Read Papantla Totonac Mateo 21 Bible Online

Mateo 21 - Papantla Totonac bible

Mateo 21

¹I ora nan a yega serka di Jerusalem i a yega na Betfage, na Seru di Oleifi, Jesus a manda dos disipel,

²bisando nan: "Bai den e pueblito ku ta keda enfrente di boso, i mesora boso lo hana un buriku yewa mara einan, i un yu di buriku huntu kune; los nan i trese nan pa Mi.

³I si un hende bisa boso algu, boso lo kontesta: 'Senor tin mester di nan;' i mesora e lo manda nan."

⁴Awor esaki a sosode pa por keda kumpli loke a wordu bisa dor di e profeta ku a bisa:

⁵"Bisa e yu muhe di Sion: 'Ata bo Rei ta bin serka bo, mansu i sinta riba un buriku, un yu di buriku, yu di un bestia di karga.'"

⁶I e disipelnan a bai i a hasi manera Jesus a ordena nan,

⁷i a trese e buriku yewa i e yu di buriku i a pone nan mantelnan riba nan, i El a sinta riba e mantelnan.

⁸I mayoria di e multitut tabata habri nan mantelnan riba kaminda, i otronan tabata korta rama for di e palunan i tabata pone nan riba kaminda.

⁹I e multitutnan ku tabata bai Su dilanti, i esnan ku tabata sigui, tabata grita, bisando: "Hosana na e Yu di David!" "Bendishona ta Esun ku ta bin den e nomber di SENOR!" "Hosana den e halturanan!"

¹⁰I ora ku El a drenta Jerusalem, henter e stat a keda arib'abou i tabata bisa: "Ta ken esaki ta?"

¹¹I e multitutnan tabata bisa: "Esaki ta profeta Jesus, for di Nazaret di Galilea."

¹²I Jesus a bai den tempel i a kore ku tur esnan ku tabata kumpra i bende den tempel saka nan afo, i a bolter e mesanan di e kambiadonan di plaka, i e stulnan di esnan ku tabata bende palomba.

¹³I El a bisa nan: "Ta para skirbi: 'Mi kas lo wordu yama un kas di orashon'; ma boso ta hasie un kueba di ladron."

¹⁴I e siegunan i lamnan tabata bin serka djé den tempel, i E tabata kura nan.

¹⁵Ma ora ku e saserdotenan prinsipal i eskribanan a mira e kosnan maraviyoso ku E tabata hasi, i e muchanan ku tabata grita den tempel, bisando: "Hosana na e Yu di David," nan a tuma esaki na malu.

¹⁶I nan a bis'E: "Bo ta tende kiko esakinan ta bisa?" I Jesus a bisa nan: "Si; boso no a lesa nunka: 'For di boka di mucha chikitu i di yunan na pechu Bo a prepara alabansa pa Bo mes'?"

¹⁷I El a bai laga nan i a sali for di e stat bai Betania, i a hospeda ayanan.

¹⁸Awor su manise, ora ku El a bolbe na e stat, El a hana hamber.

¹⁹I mirando un palu di figo banda di kaminda, El a bai na dje, i no a hana nada na dje sino blachi so; i El a bisa e palu: "Nunka mas lo bo no bolbe duna fruta." I mesora e palu di figo a seka.

²⁰I ora ku e disipelnan a mira esaki, nan a keda atmira i a puntra: "Ta kon e palu di figo a seka mesora asina?"

²¹I Jesus a kontesta i a bisa nan: "Di berdat Mi ta bisa boso, si boso tin fe i no ta duda, no solamente boso lo por hasi loke a wordu hasi ku e palu di figo, ma asta si boso bisa e seru aki: 'Sea kita for di einan i tira den laman,' esei lo sosode.

²²I tur loke boso pidi den orashon, ku fe, boso lo risibi."

²³I ora ku El a bin den tempel, e saserdotenan prinsipal i e ansianonan di e pueblo a bin serka djé, mientras ku E tabata sina hende, i a puntra: "Ku ki outoridat Bo ta hasi e kosnan aki, i ta ken a dunaBo e outoridat aki?"

