Read Papantla Totonac Malakias 2 Bible Online

Malakias 2 - Papantla Totonac bible

Malakias 2

¹"I awor, O saserdotenan, e mandamentu aki ta pa boso.

²Si boso no skucha, i si boso no disidi den boso kurason pa onra Mi nomber," e SENOR di ehersitonan ta bisa, "e ora ei lo Mi manda un maldishon riba boso, i lo Mi maldishona boso bendishonnan; i di berdat, Mi a maldishona nan kaba, pasobra boso no a disidi den boso kurason.

³"Mira, Mi ta bai reprende boso desendensia, i lo Mi hunta boso kara ku mest, e mest di boso fiestanan; i boso lo wordu tira afo huntu kune.

⁴E ora ei boso lo sa ku Ami a manda e mandamentu aki pa boso, pa Mi aliansa ku Levi por kontinua," e SENOR di ehersitonan ta bisa.

⁵"Mi aliansa kune tabata un aliansa di bida i pas, i Mi a dun'e nan pa e por tin temor di Mi; asina e tabatin temor di Mi i tabatin reverensia pa Mi nomber.

⁶Tabatin instrukshon berdadero den su boka, i inhustisia no a wordu hana riba su lepnan; el a kana ku Mi den pas i rektitut, i el a hasi hopi bolbe for di inikidat.

⁷"Pasobra e lepnan di un saserdote mester preserva konosementu, i hende mester buska instrukshon for di su boka; pasobra e ta e mensahero di e SENOR di ehersitonan.

⁸Ma pa loke ta boso, boso a desvia for di e kaminda; boso a hasi hopi hende trompeka pa medio di boso sinansa den e lei; boso a korumpi e aliansa di Levi," e SENOR di ehersitonan ta bisa.

⁹"Asina Ami tambe a hasi boso despresia i umiya dilanti di henter e pueblo, meskos ku boso no ta sigui Mi kamindanan, ma ta mustra distinshon di persona den asuntonan di lei.

¹⁰"Nos tur no tin un tata? No ta un Dios a krea nos? Pakiko kada un di nos ta trata su ruman ku traishon i ta profana e aliansa di nos tatanan?

¹¹"Juda a trata ku traishon, i un abominashon a wordu hasi na Israel i na Jerusalem; pasobra Juda a profana e santuario di SENOR ku E ta stima, i a kasa ku yu muhe di un dios strano.

¹²I pa loke ta e homber ku ta hasi esaki, ku SENOR korta kita for di e tentnan di Jakob tur esnan ku ta lanta i kontesta, of ku ta presenta un ofrenda na e SENOR di ehersitonan.

¹³"I esaki ta un otro kos ku boso ta hasi: boso ta tapa e altar di SENOR ku lagrima, ku yoramentu i ku kehamentu, pasobra E no kier mira e ofrenda mas, ni asept'e ku gustu for di boso man.

¹⁴Tog boso ta bisa: 'Pa ki motibu?' Pasobra SENOR tabata testigu entre abo i e esposa di bo hubentut, kontra kende bo a trata ku traishon, maske ku e ta bo kompanera i bo esposa pa medio di aliansa.

¹⁵"No t'asina ku El a hasi nan un, ku un restante di e Spiritu den nan? I pakiko un? E ta buska un desendensia deboto. Pesei, paga tino na boso spiritu, i no laga ningun hende trata e esposa di su hubentut ku traishon.

¹⁶"Pasobra Mi ta odia diborsio," SENOR, e Dios di Israel, ta bisa, "i esun ku ta tapa su pana ku violensia," e SENOR di ehersitonan ta bisa. "Pesei, pone atenshon na boso spiritu, pa boso no trata ku traishon."

¹⁷Boso a kansa SENOR ku boso palabranan. Tog boso ta bisa: "Kon nos a kans'E?" Dor ku boso ta bisa: "Tur hende ku hasi maldat ta bon den bista di SENOR, i E tin delisia den nan," of, "Unda e Dios di hustisia ta?"