Read Papantla Totonac Mateo 10 Bible Online

Mateo 10 - Papantla Totonac bible

Mateo 10

¹I despues ku El a yama Su diesdos disipelnan serka djé, El a duna nan outoridat riba spiritunan impuru, pa saka nan afo, i pa kura tur sorto di enfermedat i tur sorto di malesa.

²Awor esakinan ta e nombernan di e diesdos apostelnan: Esun prome, Simon, kende ta wordu yama Pedro, ku su ruman Andres; i Santiago, yu homber di Zebedeo, ku su ruman Juan;

³Felipe i Bartolome; Tomas i Mateo, e publikano; Santiago, yu homber di Alfeo, i Tadeo;

⁴Simon e kananeo i Judas Iskariot, esun ku a traishon'E.

⁵E diesdosnan aki Jesus a manda despues ku El a duna nan instrukshon, bisando: "No kohe e kaminda di e paganonan i no drenta ningun stat di e samaritanonan;

⁶ma mas bien, bai serka e karnenan perdi di e kas di Israel.

⁷I segun ku boso ta bai, predika, bisando: 'E reino di shelu ta serka.'

⁸Kura hende malu, lanta hende for di morto, hasi leproso bira limpi, saka demono; pornada boso a risibi, pornada boso mester duna.

⁹No buska oro, ni plata, ni koper pa hiba den boso faha;

¹⁰ni saku pa biaha kune, ni dos tunika, ni sandalia, ni garoti; pasobra e trahado ta digno di su manteneshon.

¹¹"I den kualke stat of pueblito ku boso drenta, buska pa hana sa ta ken ta digno den dje, i keda einan te ora boso bai.

¹²I ora boso drenta e kas, salud'e.

¹³I si e kas ta digno, laga boso pas bin riba dje; ma si e no ta digno, laga boso pas bolbe serka boso.

¹⁴I ken ku keda sin risibi boso, ni paga tino na boso palabranan, ora boso sali bai for di e kas ei of e stat ei, sakudi e stof kita for di boso pia.

¹⁵Di berdat Mi ta bisa boso ku den e dia di huisio lo ta mas tolerabel pa tera di Sodoma i Gomora ku pa e stat ei.

¹⁶Mira, Mi ta manda boso manera karne meimei di lobo; pesei, sea kouteloso manera kolebra i inosente manera palomba.

¹⁷"Ma warda boso di hende, pasobra nan lo entrega boso na konsilio i suta boso den nan snoanan;

¹⁸tambe boso lo wordu hiba dilanti di gobernantenan i reinan pa Mi kousa, komo un testimonio pa nan i pa e paganonan.

¹⁹Ma ora nan entrega boso, no preokupa kon of kiko boso lo papia; pasobra na e ora ei lo wordu duna na boso kiko boso mester papia.

²⁰Pasobra no ta boso ta papia, ma ta e Spiritu di boso Tata ta papia den boso.

²¹"I ruman lo entrega ruman na morto, i un tata su yu; i yunan lo lanta kontra mayornan, i hasi ku nan lo wordu mata.

²²I tur hende lo odia boso pa kousa di Mi nomber, ma ta esun ku a persevera te na fin lo ta salba.

²³Ora nan persigui boso den e stat aki, hui bai na e otro; pasobra di berdat Mi ta bisa boso, boso lo no kaba di pasa dor di e statnan di Israel prome ku e Yu di Hende bin.

²⁴"Un disipel no ta mas ku su maestro, ni un esklabu no ta mas ku su shon.

²⁵Ta sufisiente pa e disipel bira manera su maestro, i pa e esklabu bira manera su shon. Si nan a yama e kabes di kas Beelzebu, anto kuantu mas e miembronan di su kas!

²⁶"Pesei, no tene miedu di nan, pasobra no tin nada tapa ku lo no wordu revela, i nada skondi ku hende lo no hana sa.

²⁷Loke Mi bisa boso den skuridat, papia esei den klaridat; i loke boso tende papia ketu-ketu den orea, proklama esei for di riba dak di kas.

²⁸I no tene miedu di esnan ku ta mata e kurpa, ma ku no por mata e alma; ma mas bien tene miedu di Esun ku por destrui tantu alma komo kurpa den fiernu.

²⁹Dos mofi no ta wordu bendi pa un sen? I ni un di nan lo no kai na suela si no ta e boluntat di boso Tata.

³⁰I asta e drachinan di kabei riba boso kabes, tur ta konta.

³¹Pesei, no tene miedu; boso bal mas ku un kantidat di mofi.

³²"Pesei, ken ku konfesaMi dilanti di hende, esei lo Mi konfesa tambe dilanti di Mi Tata ku ta den shelu.

³³Ma ken ku nengaMi dilanti di hende, esei Mi tambe lo nenga dilanti di Mi Tata ku ta den shelu.

³⁴"No kere ku Mi a bin pa trese pas riba mundu; Mi no a bin pa trese pas, sino spada.

³⁵Pasobra Mi a bin pa pone 'un homber kontra su tata, i un yu muhe kontra su mama, i un nuera kontra su suegra;

³⁶i un hende su enemigunan lo ta e miembronan di su mes kas.'

³⁷"Esun ku stima tata of mama mas ku Mi, no ta digno di Mi; i esun ku stima yu homber of yu muhe mas ku Mi, no ta digno di Mi.

³⁸I esun ku no hisa su krus i siguiMi, no ta digno di Mi.

³⁹Esun ku a hana su bida, lo perd'e, i esun ku a perde su bida pa Mi kousa, lo han'e.

⁴⁰"Esun ku risibi boso, ta Ami e ta risibi; i esun ku risibiMi, ta risibi Esun ku a mandaMi.

⁴¹Esun ku risibi un profeta den nomber di un profeta, lo risibi rekompensa di un profeta; i esun ku risibi un hende hustu den nomber di un hende hustu, lo risibi rekompensa di un hende hustu.

⁴²I esun ku, den nomber di un disipel, duna un di e chikitunan aki maske ta un glas di awa friu pa bebe, di berdat Mi ta bisa boso, e lo no perde su rekompensa."