Read Papantla Totonac Mateo 23 Bible Online

Mateo 23 - Papantla Totonac bible

Mateo 23

¹E ora ei Jesus a papia ku e multitutnan i ku Su disipelnan,

²bisando: "E eskribanan i e fariseonan ta sinta riba stul di Moises;

³pesei tur loke nan bisa boso, hasie i kumpli kune, ma no hasi segun nan obranan, pasobra nan ta papia, ma nan no ta hasi.

⁴I nan ta mara karganan pisa i ta pone nan riba skouder di hende, ma nan mes no ta dispuesto pa lanta ni un dede pa kita nan.

⁵"Ma nan ta hasi tur nan obranan pa hende mira, pasobra nan ta hasi nan filakterianan mas hanchu i ta hasi e kuashinan di nan pananan mas largu.

⁶I nan ta gusta e luga di onor na bankete, i e miho asientonan den snoa,

⁷i saludonan di respet riba plasa, i pa hende yama nan rabi.

⁸"Ma boso no mester wordu yama rabi, pasobra ta Un ta boso Maestro, i boso tur ta ruman.

⁹I no yama ningun hende riba tera boso tata, pasobra ta Un ta boso Tata, Esun ku ta den shelu.

¹⁰I boso no mester wordu yama maestro, pasobra ta Un ta boso Maestro, esta, Cristo.

¹¹Ma esun di mas grandi meimei di boso lo ta boso sirbido.

¹²I ken ku halsa su mes lo wordu umiya, i ken ku umiya su mes lo wordu halsa.

¹³"Ma ai di boso, eskribanan i fariseonan, hipokritnan, pasobra boso ta sera e reino di shelu pa hende; pasobra boso mes no ta drenta, ni esnan ku ta drentando, boso no ta laga drenta.

¹⁴[Ai di boso, eskribanan i fariseonan, hipokritnan, pasobra boso ta devora kas di biuda, i komo preteksto boso ta hasi orashonnan largu; pesei boso lo risibi kondenashon mas pisa.]

¹⁵"Ai di boso, eskribanan i fariseonan, hipokritnan, pasobra boso ta biaha pasa laman i tera pa boso komberti un hende so, i unabes ku el a wordu gana, boso ta hasie bira un yu di fiernu, dos bes mas pio ku boso mes.

¹⁶"Ai di boso, guiadonan siegu ku ta bisa: 'Si un hende hura pa tempel, esei no ta nifika nada; ma si un hende hura pa e oro di tempel, esei si tin di kumpli ku su promesa.'

¹⁷Boso, bobonan i hombernan siegu, kual ta mas importante, e oro of e tempel ku ta santifika e oro?

¹⁸I: 'Si un hende hura pa e altar, esei no ta nifika nada, ma si un hende hura pa e ofrenda ku ta riba dje, esei si tin di kumpli ku su promesa.'

¹⁹Boso, hombernan siegu, kual ta mas importante, e ofrenda of e altar ku ta santifika e ofrenda?

²⁰Pesei, esun ku hura, ta hura pa e altar i pa tur loke tin riba dje.

²¹I esun ku hura pa e tempel, ta hura pa e tempel i pa Esun ku ta biba den dje.

²²I esun ku hura pa shelu, ta hura pa e trono di Dios i pa Esun ku ta sinta riba dje.

²³"Ai di boso, eskribanan i fariseonan, hipokritnan! Pasobra boso ta duna un di dies parti di menta, eneldo i komino, i boso a neglisha loke ta mas importante di e Lei: hustisia, miserikordia i fieldat. Ma esakinan ta e kosnan ku boso mester a hasi sin neglisha e otronan.

²⁴Boso, guiadonan siegu, ku ta sefta saka un wimpiri, i ta traga un kamel!

²⁵"Ai di boso, eskribanan i fariseonan, hipokritnan! Pasobra boso ta limpia e parti pafo di kopa i di tayo, ma paden nan ta yen di ladronisia i pashonnan deskontrola.

²⁶Abo, fariseo siegu, limpia prome e parti paden di kopa i tayo, i e ora ei e parti pafo tambe por bira limpi.

²⁷"Ai di boso, eskribanan i fariseonan, hipokritnan! Pasobra boso ta manera tumbanan blancha ku di pafo ta mustra bunita, ma di paden nan ta yen di wesu di hende morto i di tur sorto di sushedat.

²⁸Asina boso tambe di pafo ta parse hustu na hende, ma di paden boso ta yen di hipokresia i inikidat.

²⁹"Ai di boso, eskribanan i fariseonan, hipokritnan! Pasobra boso ta traha e tumbanan di e profetanan i ta dorna e monumentonan di e hustunan,

³⁰i boso ta bisa: 'Si nos tabata biba den e dianan di nos tatanan, nos lo no tabata nan komplise den dramamentu di sanger di e profetanan.'

³¹Asina ta ku boso ta duna testimonio kontra boso mes, ku boso ta yunan di esnan ku a mata e profetanan.

³²Yena anto e midi di kulpa di boso tatanan.

³³"Boso, kolebranan, boso, generashon di vibora, kon boso lo skapa e kondenashon di fiernu?

³⁴Pesei, mira, Mi ta bai manda profetanan, sabionan i eskribanan serka boso; algun di nan boso lo mata i krusifika, i algun di nan boso lo suta den boso snoanan, i persigui di stat pa stat,

³⁵pa por bin riba boso tur e sanger hustu ku a wordu drama riba mundu, for di e sanger di Abel, e hustu, te na e sanger di Zakarias, yu homber di Barakias, kende boso a mata entre e tempel i e altar.

³⁶Di berdat Mi ta bisa boso, tur e kosnan aki lo bin riba e generashon aki.

³⁷"O Jerusalem, Jerusalem, abo ku ta mata e profetanan i ta piedra esnan ku ta wordu manda serka dje! Kuantu biaha Mi no tabata kier a hunta bo yunan, manera un galina ta hunta su puitunan bou di su halanan, i boso no tabata kier.

³⁸Mira, boso kas ta keda desola pa boso!

³⁹Pasobra Mi ta bisa boso, for di awor padilanti boso lo no miraMi mas, te dia ku boso bisa: 'Bendishona ta Esun ku ta bin den e nomber di SENOR!'"