Read Papantla Totonac Mateo 20 Bible Online

Mateo 20 - Papantla Totonac bible

Mateo 20

¹"Pasobra e reino di shelu ta manera un dono di kunuku ku a sali mainta tempran pa kontrata trahado pa su kunuku di wendruif.

²I ora ku el a kumbini ku e trahadonan pa un denario pa dia, el a manda nan bai na su kunuku di wendruif.

³"I el a sali banda di nueb'or di mainta i a mira otronan para pornada riba plasa;

⁴i el a bisa eseinan: 'Boso tambe bai na e kunuku di wendruif i lo mi duna boso loke ta hustu.' I nan a bai.

⁵"I el a bolbe sali banda di diesdos or di merdia i tres'or di atardi, i a hasi meskos.

⁶I pa banda di sink'or di atardi el a sali i a hana otronan para pornada, i el a bisa nan: 'Pakiko boso ta para aki henter dia sin hasi nada?'

⁷"Nan a bis'e: 'Pasobra ni un hende no a kontrata nos.' "El a bisa nan: 'Boso tambe bai na e kunuku di wendruif.'

⁸"I ora ku a bira tardi, dono di e kunuku di wendruif a bisa su mayordomo: 'Yama e trahadonan i paga nan nan sueldo, kuminsando ku e ultimo grupo te na esun di prome.'

⁹"I ora esnan ku a wordu kontrata banda di sink'or di atardi a bin, kada un a risibi un denario.

¹⁰I ora esnan ku a wordu kontrata prome a bin, nan a spera ku nan lo a risibi mas; i nan tambe a risibi un denario kada un.

¹¹I ora nan a risibi esaki, nan a kuminsa murmura kontra e dono di kunuku,

¹²bisando: 'Esnan ultimo aki a traha solamente un ora, i bo a hasi nan igual ku nos ku a wanta e peso i e kalor di dia.'

¹³"Ma el a kontesta i a bisa un di nan: 'Amigu, mi no ta hasi ningun inhustisia ku bo. No ta pa un denario bo a kumbini ku mi?

¹⁴Tuma loke ta di bo i sigui bo kaminda, ma mi ta desea di duna e ultimo homber aki mes tantu ku bo.

¹⁵Mi no tin derecho di hasi loke mi ta desea ku loke ta di mi? Of bo wowo ta envidioso, pasobra mi ta generoso?'

¹⁶"Asina e ultimonan lo ta e promenan, i e promenan lo ta e ultimonan."

¹⁷I ora Jesus tabata pa bai Jerusalem, El a hala e diesdos disipelnan un banda, i na kaminda El a bisa nan:

¹⁸"Mira, nos ta bai Jerusalem; i e Yu di Hende lo wordu entrega na e saserdotenan prinsipal i eskribanan; i nan lo konden'E na morto,

¹⁹i lo entregu'E na e paganonan, pa nan hasi bofon di djé, sut'E i krusifik'E. I riba e di tres dia E lo wordu lanta."

²⁰E ora ei mama di e yu hombernan di Zebedeo a bin serka djé, huntu ku su yu hombernan, i a buig te na suela pa pidié un fabor.

²¹I El a puntr'e: "Kiko bo ta desea?" El a kontest'E: "Ordena ku den Bo reino e dos yu hombernan aki di mi por sinta, un na Bo man drechi i un na Bo man robes."

²²Ma Jesus a kontesta i a bisa: "Boso no sa kiko boso ta pidi. Boso por bebe e kopa ku Ami ta bai bebe?" Nan a kontest'E: "Nos por."

²³El a bisa nan: "Mi kopa boso lo bebe, ma pa sinta na Mi man drechi i na Mi man robes, esaki no ta keda na Mi pa duna, ma ta pa esnan pa kendenan Mi Tata a prepara esei."

²⁴I ora ku e diesnan a tende esaki, nan a tuma e dos rumannan masha na malu.

²⁵Ma Jesus a yama nan serka djé i a bisa: "Boso sa ku e gobernantenan di e paganonan tin dominio riba nan, i nan shon grandinan ta eherse outoridat riba nan.

²⁶Entre boso no t'asina, ma ken ku kier bira grandi entre boso lo ta boso sirbido,

²⁷i ken ku kier ta esun di prome entre boso lo ta boso esklabu;

²⁸meskos ku e Yu di Hende no a bin pa wordu sirbi, ma pa sirbi, i pa duna Su bida komo preis di reskate pa hopi."

²⁹I ora nan tabata sali for di Jeriko, un multitut grandi tabata siguié.

³⁰I ata, dos homber siegu ku tabata sinta kantu di kaminda, ora nan a tende ku Jesus tabata pasa, a grita, bisando: "Senor, Yu di David, tene miserikordia di nos!"

³¹I e multitut a rous nan manda nan keda ketu; ma nan a grita mas duru ainda, bisando: "Senor, Yu di David, tene miserikordia di nos!"

³²I Jesus a keda para i a yama nan i a puntra: "Kiko boso kier pa Mi hasi pa boso?"

³³Nan a kontest'E: "Senor, nos kier pa nos wowonan wordu habri."

³⁴I Jesus a tene kompashon ku nan i a mishi ku nan wowonan; i mesora nan a rekobra nan bista i a siguié.