Read Papantla Totonac Malakias 3 Bible Online

Malakias 3 - Papantla Totonac bible

Malakias 3

¹"Mira, Mi ta bai manda Mi mensahero, i e lo prepara e kaminda Mi dilanti. I e Senor, Kende boso ta buska, direpiente lo bin na Su tempel; i e Mensahero di e aliansa, den Kende boso tin delisia, at'E ta bin," e SENOR di ehersitonan ta bisa.

²"Ma ken por soporta e dia di Su binida? I ken por para ora ku E parese? Pasobra E ta manera kandela di un refinado i manera habon di un labado di pana.

³I E lo sinta manera un refinado i purifikado di plata, i E lo purifika e yu hombernan di Levi i refina nan manera oro i plata, pa nan por presenta na SENOR ofrendanan den hustisia.

⁴E ora ei e ofrenda di Juda i Jerusalem lo ta agradabel na SENOR, manera den e dianan di prome aya i manera den ananan pasa.

⁵"E ora ei lo Mi hala serka boso pa huisio; i lo Mi ta lihe pa testifika kontra e hasidonan di bruha, kontra e kibradonan di matrimonio, kontra esnan ku ta hura falsu i kontra esnan ku ta defrouda e trahado den su sueldo, ku ta oprimi biuda i werfano, i kontra esnan ku ta nenga yudansa na stranhero, i ku no tin temor di Mi," e SENOR di ehersitonan ta bisa.

⁶"Pasobra Ami, SENOR, no ta kambia; pesei boso, O yu hombernan di Jakob, no a wordu destrui.

⁷For di e dianan di boso tatanan boso a bandona Mi statutonan, i no a warda nan. Bolbe serka Mi, i lo Mi bolbe serka boso," e SENOR di ehersitonan ta bisa. "Ma boso ta bisa: 'Kon nos mester bolbe?'

⁸"Hende lo horta Dios? Tog boso ta hortaMi! "Ma boso ta bisa: 'Kon nos a hortaBo?' "Ku diesmo i ku ofrenda.

⁹Boso ta maldishona ku un maldishon, pasobra boso ta hortaMi, henter e nashon aki!

¹⁰Trese henter e diesmo den mangasina, pa por tin kuminda den Mi kas, i poneMi na prueba awor den esaki," e SENOR di ehersitonan ta bisa, "si Mi lo no habri pa boso e bentananan di shelu, i basha asina tantu bendishon, ku boso lo no tin sufisiente luga pa konten'e.

¹¹E ora ei lo Mi reprende e devorado pa boso, pa e no destrui e frutanan di tera; tampoko boso mata di wendruif den kunuku lo no laga su druifnan kai prome ku su tempu," e SENOR di ehersitonan ta bisa.

¹²"I tur e nashonnan lo yama boso bendishona, pasobra boso lo ta un tera agradabel," e SENOR di ehersitonan ta bisa.

¹³"Boso palabranan tabata arogante kontra Mi," SENOR ta bisa. "Tog boso ta bisa: 'Kiko nos a papia kontra Bo?'

¹⁴"Boso a bisa: 'Ta en bano nos ta sirbi Dios; i di ki probecho esaki ta ku nos a warda Su ordenansanan, i ku nos a kana na rou dilanti di e SENOR di ehersitonan?

¹⁵Pesei awor nos ta yama e hendenan arogante, bendishona; no solamente t'asina ku e hasidonan di maldat ta prospera, ma tambe nan ta pone Dios na prueba i ta skapa.'"

¹⁶E ora ei esnan ku a teme SENOR a papia ku otro, i SENOR a presta atenshon i a tende esaki, i un buki di memoria a wordu skirbi Su dilanti pa esnan ku ta teme SENOR i ku ta onra Su nomber.

¹⁷"I nan lo ta di Mi," e SENOR di ehersitonan ta bisa, "riba e dia ku Mi ta prepara Mi mes propiedat, i lo Mi spar nan manera un homber ta spar su mes yu homber ku ta sirbie."

¹⁸Asina boso lo distingui atrobe entre e hustu i e malbado, entre un ku ta sirbi Dios i un ku no ta sirbié.