Read Papantla Totonac Mateo 18 Bible Online

Mateo 18 - Papantla Totonac bible

Mateo 18

¹Na e momento ei e disipelnan a bin serka Jesus i a puntra: "Ken anto ta esun di mas grandi den e reino di shelu?"

²I Jesus a yama un mucha bin serka djé i a pon'e para nan dilanti,

³i a bisa: "Di berdat Mi ta bisa boso, si boso no komberti i bira manera mucha, boso lo no drenta e reino di shelu.

⁴Esun anto ku umiya su mes manera e mucha aki ta esun di mas grandi den e reino di shelu.

⁵"I ken ku risibi un mucha asina den Mi nomber, ta Ami e ta risibl;

⁶ma ken ku hasi un di e chikitunan aki, ku ta kere den Mi, trompeka, ta miho p'e ku un piedra di mulina pisa wordu kologa na su garganta, i ku e wordu hoga den profundidat di laman.

⁷"Ai di e mundu pa motibu di tentashonnan! Pasobra ta inevitabel ku tentashonnan lo bin; ma ai di e hende ei pa medio di ken e tentashonnan ta bin!

⁸I si bo man of bo pia hasibo trompeka, kort'e kit'afo. Miho bo drenta bida mankaron of lam, ku teniendo dos man of dos pia bo wordu tira den e kandela eterno.

⁹I si bo wowo hasibo trompeka, sak'e tir'afo. Miho bo drenta bida ku un wowo so ku, teniendo dos wowo, bo wordu tira den e kandela di fiernu.

¹⁰"Mira pa boso no despresia un di e chikitunan aki, pasobra Mi ta bisa boso ku nan angelnan den shelu kontinuamente ta kontempla kara di Mi Tata ku ta den shelu.

¹¹[Pasobra e Yu di Hende a bin pa salba loke tabata perdu]

¹²"Kiko boso ta kere? Si un hende tin shen karne, i un di nan a perde, e no ta laga e nobent'i nuebenan riba e serunan i bai buska esun ku a perde?

¹³I si sosode ku e han'e, di berdat Mi ta bisa boso, e ta regosiha mas pa motibu di esun ei, ku pa motibu di e nobent'i nuebenan ku no a perde.

¹⁴Asina anto, no ta e boluntat di boso Tata ku ta den shelu pa un di e chikitunan aki perese.

¹⁵"I si bo ruman peka kontra bo, bai i mustr'e su falta entre abo kune so; si e skuchabo, bo a gana bo ruman.

¹⁶Ma si e no skuchabo, hiba un of dos mas huntu ku bo, pa asina 'tur palabra keda konfirma pa boka di dos of tres testigu.'

¹⁷I si e nenga di skucha nan, bisa iglesia esaki; i si e nenga di skucha asta na iglesia, lagu'e ta pa bo manera un pagano i un publikano.

¹⁸"Di berdat Mi ta bisa boso, tur loke boso mara riba tera lo ta mara den shelu; i tur loke boso los riba tera lo ta gelos den shelu.

¹⁹"Atrobe Mi ta bisa boso, ku si riba tera dos di boso bai di akuerdo tokante di kualkier kos ku nan pidi, esaki lo wordu hasi pa nan dor di Mi Tata ku ta den shelu.

²⁰Pasobra kaminda dos of tres ta reuni den Mi nomber, ei Mi ta meimei di nan."

²¹E ora ei Pedro a bin i a puntr'E: "Senor, kuantu bes mi ruman lo peka kontra mi, i ami mester pordon'e? Te shete bes?"

²²Jesus a kontest'e: "Mi ta bisabo, no te shete bes, sino te setenta bes shete.

²³"Pesei e reino di shelu por wordu kompara ku un rei ku kier a regla kuenta ku su esklabunan.

²⁴I ora ku el a kuminsa regla kuenta, a wordu tresi serka dje un esklabu ku tabata deb'e dies mil talento.

²⁵Ma komo ku e no tabatin moda pa paga, su senor a duna ordu pa bend'e, huntu ku su esposa, su yunan i tur loke ku e tabatin, pa paga su debe.

²⁶"Pesei e esklabu a tira su kurpa abou su dilanti ku su kara te na suela, i a bisa: 'Tene pasenshi ku mi i lo mi pagabo tur kos.'

²⁷I e senor di e esklabu ei a sinti kompashon i a lagu'e bai, i a pordon'e e debe.

²⁸"Ma e esklabu ei a sali bai i a hana un di su kompaneronan-esklabu ku tabata deb'e shen denario; i el a gar'e i a kuminsa chok'e, bisando: 'Paga loke bo debe.'

²⁹"Anto su kompanero-esklabu a tira su kurpa abou i a kuminsa rogu'e, bisando: 'Tene pasenshi ku mi i lo mi pagabo.'

³⁰"Sinembargo, e no tabata kier; ma el a bai i a tir'e den prizon, te ora ku e lo a paga e debe.

³¹Awor ora ku su kompaneronan-esklabu a mira loke a pasa, nan a keda masha tristu, i nan a bin i a konta nan senor tur loke a pasa.

³²"E ora ei su senor a manda yam'e i a bis'e: 'Abo, esklabu malbado, mi a pordonabo tur e debe ei, pasobra bo a rogami.

³³Abo tambe no mester a tene miserikordia di bo kompanero-esklabu, meskos ku ami a tene miserikordia di bo?'

³⁴I su senor, yen di rabia, a entregu'e na e burdugunan, te ora ku e lo a paga tur loke e tabata deb'e.

³⁵"Asina tambe Mi Tata selestial lo hasi ku boso, si kada un di boso no pordona su ruman di henter su kurason."