²⁴I Jesus a kontesta i a bisa nan: "Ami tambe lo hasi boso un pregunta. Si boso kontestaMi, Ami tambe lo bisa boso ku ki outoridat Mi ta hasi e kosnan aki.

²⁵E boutismo di Juan, for di unda esei a bin, for di shelu of for di hende?" I nan a kuminsa delibera nan ku nan, bisando: "Si nos bisa: 'For di shelu,' E lo bisa nos: 'Pakiko boso no a ker'e anto?'

²⁶Ma si nos bisa: 'For di hende,' nos tin miedu di e multitut, pasobra nan tur tin Juan pa un profeta."

²⁷I nan a kontesta Jesus i a bisa: "Nos no sa." I El a bisa nan: "Ami tampoko lo no bisa boso ku ki outoridat Mi ta hasi e kosnan aki.

²⁸"Ma kiko boso ta pensa? Un homber tabatin dos yu homber, i el a bai serka esun di prome i a bis'e: 'Yu, bai traha awe den e kunuku di wendruif'

²⁹"I el a kontesta i a bisa: 'Mi no kier'; i despues el a hana duele i a bai.

³⁰"I e tata a bai serka e di dos i a bis'e e mesun kos. I esaki a kontesta i a bisa: 'Mi ta bai, senor'; ma e no a bai.

³¹"Kual di nan dos a hasi e boluntat di su tata?" Nan a bisa: "Esun di prome." Jesus a bisa nan: "Di berdat Mi ta bisa boso ku e publikanonan i e prostitutanan lo drenta e reino di Dios prome ku boso.

³²Pasobra Juan a bin serka boso den e kaminda di hustisia i boso no a ker'e; ma e publikanonan i e prostitutanan a ker'e; i boso, mirando esaki, no a repent! despues pa ker'e.

³³"Skucha un otro parabola. Tabatin un dono di kunuku ku a planta un kunuku di wendruif i a lanta un muraya ront di dje. El a koba un baki-di-pers-wendruif den dje, i a traha un toren, a hur e ku kunukeronan i a bai hasi un biahe.

³⁴I ora tempu di kosecha tabata aserkando, el a manda su esklabunan serka e kunukeronan pa risibi su frutanan.

³⁵"I e kunukeronan a kohe su esklabunan, i esun nan a bati, un otro nan a mata i e di tres nan a piedra.

³⁶El a bolbe manda un otro grupo di esklabu, mas grandi ku esun di prome; i nan a hasi e mesun kos ku nan.

³⁷I por ultimo el a manda su yu homber serka nan, bisando: 'Nan lo respeta mi yu.'

³⁸"Ma ora ku e kunukeronan a mira e yu, nan a bisa otro: 'Esaki ta e eredero; ban laga nos mat'e i tuma su erensia pa nos.'

³⁹I nan a koh'e, a tir'e pafo di e kunuku di wendruif i a mat'e.

⁴⁰"Pesei, ora dono di e kunuku di wendruif bin, kiko lo e hasi ku e kunukeronan ei?"

⁴¹Nan a bis'E: "E lo hasi e malbadonan ei muri un mal morto i lo hur e kunuku di wendruif ku otro kunukeronan, kendenan lo entregu'e su frutanan na su debido tempu."

⁴²Jesus a bisa nan: "Boso no a lesa nunka den e Skrituranan: 'E piedra ku e trahadonan a rechasa, esaki a bira e piedra-di-skina prinsipal; esaki a bin di SENOR, i e ta maraviyoso den nos bista'?

⁴³"Pesei Mi ta bisa boso, e reino di Dios lo wordu kita for di boso, i duna na un nashon ku si ta hasie produsi fruta.

⁴⁴I esun ku kai riba e piedra aki lo wordu kibra na pida-pida; ma riba esun ku e kai, esei e lo plama manera stof."

⁴⁵I ora ku e saserdotenan prinsipal i e fariseonan a tende Su parabolanan, nan a komprende ku E tabata papia di nan.

⁴⁶I ora nan tabata buska pa gar'E, nan tabatin miedu di e multitutnan, pasobra nan tabatin E pa un profeta.