Read Papantla Totonac Mateo 11 Bible Online

Mateo 11 - Papantla Totonac bible

Mateo 11

¹I a sosode ku ora Jesus a kaba di duna instrukshon na Su diesdos disipelnan, El a bai for di einan pa sina i predika den nan statnan.

²Awor ora Juan a tende den prizon di e obranan di Cristo, el a manda dos di su disipelnan,

³i a bis'E: "Ta Abo ta Esun ku mester bin, of nos mester spera un otro?"

⁴I Jesus a kontesta i a bisa nan: "Bai konta Juan loke boso ta tende i mira:

⁵e siegunan ta mira, e lamnan ta kana, e leprosonan ta wordu hasi limpi, i e sordonan ta tende, e mortonan ta wordu lanta i na e pobernan e evangelio ta wordu predika.

⁶I bendishona ta esun ku no ta sinti su mes ofendi pa Mi motibu."

⁷I mientras ku esakinan tabata kana bai, Jesus a kuminsa papia ku e multitutnan tokante di Juan: "Ta kiko boso a sali bai wak den desierto? Un richi sakudi dor di bientu?

⁸Ma ta kiko boso a sali bai wak? Un homber bisti na pana fini? Mira, esnan ku ta bisti pana fini ta den palasionan di rei.

⁹Ma ta pakiko boso a sali bai? Pa wak un profeta? Si, Mi ta bisa boso, i un ku ta mas ku un profeta.

¹⁰Esaki ta esun di kende ta para skirbi: 'Mira, Mi ta manda Mi mensahero dilanti di Bo kara, kende lo prepara Bo kaminda Bo dilanti.'

¹¹Di berdat Mi ta bisa boso, entre esnan ku a nase for di muhe no a lanta ningun otro mas grandi ku Juan Boutista; sinembargo, esun di mas chikitu den e reino di shelu ta mas grandi kune.

¹²I for di e dianan di Juan Boutista te awor e reino di shelu ta sufri violensia, i hendenan violento ta gar'e.

¹³Pasobra tur e profetanan i e Lei a profetisa te na Juan.

¹⁴I si boso kier asepta esaki, ta e mes ta Elias, kende mester a bin.

¹⁵Esun ku tin orea pa tende, lagu'e tende.

¹⁶"Ma ku kiko lo Mi kompara e generashon aki? E ta manera mucha chikitu ku ta sinta na marshe i ta grita otro,

¹⁷i ta bisa: 'Nos a toka fluit pa boso, i boso no a balia; nos a kanta un kantika di rou, i boso no a yora.'

¹⁸Pasobra Juan a bin i no tabata kome ni bebe, i nan ta bisa: 'E tin un demono!'

¹⁹E Yu di Hende a bin i tabata kome i bebe, i nan ta bisa: 'Ata un homber golos i un burache, un amigu di publikano i pekado!' Ma sabiduria ta wordu hustifika pa medio di su obranan."

²⁰E ora ei El a kuminsa reprende e statnan den kualnan mayoria di Su milagernan a wordu hasi, pasobra nan no a repenti:

²¹"Ai di bo, Korazin! Ai di bo, Betsaida! Pasobra si na Tiro i na Sidon a sosode e milagernan ku a sosode den boso, ya pa hopi tempu kaba nan lo a repenti den pana-di-saku i shinishi.

²²Ma Mi ta bisa boso, riba e dia di huisio lo ta mas tolerabel pa Tiro i Sidon ku pa boso.

²³I abo, Kapernaum, ta te na shelu bo kier wordu halsa? Te na fiernu lo bo baha; pasobra si e milagernan ku a sosode den bo lo a sosode na Sodoma, e lo a permanese te dia djawe.

²⁴Ma Mi ta bisa boso, riba e dia di huisio lo ta mas tolerabel pa tera di Sodoma ku pa bo."

²⁵E tempu ei Jesus a kontesta i a bisa: "Mi ta alabaBo, O Tata, Senor di shelu i tera, ku Bo a skonde e kosnan aki pa sabinan i inteligentenan i a revela nan na mucha chikitu.

²⁶Si, Tata, pasobra asina tabata agradabel den Bo bista.

²⁷"Tur kos a wordu entrega na Mi dor di Mi Tata; i ningun hende no konose e Yu, sino e Tata so; ni ningun hende no konose e Tata, sino e Yu so, i esun na kende e Yu kier revel'E.

²⁸"Bin serka Mi tur ku ta kansa i karga, i lo Mi duna boso sosiegu.

²⁹Tuma Mi yugo riba boso, i sina di Mi, pasobra Mi ta mansu i umilde di kurason; i boso lo hana sosiegu pa boso alma.

³⁰Pasobra Mi yugo ta suave i Mi karga ta lihe."