Read Papantla Totonac Zakarias 9 Bible Online

Zakarias 9 - Papantla Totonac bible

Zakarias 9

¹E karga di e palabra di SENOR ta kontra tera di Hadrak, ku Damasko komo su luga di sosiegu (pasobra wowo di hende, spesialmente di tur e tribunan di Israel, ta riba SENOR),

²i tambe kontra Hamat, ku ta keda pega kune; i kontra Tiro i Sidon, maske nan ta hopi sabi.

³Pasobra Tiro a traha un forti pa su mes i a montona plata manera stof, i oro manera lodo di kaya.

⁴Mira, Senor lo kita tur su propiedat for di dje i tira su rikesa den laman; i kandela lo kaba kune.

⁵Askalon lo mira esaki i hana miedu, Gaza tambe lo trose di dolo; Ekron tambe, pasobra su speransa a wordu konfundi. Ademas, e rei lo perese for di Gaza, i Askalon lo no ta habita.

⁶I un rasa meskla lo biba na Asdod, i lo Mi korta kita e orguyo di e filisteonan afo.

⁷I lo Mi kita nan sanger for di nan boka, i nan abominashonnan for di meimei di nan djentenan. E ora ei nan tambe lo ta un restante pa nos Dios. I nan lo ta manera un tribu na Juda, i Ekron manera un jebuseo.

⁸Ma lo Mi kampa ront di Mi kas pa motibu di un ehersito, pa motibu di esun ku ta pasa bai i ta bolbe; i ningun opresor lo no pasa riba nan mas, pasobra awor Mi a mira ku Mi mes wowo.

⁹Regosiha grandemente, O yu muhe di Sion! Grita ku hubilo, O yu muhe di Jerusalem! Ata bo Rei ta bin serka bo; E ta hustu i ta trese salbashon, umilde i sinta riba un buriku, riba un buriku yon, yu di un buriku muhe.

¹⁰I lo Mi korta kita e garoshi for di Efrain, i e kabai for di Jerusalem; i e bog di guera lo wordu korta kita afo. I E lo proklama pas na e nashonnan; i Su dominio lo ta di laman pa laman, i di Riu Eufrates pa e finnan di tera.

¹¹Pa loke t'abo tambe, pa motibu di e sanger di Mi aliansa ku bo, Mi a libra bo prezonan for di e pos sin awa.

¹²Bolbe na e luga fortifika, O prezonan ku tin speransa; awe mes Mi ta deklara ku lo Mi debolbe dobel na boso.

¹³Pasobra lo Mi dobla Juda manera Mi bog, lo Mi yena e bog ku Efrain. I lo Mi lanta bo yu hombernan, O Sion, kontra bo yu hombernan, O Gresia; i lo Mi hasibo manera e spada di un guerero.

¹⁴E ora ei SENOR lo parese riba nan, i Su flecha lo sali manera lamper; i Senor DIOS lo toka trompet, i lo marcha bai ku warwarunan di suit.

¹⁵E SENOR di ehersitonan lo defende nan. I nan lo devora, i trapa riba e piedranan di slenger; i nan lo bebe i hasi beheit manera hende ku a bebe bina; i nan lo ta yen manera un komchi di sakrifisio, papa muha manera e skinanan di e altar.

¹⁶I SENOR nan Dios lo salba nan den e dia ei, manera e tou di Su pueblo; pasobra nan ta manera e piedranan di un korona ku ta briya den Su tera.

¹⁷Pasobra kon atraktivo i bunita nan lo ta! Trigo lo hasi e hobennan florese, i bina nobo e birgennan.