Read Papantla Totonac Mateo 2 Bible Online

Mateo 2 - Papantla Totonac bible

Mateo 2

¹Awor despues ku Jesus a nase na Betlehem di Judea den e dianan di rei Herodes, ata, sabionan for di oriente a yega Jerusalem, i a puntra:

²"Unda Esun ta ku a nase komo Rei di e hudiunan? Pasobra nos a mira Su strea na oriente, i a bin pa ador'E."

³I ora rei Herodes a tende esaki, el a keda masha intrankil, i henter Jerusalem huntu kune.

⁴I el a yama tur e saserdotenan prinsipal i eskribanan di e pueblo huntu, i a kuminsa informa serka nan na unda e Cristo lo mester a nase.

⁵I nan a kontest'e: "Na Betlehem di Judea, pasobra asina a wordu skirbi dor di e profeta:

⁶'I abo, Betlehem, tera di Juda, di ningun manera ta esun di mas chikitu entre e lidernan di Juda; pasobra for di bo lo sali un Gobernante, Kende lo pastoria Mi pueblo Israel.'"

⁷E ora ei Herodes a manda yama e sabionan na sekreto, i a informa pa mas sigur serka nan tokante di e tempu ku e strea a parese.

⁸I el a manda nan Betlehem, i a bisa: "Bai i buska e Mucha ku tur diligensia; i ora boso han'E, lagami sa, pa mi tambe por bin ador'E."

⁹I despues ku nan a kaba di tende rei, nan a sigui nan kaminda; i ata, e strea ku nan a mira na oriente tabata bai nan dilanti, te ora ku el a yega i a keda para riba e luga unda e Mucha tabata.

¹⁰I ora nan a mira e strea, nan a regosiha ku gran goso.

¹¹I nan a bai den e kas i a mira e Mucha huntu ku Su mama Maria; i nan a tira nan kurpa abou na suela i a ador'E. I nan a habri nan tesoronan i a ofres'E regalonan: oro, sensia i mirra.

¹²I siendo spierta dor di Dios den un sono pa no bolbe serka Herodes, nan a pasa un otro kaminda pa bai nan tera bek.

¹³I despues ku nan a sali bai, ata, un angel di Senor a parese na Jose den un sono, bisando: "Lanta i kohe e Mucha i Su mama, i hui bai Egipto, i keda ayanan te ora Mi avisabo; pasobra Herodes ta bai buska e Mucha pa mata."

¹⁴I den anochi el a lanta i a kohe e Mucha i Su mama, i a sali bai Egipto;

¹⁵i el a keda ayanan te ora ku Herodes a muri, pa loke a wordu papia dor di Senor pa medio di e profeta por a keda kumpli, ora ku el a bisa: "For di Egipto Mi a yama Mi Yu homber."

¹⁶Ma ora Herodes a mira ku el a wordu gana pa e sabionan, el a bira razu, i a laga mata tur e mucha hombernan ku tabatin na Betlehem i den henter e besindario ei, di edat di dos ana p'abou, segun e tempu ku el a averigua serka e sabionan.

¹⁷E ora ei a keda kumpli loke a wordu papia dor di profeta Jeremias:

¹⁸"Un bos a wordu tend! na Rama, yoramentu i gran lamentashon; Raquel ta yora su yunan; i e ta nenga di wordu konsola, pasobra nan no t'ei mas."

¹⁹Ma despues ku Herodes a muri, ata, un angel di Senor a parese den un sono na Jose na Egipto, bisando:

²⁰"Lanta, kohe e Mucha i Su mama, i bai tera di Israel; pasobra esnan ku tabata buska e Mucha pa mata a muri."

²¹I el a lanta, a kohe e Mucha i Su mama i a bin tera di Israel.

²²Ma ora ku el a tende ku Arkelao tabata reina na Judea na luga di su tata Herodes, el a hana miedu di bai ayanan. I siendo spierta dor di Dios den un sono, el a bai na e regionnan di Galilea,

²³i a bin biba den un stat ku yama Nazaret, pa por a keda kumpli loke a wordu papia dor di e profetanan: "E lo wordu yama un nazareno."