Read Papantla Totonac Zakarias 6 Bible Online

Zakarias 6 - Papantla Totonac bible

Zakarias 6

¹Awor mi a hisa mi kara atrobe i a wak, i mira, kuater garoshi tabata sali for di meimei di e dos serunan; i e serunan tabata serunan di brons.

²E prome garoshi tabatin kabai kora, e di dos garoshi, kabai pretu,

³e di tres garoshi, kabai blanku, i e di kuater garoshi, kabai pinta i ku hopi forsa.

⁴Anto mi a papia i a bisa e angel ku tabata papia ku mi: "Kiko esakinan ta, mi senor?"

⁵I e angel a kontesta i a bisami: "Esakinan ta e kuater spiritunan di shelu, ku ta sali bai despues di a para dilanti di e Senor di henter tera.

⁶Esun ku tin e kabainan pretu ta sali bai pa e tera di nort, i esnan blanku ta sali bai tras di nan, mientras ku esnan pinta ta sali bai pa e tera di suit.

⁷"Ora ku esnan fuerte a sali bai, nan tabata pura pa bai patruya tera." I El a bisa: "Bai, patruya tera." Asina nan a patruya tera.

⁸Anto El a yamami i a papia ku mi, bisando: "Mira, esnan ku ta bai pa e tera di nort a kalma Mi furia den e tera di nort."

⁹Tambe e palabra di SENOR a yega na mi, bisando:

¹⁰"Tuma un ofrenda for di e eksiliadonan for di Heldai, Tobias i Jedaias; i abo bai e mesun dia i drenta den e kas di Josias, yu homber di Sofonias, kaminda nan a bolbe for di Babilonia.

¹¹I kohe plata i oro, traha un korona i pon'e riba kabes di Josue, yu homber di sumosaserdote Josadak.

¹²Anto bis'e: 'Asina e SENOR di ehersitonan ta bisa: "Mira, un Homber, Kende Su nomber ta Rama, pasobra E lo spreit for di kaminda ku E ta; i E lo traha e tempel di SENOR.

¹³Si, ta E ta Esun ku lo traha e tempel di SENOR, i ta E lo risibi e onor i lo sinta i goberna riba Su trono. Asina E lo ta un saserdote riba Su trono, i e konseho di pas lo ta meimei di e dos puestonan."'

¹⁴Awor e korona lo bira un rekordatorio den e tempel di SENOR pa Helem, Tobias i Jedaias, i Hen, yu homber di Sofonias.

¹⁵I esnan ku ta biba leu lo bin i traha e tempel di SENOR." E ora ei boso lo sa ku e SENOR di ehersitonan a mandami serka boso. I esaki lo sosode si boso obedese SENOR boso Dios kompletamente.