Read Papantla Totonac Mateo 13 Bible Online

Mateo 13 - Papantla Totonac bible

Mateo 13

¹E dia ei Jesus a sali for di e kas i tabata sinta kantu di laman.

²I multitutnan grandi a bin para tur ront di djé, asina ku El a bai sinta den un boto, i henter e multitut a keda para kantu di laman.

³I El a papia hopi kos ku nan pa medio di parabola, bisando: "Mira, e sembrado a sali pa sembra.

⁴I segun ku e tabata sembra, algun simia a kai kantu di kaminda, i e parhanan a bin i a kome nan.

⁵I otronan a kai den luganan yen di piedra, kaminda no tabatin muchu tera; i nan a nase mesora, pasobra no tabatin tera hundu.

⁶Ma ora solo a sali, nan a kima; i pasobra nan no tabatin rais, nan a seka.

⁷I otronan a kai meimei di mata di sumpina, i e matanan di sumpina a krese i a hoga nan.

⁸I otronan a kai den bon tera i a duna kosecha; algun a duna shen, algun sesenta i algun trinta bes mas tantu.

⁹Esun ku tin orea, lagu'e tende."

¹⁰I e disipelnan a bin i a puntr'E: "Pakiko Bo ta papia ku nan pa medio di parabola?"

¹¹I El a kontesta i a bisa nan: "Pasobra na boso a wordu duna pa konose e misterionan di e reino di shelu, ma na nan esei no a wordu duna.

¹²Pasobra na ken ku tin, mas lo wordu duna, i e lo tin na abundansia; ma ken ku no tin, asta loke e tin lo wordu kita for di dje.

¹³Pesei Mi ta papia ku nan pa medio di parabola: 'Pasobra mirando, nan no ta mira, i tendiendo, nan no ta tende, ni nan no ta komprende.'

¹⁴I den nan kaso ta wordu kumpli e profesia di Isaias, kual ta bisa: 'Boso lo sigui tende, ma lo no komprende; i boso lo sigui mira, ma lo no ripara;

¹⁵pasobra kurason di e pueblo aki a bira insensitivo, i ku nan orea apenas nan ta tende, i nan a sera nan wowo, pa nan no mira ku nan wowo, i tende ku nan orea, i komprende ku nan kurason i komberti, i Ami kura nan.'

¹⁶Ma bendishona ta boso wowonan, pasobra nan ta mira; i boso oreanan, pasobra nan ta tende.

¹⁷Pasobra di berdat Mi ta bisa boso, ku hopi profeta i homber hustu a desea di mira loke boso ta mira, i nan no a mira; i di tende loke boso ta tende, i nan no a tende.

¹⁸"Boso tende anto e parabola di e sembrado.

¹⁹Si un hende tende e palabra di e reino i no komprende esaki, e malbado ta bin i ta ranka loke a wordu sembra den su kurason bai kune. Esaki ta esun ku simia a wordu sembra riba dje kantu di kaminda.

²⁰I esun ku simia a wordu sembra riba dje den luganan yen di piedra ta e hende ku ta tende e palabra i mesora ta risibie ku goso;

²¹sinembargo, e no tin rais den su mes, ma e ta temporario; i ora surgi aflikshon of persekushon pa kousa di e palabra, mesora e ta trompeka.

²²I esun ku simia a wordu sembra riba dje meimei di mata di sumpina ta e hende ku ta tende e palabra, i e preokupashonnan di e mundu aki i e engano di rikesa ta hoga e palabra, i e ta keda sin duna fruta.

²³Ma esun ku simia a wordu sembra riba dje den bon tera ta e hende ku ta tende e palabra i ta komprende, ku di berdat ta duna fruta tambe i ta produsi, algun shen bes, otro sesenta i otro trinta bes mas tantu."

²⁴El a konta nan un otro parabola, bisando: "E reino di shelu por wordu kompara ku un hende ku a sembra bon simia den su kunuku.

²⁵Ma mientras ku hende tabata drumi, su enemigu a bin, a sembra simia di yerba shimaron den e trigo i a kohe su kaminda bai.

²⁶I ora ku e trigo a spreit i a forma tapushi, e yerba shimaron tambe a keda bisto.

²⁷"I e esklabunan di e dono di kunuku a bin bis'e: 'Senor, no ta bon simia bo a sembra den bo kunuku? Di kon anto tin yerba shimaron aden?'

²⁸"I el a bisa nan: 'Ta un enemigu a hasi esaki!' "I e esklabunan a puntr'e: 'Bo kier anto pa nos bai i rekohe nan?'

²⁹"Ma el a kontesta: 'No, pa no sosode ku mientras boso ta rekohe e yerba shimaron, boso ranka e trigo tambe huntu kune.

