Read Papantla Totonac Zakarias 8 Bible Online

Zakarias 8 - Papantla Totonac bible

Zakarias 8

¹E ora ei e palabra di e SENOR di ehersitonan a bin, bisando:

²"Asina e SENOR di ehersitonan ta bisa: 'Mi ta masha yalurs pa Sion, si, ku gran furia Mi ta yalurs p'e.'

³"Asina SENOR ta bisa: 'Lo Mi bolbe na Sion i lo Mi biba meimei di Jerusalem. E ora ei Jerusalem lo wordu yama Stat di Berdat, i e seru di e SENOR di ehersitonan lo wordu yama Seru Santu.'

⁴"Asina e SENOR di ehersitonan ta bisa: 'Homber i muhe di edat lo sinta atrobe den e kayanan di Jerusalem, kada homber ku su garoti den su man pa motibu di edat.

⁵I e kayanan di e stat lo ta yen di mucha homber i mucha muhe ku ta hunga den su kayanan.'

⁶"Asina e SENOR di ehersitonan ta bisa: 'Si esaki ta muchu maraviyoso den bista di e restante di e pueblo aki den e dianan ei, esaki lo ta muchu maraviyoso den Mi bista tambe?' e SENOR di ehersitonan ta deklara.

⁷"Asina e SENOR di ehersitonan ta bisa: 'Mira, Mi ta bai salba Mi pueblo for di e tera di pariba i for di e tera di pabou;

⁸i lo Mi trese nan bek, i nan lo biba meimei di Jerusalem, i nan lo ta Mi pueblo, i Ami lo ta nan Dios den berdat i hustisia.'

⁹"Asina e SENOR di ehersitonan ta bisa: 'Laga boso mannan ta fuerte, boso ku den e dianan aki ta skucha e palabranan aki for di boka di e profetanan, kendenan a papia dia ku fundeshi di e kas di e SENOR di ehersitonan a wordu poni, di moda ku e tempel por a wordu traha.

¹⁰Pasobra prome ku e dianan ei no tabatin sueldo pa hende ni pa bestia; i pa esun ku a sali of ku a drenta no tabatin pas, pa motibu di su enemigunan; i Mi a pone tur hende un kontra otro.

¹¹Ma awor lo Mi no trata e restante di e pueblo aki manera den e dianan di prome aya,' e SENOR di ehersitonan ta deklara.

¹²'Pasobra lo tin pas pa e simia: e mata di wendruif lo duna su fruta, e tera lo duna su produkto, i e shelunan lo duna nan serena; i lo Mi hasi e restante di e pueblo aki ereda tur e kosnan aki.

¹³I lo sosode ku meskos ku boso tabata un maldishon entre e nashonnan, O kas di Juda i kas di Israel, asina lo Mi salba boso pa boso bira un bendishon. No tene miedu; laga boso mannan ta fuerte.'

¹⁴"Pasobra asina e SENOR di ehersitonan ta bisa: 'Meskos ku Mi a determina pa hasi dano na boso, tempu ku boso tatanan a probokaMi na furia,' e SENOR di ehersitonan ta bisa, 'i Mi no a repenti,

¹⁵asina Mi ta determina atrobe den e dianan aki pa hasi bon na Jerusalem i na e kas di Juda. No tene miedu!

¹⁶Esakinan ta e kosnan ku boso mester hasi: papia berdat un ku otro; atministra huisio, berdat i pas den boso portanan di stat.

¹⁷No laga ningun di boso plania maldat kontra otro den boso kurason, i no stima huramentu falsu; pasobra tur esakinan ta kosnan ku Mi ta odia,' SENOR ta deklara."

¹⁸E ora ei e palabra di e SENOR di ehersitonan a yega na mi, bisando:

¹⁹"Asina e SENOR di ehersitonan ta bisa: 'E yunamentu di e di kuater luna, e yunamentu di e di sinku luna, e yunamentu di e di shete luna, i e yunamentu di e di dies luna lo bira goso, alegria i fiestanan kontentu pa e kas di Juda; pesei, stima berdat i pas.'

²⁰"Asina e SENOR di ehersitonan ta bisa: 'Lo sosode ku pueblonan lo bin, si, e habitantenan di hopi stat.

²¹I e habitantenan di esun stat lo bai na e otro, i lo bisa: "Laga nos bai mesora pa pidi e fabor di SENOR, i pa buska e SENOR di ehersitonan; ami tambe lo bai."

²²Asina hopi pueblo i nashonnan poderoso lo bin pa buska e SENOR di ehersitonan na Jerusalem, i pa pidi e fabor di SENOR.'

²³"Asina e SENOR di ehersitonan ta bisa: 'Den e dianan ei dies homber for di tur e nashonnan lo kohe bisti di un hudiu tene, bisando: "Laga nos bai ku boso, pasobra nos a tende ku Dios ta ku boso.