Read Papantla Totonac Mateo 15 Bible Online

Mateo 15 - Papantla Totonac bible

Mateo 15

¹E ora ei algun fariseo i eskriba a bin serka Jesus for di Jerusalem, bisando:

²"Pakiko Bo disipelnan ta kibra e tradishon di e ansianonan? Pasobra nan no ta laba man ora nan ta kome pan."

³I El a kontesta i a bisa nan: "I pakiko boso mes ta kibra e mandamentu di Dios pa motibu di boso tradishon?

⁴Pasobra Dios a bisa: 'Onra bo tata i bo mama'; i 'Esun ku maldishona tata of mama, lagu'e wordu mata.'

⁵Ma boso ta bisa: 'Ken ku bisa su tata of su mama: "Tur loke mi tin, ku mi por a yuda boso kune, a wordu duna na Dios,"

⁶no tin mester di onra su tata of su mama.' I asina boso a hasi e palabra di Dios bira inefektivo pa kousa di boso tradishon.

⁷Boso, hipokritnan, ku rason Isaias a profetisa di boso, bisando:

⁸'E pueblo aki ta onraMi ku nan lepnan, ma nan kurason ta leu for di Mi.

⁹I ta en bano nan ta adoraMi, sinando preseptonan di hende komo doktrina.'"

¹⁰I El a yama e multitut serka djé i a bisa nan: "Tende i komprende!

¹¹No ta loke ta bai den boka ta kontamina hende, ma loke ta sali for di boka, ta esei ta kontamina hende."

¹²E ora ei e disipelnan a bin i a bis'E: "Bo sa ku e fariseonan a sinti nan mes ofendi ora nan a tende e palabra aki?"

¹³Ma El a kontesta i a bisa: "Tur mata ku Mi Tata selestial no a planta lo wordu ranka ku rais ku tur.

¹⁴Laga nan numa; nan ta guiado siegu di e siegunan. I si siegu guia siegu, tur dos lo kai den buraku."

¹⁵I Pedro a kontesta i a bis'E: "Splika nos e parabola aki."

¹⁶I Jesus a bisa: "Boso tambe ainda ta sin komprendementu?

¹⁷Boso no ta komprende ku tur loke bai den boka ta baha bai den barika i ta wordu elimina?

¹⁸Ma e kosnan ku ta sali for di boka ta bin for di kurason, i ta esei ta kontamina hende.

¹⁹Pasobra for di kurason ta sali pensamentu malu, matamentu, adulterio, fornikashon, ladronisia, testimonio falsu, kalumnia.

²⁰Esakinan ta e kosnan ku ta kontamina hende; ma kome sin laba man no ta kontamina hende."

²¹I Jesus a bai for di einan, i a retira bai na e distrikto di Tiro i Sidon.

²²I ata un muhe kananeo a bin for di e region ei, i tabata grita, bisando: "Tene miserikordia di mi, O Senor, Yu di David. Mi yu muhe ta kruelmente posei pa demono."

²³Ma E no a kontest'e ni un palabra. I Su disipelnan a bin serka djé i a keda rogu'E, bisando: "Mand'e bai, pasobra e ta grita nos tras."

²⁴Ma El a kontesta i a bisa: "Ta serka e karnenan perdi di e kas di Israel so Mi a wordu manda."

²⁵Ma e muhe a bin i a buig te na suela Su dilanti, bisando: "Senor, yudami!"

²⁶I El a kontesta i a bisa: "No ta pas pa kohe pan di e yunan tir'e pa e kachonan."

²⁷Ma e muhe a bisa: "Si, Senor; ma asta e kachonan ta kome e garnachinan ku ta kai for di mesa di nan shon."

²⁸E ora ei Jesus a kontesta i a bis'e: "O muhe, bo fe ta grandi; laga sosode ku bo manera bo ta desea." I su yu muhe a kura mesora.

²⁹I saliendo for di einan, Jesus a pasa kantu di laman di Galilea, i El a subi bai riba seru i a kai sinta einan.

³⁰I multitutnan grandi a bin serka djé, i a trese huntu ku nan esnan ku tabata lam, mankaron, siegu, mudo, i hopi otronan, i nan tabata pone nan na Su pia; i E tabata kura nan,

³¹asina ku e multitut a keda atmira ora nan a mira e mudonan ta papia, e mankaronnan bon di salu, e lamnan ta kana i e siegunan ta mira; i nan a glorifika e Dios di Israel.

³²I Jesus a yama Su disipelnan serka djé i a bisa: "Mi tin kompashon di e multitut, pasobra ya ta tres dia kaba ku nan ta serka Mi, i nan no tin nada di kome; i Mi no kier manda nan bai ku hamber, pa nan no desmaya na kaminda."

³³I e disipelnan a bis'E: "Unda nos lo por hana asina tantu pan den un luga desola, pa duna un multitut asina grandi sufisiente di kome?"

³⁴I Jesus a puntra nan: "Kuantu pan boso tin?" I nan a kontesta: "Shete, i algun piska chikitu."

³⁵I El a manda e multitut sint'abou na suela;

³⁶i El a kohe e shete pannan i e piskanan, i despues ku El a gradisi, El a kibra nan i a kuminsa duna nan na e disipelnan, i e disipelnan a duna e multitutnan.

³⁷I nan tur a kome keda barika yen, i nan a rekohe loke a resta di e pida-pidanan, shete makutu grandi yen-yen.

³⁸I esnan ku a kome tabata kuater mil hende homber, sin konta hende muhe i mucha.

³⁹I despues di a manda e multitutnan bai, El a bai den e boto i a yega na e region di Magdala.