Read Papantla Totonac Malakias 1 Bible Online

Malakias 1 - Papantla Totonac bible

Malakias 1

¹E profesia di e palabra di SENOR, na Israel pa medio di Malakias.

²"Mi a stima boso," SENOR ta bisa. Ma boso ta bisa: "Kon Bo a stima nos?" "Esau no tabata Jakob su ruman?" SENOR ta deklara. "Tog Mi a stima Jakob;

³ma Esau Mi a odia, i Mi a hasi su serunan un desolashon, i a laga su erensia pa e chakalnan di desierto."

⁴Maske ku Edom bisa: "Nos a wordu bati tira abou, ma nos lo bolbe i restora e ruinanan", asina e SENOR di ehersitonan ta bisa: "Nan por restora, ma Ami lo bash'abou; i hende lo yama nan e teritorio di maldat i e pueblo ku SENOR ta indigna pa semper kontra dje."

⁵I boso wowonan lo mira esaki i boso lo bisa: "Ku SENOR sea engrandesi te mas aya di e frontera di Israel!"

⁶"Un yu homber ta onra su tata, i un sirbido su shon. Anto si Mi ta un tata, unda e onor pa Mi ta? I si Mi ta un shon, unda e respet pa Mi ta?" e SENOR di ehersitonan ta bisa boso, O saserdotenan ku ta despresia Mi nomber. "Ma boso ta bisa: 'Kon nos a despresia Bo nomber?'

⁷"Boso ta ofrese kuminda impuru riba Mi altar. "Ma boso ta bisa: 'Kon nos a profanaBo?' "Dor ku boso ta bisa: 'E mesa di SENOR ta despresiabel.'

⁸Ma ora boso ta ofrese bestia siegu komo sakrifisio, esei no ta maldat? I ora boso ta ofrese bestia lam of malu, esei no ta maldat? Pakiko bo no ta ofrese bo gobernado esei? E lo keda kontentu ku bo? Of e lo risibibo ku karino?" e SENOR di ehersitonan ta bisa.

⁹"Ma awor, pidi e fabor di Dios pa E por tin kompashon ku nos. Ku un ofrenda asina di boso parti, lo E risibi boso ku karino?" e SENOR di ehersitonan ta bisa.

¹⁰"Mara tabatin maske ta un meimei di boso ku lo a sera e portanan, pa boso no sende kandela riba Mi altar pornada! Mi no ta kontentu ku boso," e SENOR di ehersitonan ta bisa, "ni lo Mi no asepta un ofrenda for di boso man.

¹¹Pasobra for di ora solo sali te ora ku e drenta, Mi nomber lo ta grandi meimei di e nashonnan, i tur kaminda sensia lo wordu ofresi na Mi nomber, i un ofrenda di mainshi ku ta puru; pasobra Mi nomber lo ta grandi meimei di e nashonnan," e SENOR di ehersitonan ta bisa.

¹²"Ma boso ta profan'e dor di bisa: 'E mesa di SENOR ta impuru, i su fruta, su kuminda, ta despresiabel.'

¹³Tambe boso ta bisa: 'Ai, esta un kansansio!' I boso ta trek kara ku despresio," e SENOR di ehersitonan ta bisa. "I boso ta trese loke a wordu horta, i loke ta lam of malu; asina boso ta trese e ofrenda! Mi mester asepta esei for di boso man?" SENOR ta bisa.

¹⁴"Ma maldishona sea e ladron ku tin un chubatu den su tou di bestia chikitu, i ta priminti esaki, ma ta sakrifika un bestia ku defekto na Senor--pasobra Ami ta un gran Rei," e SENOR di ehersitonan ta bisa, "i e nashonnan tin temor di Mi nomber."