³⁰Laga tur dos krese huntu te na kosecha; i na tempu di kosecha lo mi bisa e kosechadonan: "Rekohe e yerba shimaron prome i mara nan na boshi pa kima nan; ma rekohe e trigo warda den mi mangasina.

³¹El a konta nan un otro parabola, bisando: "E reino di shelu ta manera un simia di moster ku un homber a kohe i a sembra den su kunuku;

³²i esaki ta mas chikitu ku tur otro simia; ma ora ku e kaba di krese e ta mas grandi ku e matanan di hofi, i e ta bira un palu grandi, asina ku e parhanan di shelu ta bin traha neishi den su ramanan."

³³El a konta nan un otro parabola: "E reino di shelu ta manera zurdeg ku un muhe a kohe i a skonde den tres midi di harina, te ora ku esaki a bira kompletamente zur."

³⁴Tur e kosnan aki Jesus a papia ku e multitutnan pa medio di parabola, i E no a papia nada ku nan sin uza parabola,

³⁵pa por a keda kumpli loke a wordu anunsia dor di e profeta, kende a bisa: "Lo Mi habri Mi boka den parabola; lo Mi konta kosnan ku a keda skondi desde e fundashon di mundu."

³⁶E ora ei El a bai laga e multitutnan i a bai den e kas. I Su disipelnan a bin serka djé, bisando: "Splika nos e parabola di e yerba shimaron den e kunuku."

³⁷I El a kontesta i a bisa: "Esun ku ta sembra e bon simia ta e Yu di Hende,

³⁸i e kunuku ta e mundu; e bon simia ta e yunan di e reino, i e yerba shimaron ta e yunan di e malbado;

³⁹e enemigu ku a sembra nan ta diabel i e kosecha ta e fin di mundu; i e kosechadonan ta angelnan.

⁴⁰"Pesei, meskos ku e yerba shimaron ta wordu rekohi i kima den kandela, asina lo sosode na e fin di mundu.

⁴¹E Yu di Hende lo manda Su angelnan, i nan lo rekohe for di Su reino tur piedra di trompeka, i esnan ku ta hasi inikidat,

⁴²i lo tira nan den e fornu di kandela; den e luga ei lo tin yoramentu i mordementu riba djente.

⁴³E ora ei e hustunan lo briya manera solo den e reino di nan Tata. Esun ku tin orea, lagu'e tende.

⁴⁴"E reino di shelu ta manera un tesoro skondi den un kunuku, kual un hende a hana i a skonde; i yen di goso pa motibu di esei e ta bai i ta bende tur loke e tin, i ta kumpra e kunuku ei.

⁴⁵"Tambe e reino di shelu ta manera un komersiante ku ta buska perla bunita,

⁴⁶i ora ku el a hana un perla di gran balor el a bai i a bende tur loke e tabatin i a kumpr'e.

⁴⁷"Tambe e reino di shelu ta manera un reda tira den laman, ku ta kohe tur sorto di piska;

⁴⁸i ora ku e tabata yen, nan a hal'e trese na kantu, i nan a kai sint'abou i a rekohe e bon piskanan warda nan den bari, ma esnan malu nan a tira afo.

⁴⁹Asina lo ta na e fin di mundu; e angelnan lo bin i separa e malbadonan for di meimei di e hustunan,

⁵⁰i lo tira nan den e fornu di kandela. Lo tin yoramentu i mordementu riba djente.

⁵¹"Boso a komprende tur e kosnan aki?" Nan a bis'E: "Si."

⁵²I El a bisa nan: "Pesei tur eskriba ku bira disipel di e reino di shelu ta manera un kabes di kas, ku ta saka for di su tesoro kosnan nobo i bieu."

⁵³I a sosode ku ora Jesus a kaba di papia e parabolanan aki, El a bai for di einan.

⁵⁴I ora ku El a yega na Su mes stat, El a kuminsa sina nan den nan snoa, asina ku nan a keda asombra i a bisa: "For di unda e homber aki a hana e sabiduria aki i e podernan pa hasi milager?

⁵⁵No ta yu di e karpinte esaki ta? No ta Maria Su mama yama, i Su rumannan: Santiago, Jose, Simon i Judas?

⁵⁶I Su ruman muhenan tur no ta aki serka nos? For di unda anto e homber aki a hana tur e kosnan aki?"

⁵⁷I nan a sinti nan mes ofendi pa Su motibu. Ma Jesus a bisa nan: "Un profeta ta wordu onra tur parti, menos na su mes stat i den su mes kas."

⁵⁸I E no a hasi hopi milager einan pa motibu di nan inkredulidat.