Read Papantla Totonac Zakarias 3 Bible Online

Zakarias 3 - Papantla Totonac bible

Zakarias 3

¹E ora ei el a mustrami sumosaserdote Josue para dilanti di e Angel di SENOR, i Satanas para na su man drechi pa akus'e.

²I SENOR a bisa Satanas: "SENOR reprendebo, Satanas! Di berdat, SENOR, Kende a skohe Jerusalem, ta reprendebo! No ta un pida palu saka for di kandela esaki ta?"

³Awor Josue tabatin pana sushi bisti i tabata para dilanti di e Angel.

⁴I El a papia ku esnan ku tabata para Su dilanti, bisando: "Kita e pananan sushi for di su kurpa." El a bolbe bis'e: "Mira, Mi a kita bo inikidat for di bo i lo Mi bistibo ku pana di fiesta."

⁵E ora ei mi a bisa: "Laga nan mara un tulban limpi na su kabes." Asina nan a mara un tulban limpi na su kabes i a bistie pana, mientras ku e Angel di SENOR tabata para einan.

⁶I e Angel di SENOR a spierta Josue, bisando:

⁷"Asina e SENOR di ehersitonan ta bisa: 'Si bo kana den Mi kamindanan i si bo hasi loke Mi ordenabo, e ora ei lo bo goberna Mi kas tambe i lo bo tin enkargo di Mi pationan tambe; i lo Mi dunabo entrada liber entre esnan ku ta para akinan.

⁸'Awor skucha, sumosaserdote Josue, abo i bo amigunan ku ta sinta bo dilanti--di berdat nan ta hombernan ku ta un simbolo, pasobra mira, Mi ta bai trese Mi Sirbido, e Rama.

⁹Pasobra mira e piedra ku Mi a pone dilanti di Josue; riba un piedra tin shete wowo. Mira, lo Mi graba un inskripshon riba dje,' e SENOR di ehersitonan ta deklara, 'i lo Mi kita e inikidat di e tera ei den un dia.

¹⁰'Den e dia ei,' e SENOR di ehersitonan ta deklara, 'kada un di boso lo invita su bisina pa sinta bou di su mata di wendruif i bou di su palu di figo.'"