Read Papantla Totonac Mateo 1 Bible Online

Mateo 1 - Papantla Totonac bible

Mateo 1

¹E buki di genealogia di Jesu-Cristo, yu homber di David, yu homber di Abraham.

²Abraham a engendra Isaak; i Isaak a engendra Jakob; i Jakob a engendra Juda i su ruman hombernan;

³i ku Tamar Juda a engendra Fares i Zara; i Fares a engendra Esrom; i Esrom a engendra Aram;

⁴i Aram a engendra Aminadab; i Aminadab a engendra Nason; i Nason a engendra Salmon;

⁵i ku Rahab Salmon a engendra Boaz; i ku Ruth Boaz a engendra Obed; i Obed a engendra Isai;

⁶i Isai a engendra rei David. I David a engendra Salomon ku esun ku tabata esposa di Urias;

⁷i Salomon a engendra Roboam; i Roboam a engendra Abias; i Abias a engendra Asa;

⁸i Asa a engendra Josafat; i Josafat a engendra Joram; i Joram a engendra Uzias;

⁹i Uzias a engendra Jotam; i Jotam a engendra Akaz; i Akaz a engendra Ezekias;

¹⁰i Ezekias a engendra Manases; i Manases a engendra Amon; i Amon a engendra Josias;

¹¹i Josias a engendra Jekonias i su ruman hombernan na e tempu di e deportashon pa Babilonia.

¹²I despues di e deportashon pa Babilonia, Jekonias a engendra Salatiel; i Salatiel a engendra Zorobabel;

¹³i Zorobabel a engendra Abiud; i Abiud a engendra Eliakim; i Eliakim a engendra Azor;

¹⁴i Azor a engendra Sadok; i Sadok a engendra Akim; i Akim a engendra Eliud;

¹⁵i Eliud a engendra Eleazar; i Eleazar a engendra Matan; i Matan a engendra Jakob;

¹⁶i Jakob a engendra Jose, esposo di Maria, for di kende Jesus a nase, i Kende ta wordu yama Cristo.

¹⁷Pesei tur e generashonnan for di Abraham te na David ta dieskuater generashon; i for di David te na e deportashon pa Babilonia, dieskuater generashon; i for di e deportashon pa Babilonia te na Cristo, dieskuater generashon.

¹⁸Awor e nasementu di Jesu-Cristo tabata asin'aki. Tempu ku Su mama Maria tabata komprometi pa kasa ku Jose, prome ku nan a bai biba huntu, a sosode ku Maria tabata na estado di Spiritu Santu.

¹⁹I su esposo Jose, siendo un homber hustu ku no kier a pon'e na berguensa, a pensa di bandon'e na sekreto.

²⁰Ma mientras ku e tabata pensando esaki, ata, un angel di Senor a parese na dje den un sono, bisando: "Jose, yu di David, no tene miedu di tuma Maria komo bo esposa; pasobra loke a wordu konsebi den dje ta di Spiritu Santu.

²¹I e lo hana un Yu homber; i lo bo dun'E e nomber Jesus, pasobra ta E ta Esun ku lo salba Su pueblo di nan pikanan."

²²Awor tur esaki a sosode pa loke a wordu papia dor di Senor pa medio di e profeta por a keda kumpli, ora ku el a bisa:

²³"Ata, e birgen lo sali na estado, i lo hana un Yu homber, i nan lo dun'E e nomber Emanuel," ku tradusi ta nifika: "Dios ku nos."

²⁴I Jose a lanta for di sono i a hasi manera e angel di Senor a orden'e, i el a tuma Maria komo su esposa,

²⁵i no a tene relashon kune te ora ku el a duna lus na un Yu homber; i Jose a dun'E e nomber Jesus.