Read Papantla Totonac Mateo 12 Bible Online

Mateo 12 - Papantla Totonac bible

Mateo 12

¹E tempu ei Jesus tabata pasando dor di e kunukunan di mainshi riba dia di Sabat, i Su disipelnan a hana hamber i a kuminsa kita e tapushinan i kome nan.

²Ma ora ku e fariseonan a mira esaki, nan a bis'E: "Mira, Bo disipelnan ta hasi loke Lei no ta permiti pa hasi riba dia di Sabat."

³Ma El a bisa nan: "Boso no a lesa kiko David a hasi ora ku e ku esnan ku tabata huntu kune a hana hamber?

⁴Kon el a bai den e kas di Dios, i nan a kome e pan konsagra, loke ni e ni esnan ku tabata huntu kune no tabatin mag di kome, sino solamente e saserdotenan?

⁵Of boso no a lesa den Lei, ku riba dia di Sabat e saserdotenan ta profana Sabat den tempel, i tog nan ta inosente?

⁶Ma Ami ta bisa boso ku aki tin mas ku e tempel.

⁷Ma si boso tabata sa kiko esaki ta nifika: 'Mi ta desea miserikordia i no sakrifisio,' boso lo no a kondena e inosentenan.

⁸Pasobra e Yu di Hende ta Senor di Sabat."

⁹I El a sali for di einan i a bai den nan snoa.

¹⁰I mira, ayanan tabatin un homber, kende tabatin un man seku. I nan a hasié pregunta, bisando: "Lei ta permiti pa kura riba dia di Sabat?"--pa asina nan por a akus'E.

¹¹I El a bisa nan: "Kual di boso, si e tin un karne i esaki kai den pos riba dia di Sabat, lo no gar'e i sak'e afo?

¹²Awor, kuantu mas un hende bal kompara ku un karne! Asina anto, Lei ta permiti pa hasi bon riba dia di Sabat."

¹³E ora ei El a bisa e homber: "Rek bo man!" I e homber a rek su man, i su man a bira bon meskos ku e otro.

¹⁴Ma e fariseonan a sali bai, i a konsulta huntu kontra djé, kon nan lo por destruié.

¹⁵Ma Jesus, sabiendo esaki, a retira for di einan. I hopi hende tabata siguié, i El a kura nan tur,

¹⁶i a taha nan pa no laga sa ken E ta,

¹⁷pa asina loke a wordu papia dor di profeta Isaias por wordu kumpli, bisando:

¹⁸"Ata Mi Sirbido ku Mi a skohe, Mi Stima, den Kende Mi alma tin goso; lo Mi pone Mi Spiritu riba djé, i E lo proklama hustisia na e paganonan.

¹⁹E lo no pleita, ni halsa bos; i ningun hende lo no tende Su bos den e kayanan.

²⁰Un richi gekrak E lo no kibra, i un mecha ku ta sende flou E lo no paga, te ora ku E hiba hustisia na viktoria.

²¹I den Su nomber e paganonan lo spera."

²²E ora ei nan a trese serka djé un homber posei pa demono, kende tabata siegu i mudo, i El a kur'e, asina ku e homber mudo i siegu por a papia i mira.

²³I tur e multitutnan a keda strana i a bisa: "Por ta ku esaki ta e Yu di David?"

²⁴Ma ora ku e fariseonan a tende esaki, nan a bisa: "E homber aki ta saka demono solamente pa medio di Beelzebu, e prens di demononan."

²⁵Ma konosiendo nan pensamentunan, El a bisa nan: "Tur reino ku ta dividi kontra su mes ta keda ruina; i tur stat of kas ku ta dividi kontra su mes lo no keda para.

²⁶I si Satanas saka Satanas afo, e ta keda dividi kontra su mes; kon su reino lo keda para anto?

²⁷I si Ami ta saka demono pa medio di Beelzebu, ta pa medio di ken boso yu hombernan ta saka nan? Pesei eseinan lo ta boso huesnan.

