Read Papantla Totonac Mateo 22 Bible Online

Mateo 22 - Papantla Totonac bible

Mateo 22

¹I Jesus a kontesta i a bolbe papia ku nan den parabola, bisando:

²"E reino di shelu por wordu kompara ku un rei ku a tene un fiesta di kasamentu pa su yu homber.

³I el a manda su esklabunan yama esnan ku a wordu invita na e fiesta di kasamentu, ma nan no kier a bin.

⁴"El a bolbe manda otro esklabunan, bisando: 'Bisa esnan ku a wordu invita: "Mira, mi a prepara mi kuminda; mi bueynan i mi bestianan gorda tur ta mata kaba i tur kos ta kla; bin na e fiesta di kasamentu."'

⁵"Ma nan no a hasi kaso i a sigui nan kaminda, un pa su kunuku, otro pa su negoshi,

⁶i e otronan a gara su esklabunan, a maltrata nan i a mata nan.

⁷Ma rei a bira furioso i a manda su ehersitonan, i a destrui e matadonan ei, i a pega nan stat na kandela.

⁸"E ora ei el a bisa su esklabunan: 'E fiesta di kasamentu ta tur prepara, ma esnan ku a wordu invita no tabata digno di esaki.

⁹Bai anto na e kamindanan grandi, i invita tur hende ku boso hana pa e fiesta di kasamentu.'

¹⁰I e esklabunan ei a sali bai den e kayanan, i nan a trese huntu tur hende ku nan por a hana, tantu malbado komo bon; i e sala di e fiesta di kasamentu a yena ku invitadonan.

¹¹"Ma ora rei a drenta pa tira un bista riba e invitadonan, el a mira un hende einan ku no tabatin pana di kasamentu bisti,

¹²i el a puntr'e: 'Amigu, ta kon bo a hasi drenta akiden sin pana di kasamentu?' I e no por a kontesta un palabra.

¹³"E ora ei rei a bisa e sirbidonan: 'Mar'e na man ku pia i tir'e den e skuridat di pafo; den e luga ei lo tin yoramentu i mordementu riba djente.'

¹⁴"Pasobra hopi ta yama, ma poko ta skohi."

¹⁵E ora ei e fariseonan a bai i a konsulta ku otro, kon nan por koh'E den trampa ku Su mes palabranan.

¹⁶I nan a manda nan disipelnan serka djé, huntu ku e herodianonan, bisando: "Maestro, nos sa ku Bo ta berdadero, i ku Bo ta sina e kaminda di Dios den berdat, i ku Bo no ta laga ningun hende influensiaBo; pasobra Bo no ta hasi distinshon di persona.

¹⁷Bisa nos anto, kiko Bo ta pensa? Lei ta permit! pa paga belasting na Cesar, si of no?"

¹⁸Ma Jesus, konosiendo nan malisia, a bisa: "Boso, hipokritnan, pakiko boso ta pone trampa pa Mi?

¹⁹MustraMi e moneda di paga belasting." I nan a trese un denario p'E.

²⁰I El a puntra nan: "Ta ken su imagen i inskripshon esaki ta?"

²¹Nan a bis'E: "Di Cesar." E ora ei El a bisa nan: "Anto duna Cesar loke ta di Cesar, i Dios loke ta di Dios."

²²I ora nan a tende esaki, nan a keda strana, i nan a bai lagu'E i a sigui nan kaminda.

²³E mesun dia ei algun saduseo ku ta bisa ku no tin resurekshon a bin serka djé i a hasié pregunta,

²⁴bisando: "Maestro, Moises a bisa: 'Si un homber muri sin laga ni un yu, su ruman homber, komo su famia mas yega, mester kasa ku su esposa i lanta desendiente pa su ruman.'

²⁵Awor tabatin shete ruman homber serka nos; i e prome a kasa i a muri, i komo ku e no tabatin desendensia, el a laga su esposa pa su ruman homber;

²⁶meskos tambe e di dos i e di tres, te na e di shete.

²⁷I despues di nan tur e muhe a muri.

²⁸Anto den resurekshon, ta esposa di kual di e shetenan e lo ta? Pasobra nan tur tabatin e komo esposa."

²⁹Ma Jesus a kontesta i a bisa nan: "Boso ta kiboka; boso no ta komprende e Skrituranan, ni e poder di Dios.

³⁰Pasobra den e resurekshon nan no ta kasa, ni ta wordu duna pa kasa, ma nan ta manera angel den shelu.

³¹Ma enkuanto resurekshon di e mortonan, boso no a lesa loke Dios a papia ku boso, bisando:

³²'Ami ta e Dios di Abraham, i e Dios di Isaak, i e Dios di Jakob'? E no ta e Dios di e mortonan, sino di e bibunan."

³³I ora ku e multitutnan a tende esaki, nan a keda asombra di Su sinansa.

³⁴Ma ora ku e fariseonan a tende ku El a tapa boka di e saduseonan, nan tur a bin huntu.

³⁵I un di nan, un eksperto di lei, a hasié un pregunta, pa pon'E na prueba, bisando:

³⁶"Maestro, ta kual ta e mandamentu di mas grandi di Lei?"

³⁷I Jesus a kontest'e: "'Stima SENOR bo Dios ku henter bo kurason, i ku henter bo alma, i ku henter bo mente.'

³⁸Esaki ta e gran mandamentu i e di prome.

³⁹I e di dos ta semehante: 'Stima bo prohimo manera bo mes.'

⁴⁰Riba e dos mandamentunan aki henter e Lei i e Profetanan ta basa."

⁴¹Awor ora ku e fariseonan a bin huntu, Jesus a hasi nan un pregunta,

⁴²bisando: "Kiko boso ta pensa di e Cristo, ken su yu E ta?" I nan a kontest'E: "Yu di David."

⁴³El a puntra nan: "Di kon anto, den Spiritu, David ta yam'E 'Senor', bisando:

⁴⁴'SENOR a bisa mi Senor: "sinta na Mi man drechi, te ora Mi pone Bo enemigunan bou di Bo pianan"'?

⁴⁵Si t'asina ku David ta yam'E 'Senor,' kon anto E por ta su yu?"

⁴⁶I ningun hende no tabata por a kontest'E ni un palabra, i for di e dia ei ningun hende no a tribi puntr'E nada mas.