Read Papantla Totonac Zakarias 7 Bible Online

Zakarias 7 - Papantla Totonac bible

Zakarias 7

¹Anto a sosode ku den e di kuater ana di rei Dario, e palabra di SENOR a yega na Zakarias riba e di kuater dia di e di nuebe luna, ku ta Kisleu,

²tempu ku e stat di Bet-el a manda Sarezer i Regem-melek i nan hombernan pa buska e fabor di SENOR,

³i pa papia ku e saserdotenan ku ta pertenese na e kas di e SENOR di ehersitonan, i ku e profetanan, bisando: "Mi mester yora den e di sinku luna i yuna, manera mi a hasi durante di tur e ananan aki?"

⁴E ora ei e palabra di e SENOR di ehersitonan a yega na mi, bisando:

⁵"Bisa henter pueblo di e tera i e saserdotenan: 'Ora boso a yuna i a lamenta den e di sinku i e di shete luna, di berdat ta pa Mi boso a yuna tur e setenta ananan aki?

⁶I ora boso ta kome i bebe, no ta pa boso mes boso ta kome i no ta pa boso mes boso ta bebe?

⁷Esakinan no ta e palabranan ku SENOR a proklama pa medio di e profetanan di prome aya, tempu ku Jerusalem tabata habita i tabata prospera ku su statnan tur ront di dje, i ku Negev i e sabananan na pia di seru tabata habita?'"

⁸E ora ei e palabra di SENOR a yega na Zakarias, bisando:

⁹"Asina e SENOR di ehersitonan a bisa: 'Atministra hustisia berdadero, i kada un mustra karino i kompashon na su ruman,

¹⁰i no oprimi e biuda ni e werfano, e stranhero ni e hende pober; i no plania maldat den boso kurason kontra otro.'

¹¹"Ma nan a nenga di paga atenshon, i ku kapricho nan a bira lomba i a tapa nan orea pa nan no tende.

¹²I nan a hasi nan kurason manera piedra, asina ku nan no por a tende e lei i e palabranan ku e SENOR di ehersitonan a manda pa medio di Su Spiritu, dor di e profetanan di prome aya; pesei gran furia a bin for di e SENOR di ehersitonan.

¹³"I a sosode ku meskos ku El a yama i nan no kier a skucha, asina nan a yama i Ami no kier a skucha," e SENOR di ehersitonan ta bisa;

¹⁴"ma ku un warwaru Mi a plama nan meimei di tur e nashonnan ku nan no tabata konose. Asina e tera a keda desola tras di nan, asina ku ningun hende no tabata bai-bin den dje, pasobra nan a hasi e tera agradabel keda desola."