²⁸Ma si Ami ta saka demono pa medio di e Spiritu di Dios, anto e reino di Dios a yega serka boso.

²⁹"Of kon un hende ta hasi drenta kas di e homber fuerte i horta su propiedat bai kune, si e no mara e homber fuerte prome? I e ora ei e lo plunder su kas.

³⁰"Esun ku no ta ku Mi ta kontra Mi; i esun ku no ta rekohe huntu ku Mi ta plama.

³¹Pesei Mi ta bisa boso, tur pika i blasfemia lo wordu pordona na hende, ma blasfemia kontra e Spiritu lo no wordu pordona.

³²I ken ku papia un palabra kontra e Yu di Hende, esei lo wordu pordona na dje; ma ken ku papia kontra Spiritu Santu, esei lo no wordu pordona na dje, ni den e siglo aki, ni den e siglo ku ta bin.

³³"Of hasi e palu bon i su fruta bon, of hasi e palu malu i su fruta malu, pasobra na su fruta bo ta konose e palu.

³⁴Boso, generashon di vibora, kon boso, siendo malu, por papia loke ta bon? Pasobra for di abundansia di kurason boka ta papia.

³⁵E bon hende, for di su bon tesoro, ta saka loke ta bon; i e mal hende, for di su mal tesoro, ta saka loke ta malu.

³⁶I Ami ta bisa boso, ku hende lo duna kuenta riba e dia di huisio di kada palabra bano ku nan papia.

³⁷Pasobra segun bo palabranan lo bo wordu hustifika, i segun bo palabranan lo bo wordu kondena."

³⁸E ora ei algun di e eskribanan i fariseonan a kontest'E, bisando: "Maestro, nos kier mira un senal for di Bo."

³⁹Ma El a kontesta i a bisa nan: "Un generashon malbado i adultero ta buska un senal; ma ningun senal lo no wordu duna na dje, sino solamente e senal di profeta Jonas;

⁴⁰pasobra meskos ku Jonas tabata tres dia i tres anochi den barika di e monster di laman, asina e Yu di Hende lo ta tres dia i tres anochi den kurason di tera.

⁴¹E hombernan di Ninive lo lanta den e huisio huntu ku e generashon aki, i lo konden'e, pasobra nan a repenti dor di e predikashi di Jonas; i mira, mas ku Jonas t'aki.

⁴²E Reina di Suit lo lanta den e huisio huntu ku e generashon aki i lo konden'e, pasobra el a bin for di e finnan di mundu pa tende e sabiduria di Salomon; i mira, mas ku Salomon t'aki.

⁴³"Awor ora ku e spiritu impuru sali for di un hende, e ta pasa dor di luganan seku, buskando sosiegu, i e no ta hana sosiegu.

⁴⁴E ora ei e ta bisa: 'Lo mi bolbe na mi kas for di kaminda mi a sali'; i ora ku e bin e ta hana e kas bashi, bari, i tur na ordu.

⁴⁵E ora ei e ta bai i ta hiba huntu kune shete otro spiritu mas malbado kune, i nan ta drenta paden i ta keda biba einan; i e ultimo estado di e hende ei ta bai bira pio ku esun prome. Asina lo ta tambe ku e generashon malbado aki."

⁴⁶Mientras ku E tabata papia ainda ku e multitutnan, ata Su mama i Su ruman hombernan tabata para pafo i tabata kier a papia kuné.

⁴⁷I un hende a bis'E: "Ata Bo mama i Bo ruman hombernan para pafo i nan kier papia ku Bo."

⁴⁸Ma El a kontesta esun ku tabata bis'E esei: "Ta ken ta Mi mama i ta ken ta Mi ruman hombernan?"

⁴⁹I mustrando ku Su man riba Su disipelnan, El a bisa: "Ata Mi mama i Mi ruman hombernan!

⁵⁰Pasobra ken ku hasi e boluntat di Mi Tata ku ta den shelu, esei ta Mi ruman homber i ruman muhe i mama."