Read Papantla Totonac Mateo 16 Bible Online

Mateo 16 - Papantla Totonac bible

Mateo 16

¹I e fariseonan i saduseonan a bin, i pa pon'E na prueba nan a pidié pa mustra nan un senal for di shelu.

²Ma El a kontesta i a bisa nan: "Ora bira tardi boso ta bisa: 'Ta bai tin bon tempu, pasobra shelu ta kora.'

³I mainta: 'Awe ta bai tin mal tempu, pasobra shelu ta kora i tur tapa ku nubia skur.' Boso sa kon pa distingui e aspekto di shelu, ma boso no por distingui e senalnan di e tempunan?

⁴Un generashon malbado i adultero ta buska un senal; i ningun senal lo no wordu duna na dje, sino solamente e senal di Jonas." I El a bai laga nan.

⁵I e disipelnan a yega na e otro banda i nan a lubida di hiba pan.

⁶I Jesus a bisa nan: "Tene kuidou i warda boso di e zurdeg di e fariseonan i saduseonan."

⁷I nan a kuminsa diskuti nan ku nan, bisando: "Ta pasobra nos no a hiba pan."

⁸Ma Jesus, sabiendo esaki, a bisa nan: "Boso, hende di poko fe, pakiko boso ta diskuti un ku otro ku boso no tin pan?

⁹Ainda boso no ta komprende ni ta korda e sinku pannan pa e sinku milnan, i kuantu makutu boso a rekohe?

¹⁰Of e shete pannan pa e kuater milnan, i kuantu makutu grandi boso a rekohe?

¹¹Di kon boso no ta komprende ku no ta di pan Mi tabata papia? Ma warda boso di e zurdeg di e fariseonan i saduseonan."

¹²E ora ei nan a komprende ku E no a bisa pa nan warda nan mes di e zurdeg di pan, sino di e sinansa di e fariseonan i saduseonan.

¹³Awor ora Jesus a bin den e distrikto di Cesarea di F ilipo, El a puntra Su disipelnan, bisando: "Ta ken e hendenan ta bisa ku e Yu di Hende ta?"

¹⁴I nan a kontesta: "Algun ta bisa: Juan Boutista; otronan: Elias; i otronan: Jeremias, of un di e profetanan."

¹⁵El a bisa nan: "Ma ta ken boso ta bisa ku Ami ta?"

¹⁶I Simon Pedro a kontesta i a bisa: "Abo ta e Cristo, Yu di e Dios bibu."

¹⁷I Jesus a kontesta i a bis'e: "Bendishona bo ta, Simon, yu di Jonas, pasobra no ta karni i sanger a revela esaki na bo, sino Mi Tata ku ta den shelu.

¹⁸I tambe Mi ta bisabo ku abo ta Pedro, i riba e baranka aki lo Mi traha Mi iglesia; i e portanan di fiernu lo no triunfa riba dje.

¹⁹Lo Mi dunabo e yabinan di e reino di shelu; i tur loke bo mara riba tera lo ta mara den shelu, i tur loke bo los riba tera lo ta gelos den shelu."

²⁰E ora ei El a taha e disipelnan pa nan no bisa ningun hende ku E ta e Cristo.

²¹For di e tempu ei Jesu-Cristo a kuminsa mustra Su disipelnan ku E mester bai Jerusalem, i sufri hopi kos na man di e ansianonan i saserdotenan prinsipal i eskribanan, i wordu mata, i wordu lanta riba e di tres dia.

²²I Pedro a hal'e un banda i a kuminsa reprend'E, bisando: "Dios libra, Senor! Esaki nunka lo no sosode ku Bo."

²³Ma El a bira i a bisa Pedro: "Kita for di Mi dilanti, Satanas! Bo ta un piedra di trompeka pa Mi; pasobra bo no tin bo pensamentu riba e kosnan di Dios, sino riba esnan di hende."

²⁴E ora ei Jesus a bisa Su disipelnan: "Si un hende kier bin Mi tras, lagu'e nenga su mes, i hisa su krus, i siguiMi.

²⁵Pasobra ken ku kier salba su bida lo perd'e; ma ken ku perde su bida pa Mi kousa lo han'e.

²⁶Pasobra ki probecho un hende lo tin si e gana henter mundu, ma perde su alma? Of kiko un hende lo duna en kambio di su alma?

²⁷Pasobra e Yu di Hende lo bin den e gloria di Su Tata, huntu ku Su angelnan; anto E lo rekompensa kada hende segun su obranan.

²⁸Di berdat Mi ta bisa boso, tin algun di esnan ku ta para akinan ku lo no eksperensia morto prome ku nan mira e Yu di Hende bin den Su reino."