran abundansia.

¹⁵I meskos ku e plaga aki, asina tambe e plaga riba kabai, mula, kamel, buriku, i tur e bestianan di kria ku lo ta den e kampamentunan ei, lo ta.

¹⁶E ora ei lo sosode ku tur ku resta di tur e nashonnan ku a bai kontra Jerusalem lo bai ana tras ana pa adora Rei, e SENOR di ehersitonan, i pa selebra e Fiesta di Tabernakelnan.

¹⁷I lo sosode ku kualke di e famianan di e tera ku no subi bai Jerusalem pa adora Rei, e SENOR di ehersitonan, awaseru lo no kai riba nan.

¹⁸I si e famia di Egipto no subi bai ni drenta, e ora ei awaseru lo no kai riba nan; esaki lo ta e plaga ku kual SENOR lo afligi e nashonnan ku no ta bai pa selebra e Fiesta di Tabernakelnan.

¹⁹Esaki lo ta e kastigu di Egipto, i e kastigu di tur e nashonnan ku no ta bai pa selebra e Fiesta di Tabernakelnan.

²⁰Den e dia ei "SANTU PA SENOR" lo ta graba riba e belnan di e kabainan. I e weanan pa kushina den e kas di SENOR lo ta manera e komchinan dilanti di e altar.

²¹I tur wea pa kushina na Jerusalem i na Juda lo ta santu pa e SENOR di ehersitonan. I tur hende ku ta hasi sakrifisio lo bin tuma algun di e weanan i kushina den nan. I den e dia ei lo no tin ningun kananeo mas den e kas di e SENOR di ehersitonan.