Read Papantla Totonac Zakarias 2 Bible Online

Zakarias 2 - Papantla Totonac bible

Zakarias 2

¹E ora ei mi a hisa mi kara wak, i mira, tabatin un homber ku un lina-di-midi den su man.

²I mi a bisa: "Unda bo ta bai?" I el a bisami: "Mi ta bai midi Jerusalem, pa mira kon hanchu e ta i kon largu e ta."

³I mira, e angel ku tabata papia ku mi a bai, i un otro angel a bin kontr'e,

⁴i a bis'e: "Kore, papia ku e hoben ei, i bisa: 'Jerusalem lo wordu habita sin muraya, pa motibu di e multitut di hende i bestia di kria ku tin den dje.

⁵Pasobra Ami,' SENOR ta deklara, 'lo ta un muraya di kandela ront di dje, i Ami lo ta e gloria meimei di dje.'"

⁶"Lanta! Hui for di e tera di nort," SENOR ta deklara, "pasobra Mi a plama boso manera e kuater bientunan di e shelunan," SENOR ta deklara.

⁷"Lanta, Sion! Skapa, abo ku ta biba serka e yu muhe di Babilonia."

⁸Pasobra asina e SENOR di ehersitonan ta bisa: "Despues di gloria El a mandami kontra e nashonnan ku ta plunder boso, pasobra esun ku mishi ku boso ta mishi ku Su pret'i wowo.

⁹Pasobra mira, lo Mi lanta Mi man kontra nan, asina ku nan lo bira plunder pa nan esklabunan. E ora ei boso lo sa ku ta e SENOR di ehersitonan a mandaMi.

¹⁰"Kanta ku alegria i sea kontentu, O yu muhe di Sion; pasobra mira, Mi ta bin i lo Mi biba meimei di boso," SENOR ta deklara.

¹¹"I hopi nashon lo uni nan mes ku SENOR den e dia ei i lo bira Mi pueblo. E ora ei lo Mi biba meimei di boso, i boso lo sa ku e SENOR di ehersitonan a mandaMi serka boso.

¹²I SENOR lo tuma Juda komo Su porshon den e tera santu, i lo bolbe skohe Jerusalem.

¹³Keda ketu tur hende, dilanti di SENOR; pasobra El a lanta for di Su habitashon santu."