Read Papantla Totonac Mateo 19 Bible Online

Mateo 19 - Papantla Totonac bible

Mateo 19

¹I a sosode ku ora Jesus a kaba di papia e palabranan aki, El a sali bai for di Galilea i a yega na e region di Judea, na e otro banda di Jordan.

²I multitutnan grandi tabata siguié, i E tabata kura nan ayanan.

³I algun fariseo a bin serka djé pa pon'E na prueba, bisando: "Lei ta permiti pa un homber diborsia su esposa pa kualkier motibu?"

⁴I El a kontesta i a bisa: "Boso no a lesa ku Esun ku a krea hende for di prinsipio 'a traha nan homber i muhe,'

⁵i a bisa: 'Pa e motibu aki un homber lo bandona su tata i mama i lo uni ku su esposa; i nan dos lo bira un karni'?

⁶Asina anto nan no ta dos mas, sino un karni. Pesei loke Dios a uni, no laga ningun hende separa."

⁷Nan a bis'E: "Pakiko anto Moises a ordena pa dun'e un karta di diborsio i pa mand'e bai?"

⁸El a bisa nan: "Pa motibu di e duresa di boso kurason Moises a permiti boso diborsia boso esposanan; ma for di prinsipio no tabata asina.

⁹I Mi ta bisa boso, ken ku diborsia su esposa, si no ta pa motibu di inmoralidat seksual, i kasa ku otro muhe, ta komete adulterio."

¹⁰E disipelnan a bis'E: "Si ta asin'aki e relashon di un homber ta ku su esposa, anto ta miho pa no kasa."

¹¹Ma El a bisa nan: "No ta tur hende por asepta e palabra aki, ma solamente esnan na kendenan el a wordu duna.

¹²Pasobra tin eunuko ku a nase asina for di barika di nan mama; i tin eunuko ku a wordu hasi eunuko dor di hende; i tambe tin eunuko ku a hasi nan mes eunuko pa kousa di e reino di shelu. Esun ku por asepta esaki, lagu'e asept'e."

¹³E ora ei algun mucha a wordu tresi serka djé, pa E pone Su mannan riba nan i hasi orashon; i e disipelnan a reprende nan.

¹⁴Ma Jesus a bisa: "Laga e muchanan, i no stroba nan di bin serka Mi, pasobra e reino di shelu ta pertenese na esnan manera esakinan."

¹⁵I despues di a pone Su mannan riba nan, El a bai for di einan.

¹⁶I mira, a bin un hende serka djé ku a bisa: "Maestro, kiko ta e kos bon ku mi mester hasi pa mi por hana bida eterno?"

¹⁷I El a kontest'e: "Pakiko bo ta puntra Ami kiko ta bon? Tin solamente Un ku ta bon; ma si bo kier drenta bida, warda e mandamentunan."

¹⁸El a puntr'E: "Kualnan?" I Jesus a kontesta: "'No mata; no komete adulterio; no horta; no duna testimonio falsu;

¹⁹onra bo tata i bo mama,' i 'stima bo prohimo manera bo mes.'"

²⁰E hoben a bis'E: "Tur e kosnan aki mi a warda. Kiko mas mi falta?"

²¹Jesus a bis'e: "Si bo kier ta perfekto, bai i bende bo propiedatnan i duna na hende pober, i lo bo tin tesoro den shelu; i bin, siguiMi."

²²Ma ora ku e hoben a tende e palabranan aki, el a bai tur tristu, pasobra e tabata dono di hopi propiedat.

²³Anto Jesus a bisa Su disipelnan: "Di berdat Mi ta bisa boso, ta difisil pa un hende riku drenta e reino di shelu.

²⁴I atrobe Mi ta bisa boso, ta mas fasil pa un kamel pasa dor di wowo di un angua, ku pa un hende riku drenta e reino di Dios."

²⁵Ora ku e disipelnan a tende esaki, nan a keda masha asombra i a puntra: "Ta ken por wordu salba anto?"

²⁶I Jesus a keda wak nan i a bisa nan: "Serka hende esaki ta imposibel, ma serka Dios tur kos ta posibel."

²⁷E ora ei Pedro a kontesta i a bis'E: "Ata nos a bandona tur kos i a siguiBo; kiko anto nos lo hana?"

²⁸I Jesus a bisa nan: "Di berdat Mi ta bisa boso, ku den e regenerashon, ora ku e Yu di Hende lo sinta riba e trono di Su gloria, boso ku a siguiMi tambe lo sinta riba diesdos trono i huzga e diesdos tribunan di Israel.

²⁹I tur hende ku a bandona kasnan of ruman hombernan of ruman muhenan of tata of mama of yunan of kunukunan pa kousa di Mi nomber, lo risibi hopi bes mas tantu, i lo ereda bida eterno.

³⁰Ma hopi ku ta prome lo ta ultimo, i e ultimonan lo ta prome.