Read Papantla Totonac Mateo 14 Bible Online

Mateo 14 - Papantla Totonac bible

Mateo 14

¹Na e tempu ei Herodes, e tetrarka, a tende e notisia tokante di Jesus,

²i el a bisa su sirbidonan: "Esaki ta Juan Boutista; el a lanta for di e mortonan, i ta pesei e podernan pa hasi milager ta obra den dje."

³Pasobra Herodes a aresta Juan, a mar'e i a pon'e den prizon pa motibu di Herodias, esposa di su ruman Felipe.

⁴Pasobra Juan tabata bis'e: "Lei no ta permiti pa bo tin e."

⁵I maske e tabata kier a mat'e, e tabatin miedu di e multitut, pasobra nan tabatin e pa un profeta.

⁶Ma ora nan tabata selebra e hasimentu di ana di Herodes, yu muhe di Herodias a balia dilanti di nan i a agrada Herodes.

⁷Pesei el a priminti bou di huramentu pa dun'e tur loke e pidi.

⁸I instiga pa su mama, el a bisa: "Dunami aki riba un teblachi e kabes di Juan Boutista."

⁹I maske a duel rei, tog el a duna ordu pa dun'e esaki, pa motibu di su huramentu i pa motibu di esnan ku tabata huntu kune na mesa.

¹⁰I el a duna ordu pa kap Juan su kabes afo den prizon.

¹¹I nan a trese su kabes riba un teblachi i a duna e mucha muhe esaki; i el a hib'e pa su mama.

¹²I su disipelnan a bin, a kohe e kurpa bai kune i a der'e; i nan a bai konta Jesus.

¹³Awor ora Jesus a tende esaki, El a retira for di e luga ei den un boto pa bai Su so na un luga solitario; i ora ku e multitutnan a tende esaki, nan a siguié na pia for di e statnan.

¹⁴I ora Jesus a baha for di e boto, El a mira un multitut grandi, i El a sinti kompashon pa nan i a kura nan enfermonan.

¹⁵I ora ku a bira tardi, e disipelnan a bin serka djé, bisando: "E luga aki ta desola i ya ta lat kaba; pesei, manda e multitutnan bai, pa nan por bai na e pueblitonan i kumpra kuminda pa nan mes."

¹⁶Ma Jesus a bisa nan: "Nan no tin mester di bai; boso duna nan algu di kome!"

¹⁷Ma nan a bis'E: "Ta sinku pan i dos piska so nos tin akinan."

¹⁸I El a bisa: "Trese nan aki pa Mi."

¹⁹I despues di a manda e multitutnan sint'abou riba e yerba, El a kohe e sinku pannan i e dos piskanan, i mirando ariba na shelu El a bendishona nan; i El a kibra e pannan i a duna nan na e disipelnan, i e disipelnan a duna e multitutnan,

²⁰i nan tur a kome keda barika yen. I nan a rekohe loke a sobra di e pida-pidanan, diesdos makutu yen.

²¹I esnan ku a kome tabata komo sinku mil hende homber, sin konta hende muhe i mucha.

²²I mesora Jesus a manda e disipelnan bai den e boto i bai Su dilanti na e otro banda, mientras ku E tabata manda e multitutnan bai.

²³I despues ku El a manda e multitutnan bai, E so a subi bai riba seru pa hasi orashon. I ora nochi a sera, E tabata Su so ayanan.

²⁴Ma e boto tabata meimei di laman kaba, i e olanan tabata sut'e, pasobra bientu tabata kontrario.

²⁵I den e di kuater warda di anochi Jesus a bin serka nan, kanando riba laman.

²⁶I ora ku e disipelnan a mir'E ta kana riba laman, nan a spanta, bisando: "Ta un spiritu!" I nan a grita di miedu.

²⁷Ma mesora Jesus a papia ku nan, bisando: "Tene kurashi, ta Ami; no tene miedu."

²⁸I Pedro a kontest'E, bisando: "Senor, si ta Abo, ordenami bin serka Bo riba awa."

²⁹I El a bisa: "Bin!" I Pedro a sali for di e boto, a kana riba awa i a bai serka Jesus.

³⁰Ma notando e bientu fuerte el a hana miedu, i ora ku el a kuminsa senk, el a grita, bisando: "Senor, salbami!"

³¹I mesora Jesus a saka Su man gar'e i a bis'e: "O abo, hende di poko fe, pakiko bo a duda?"

³²I ora nan a bai den e boto, bientu a stop di supla.

³³I esnan ku tabata den e boto a ador'E, bisando: "Di berdat Bo ta e Yu di Dios!"

³⁴I ora nan a krusa, nan a yega tera na Genesaret.

³⁵I ora ku e hombernan di e luga ei a rekonos'E, nan a manda notisia tur kaminda den e distrikto ei i a trese tur esnan ku tabata malu serka djé.

³⁶I nan a kuminsa rogu'E pa nan por a djis mishi ku zom di Su mantel; i tur esnan ku a mishi ku esaki a kura.