Read Papantla Totonac Zakarias 5 Bible Online

Zakarias 5 - Papantla Totonac bible

Zakarias 5

¹Anto mi a hisa mi kara atrobe i a wak, i mira, tabatin un rol ku ta bula.

²I el a bisami: "Kiko bo ta mira?" I mi a kontesta: "Mi ta mira un rol ku ta bula; su largura ta binti kodo i su hanchura dies kodo."

³E ora ei el a bisami: "Esaki ta e maldishon ku ta sali bai riba superfisio di henter e tera; siguramente kada un ku horta lo wordu elimina konforme loke tin skirbi na esun banda, i kada un ku hasi huramentu falsu lo wordu elimina konforme loke tin skirbi na e otro banda.

⁴Lo Mi lagu'e sali bai," e SENOR di ehersitonan ta deklara, "i e lo drenta kas di e ladron i kas di esun ku ta hasi huramentu falsu den Mi nomber; i e lo pasa nochi den e kas ei i kaba kune, ku su palunan i su piedranan."

⁵Anto e angel ku tabata papia ku mi a sali i a bisami: "Awor hisa bo kara wak kiko e kos aki, ku ta sali bai, ta."

⁶I mi a bisa: "Kiko e ta?" I el a bisa: "Esaki ta e makutu-di-midi ku ta sali bai." El a bolbe bisa: "Esaki ta nan aparensia den henter e tera

⁷(i mira, un tapa di chumbu a wordu lanta); i esaki ta un muhe sinta den e makutu!"

⁸Anto el a bisa: "Esaki ta Maldat!" I el a tira e muhe abou meimei di e makutu, i a tira e peso di chumbu riba boka di e makutu.

⁹Anto mi a hisa mi kara wak, i mira, dos muhe tabata sali ku bientu den nan halanan; i nan tabatin hala manera hala di oyevar, i nan a hisa e makutu entre tera i shelu.

¹⁰I mi a bisa e angel ku tabata papia ku mi: "Unda nan ta hiba e makutu?"

¹¹Anto el a bisami: "Na tera di Sinar, pa traha un tempel pa e muhe ayanan; i ora ku e tempel ta prepara, e muhe lo wordu poni ayanan riba su mes pedestal."