Read Papantla Totonac Mateo 24 Bible Online

Mateo 24 - Papantla Totonac bible

Mateo 24

¹I Jesus a sali for di tempel i tabata kana bai ora Su disipelnan a bin serka djé pa mustr'E e edifisionan di tempel.

²I El a kontesta i a bisa nan: "Boso no ta mira tur e kosnan aki? Di berdat Mi ta bisa boso, akinan lo no keda ni un piedra riba otro, ku lo no wordu basha abou."

³I ora ku E tabata sinta riba Seru di Oleifi, e disipelnan a bin nan so serka djé, bisando: "Bisa nos, ki tempu e kosnan aki lo sosode, i kiko lo ta e senal di Bo binida i di e fin di tempu?"

⁴I Jesus a kontesta i a bisa nan: "Mira pa ningun hende no gana boso.

⁵Pasobra hopi lo bin den Mi nomber, bisando: 'Ta ami ta e Cristo,' i lo gana hopi hende.

⁶I boso lo tende di gueranan i rumoman di gueranan; mira pa boso no spanta, pasobra e kosnan ei mester tuma luga, ma ainda no ta e fin.

⁷Pasobra nashon lo lanta kontra nashon, i reino kontra reino. I na varios luga lo tin hamber i temblor.

⁸Ma tur e kosnan aki ta e prinsipio di dolonan di parto.

⁹"E ora ei nan lo entrega boso na tribulashon i lo mata boso, i tur nashon lo odia boso pa kousa di Mi nomber.

¹⁰I na e tempu ei hopi lo trompeka i lo entrega otro i odia otro.

¹¹I hopi profeta falsu lo lanta i lo gana hopi hende.

¹²I pasobra inikidat ta oumenta, amor di hopi hende lo fria.

¹³Ma esun ku persevera te na fin, esei lo ta salba.

¹⁴I e evangelio aki di e reino lo wordu predika den henter mundu komo un testimonio na tur nashon, i e ora ei e fin lo yega.

¹⁵"Pesei, ora boso mira e ABOMINASHON DI DESOLASHON, ku profeta Daniel a papia di dje, ta para den e luga santu (laga esun ku ta lesa, komprende),

¹⁶e ora ei laga esnan ku ta na Judea hui bai na e serunan;

¹⁷no laga esun ku ta riba dak baha pa saka e kosnan ku ta den su kas bai kune;

¹⁸i no laga esun ku ta den kunuku bai bek pa kohe su mantel.

¹⁹Ma ai di esnan ku ta na estado i esnan ku ta kria yu na pechu den e dianan ei!

²⁰Ma hasi orashon pa boso huida no sosode den wenter, ni riba un dia di Sabat;

²¹pasobra e ora ei lo tin un gran tribulashon, manera nunka tabatin for di prinsipio di mundu te awor aki, i ku lo no tin nunka mas tampoko.

²²I si e dianan ei no a wordu hasi mas kortiku, ningun bida lo no a wordu salba; ma pa kousa di e eliginan e dianan ei lo wordu hasi mas kortiku.

²³E ora ei, si un hende bisa boso: 'Mira, ata e Cristo aki,' of 'At'E aya,' no ker'e.

²⁴Pasobra Cristonan falsu i profetanan falsu lo lanta, i lo hasi senalnan i maraviyanan grandi pa gana, si ta posibel, asta e eliginan.

²⁵Mira, Mi a bisa boso di antemano.

²⁶"Pesei, si nan bisa boso: 'At'E ta den desierto,' no sali bai, of: 'At'E ta den e kambernan mas paden,' no kere nan.

²⁷Pasobra meskos ku lamper ta bin for di pariba, i ta korta te pabou, asina binida di e Yu di Hende lo ta.

²⁸Kaminda e kadaver ta, einan e aguilanan lo reuni.

²⁹"Ma mesora, despues di e tribulashon di e dianan ei, 'solo lo bira skur i luna lo no duna su klaridat i e streanan lo kai for di shelu, i e podernan di e shelunan lo wordu sakudi.'

³⁰"E ora ei e senal di e Yu di Hende lo parese na shelu, i e ora ei tur e tribunan di riba tera lo lamenta, i nan lo mira e Yu di Hende ta bin riba e nubianan di shelu ku poder i gran gloria.

³¹I E lo manda Su angelnan ku un zonidu duru di trompet i nan lo reuni Su eliginan for di e kuater bientunan, for di esun ekstremo di shelu te na e otro.

³²"Awor sina e parabola aki for di e palu di figo: ora su rama a bira moli kaba, i e saka su blachinan, boso sa ku zomer ta serka;

³³asina boso tambe, ora boso mira tur e kosnan aki, sabi ku E ta serka, dilanti di porta.

³⁴Di berdat Mi ta bisa boso ku e generashon aki lo no pasa prome ku tur e kosnan aki tuma luga.

³⁵Shelu i tera lo pasa, ma Mi palabranan lo no pasa.

³⁶"Ma di e dia i e ora ei ningun hende no sa, ni e angelnan di shelu tampoko, ni e Yu, sino e Tata so.

³⁷Pasobra e binida di e Yu di Hende lo ta meskos ku e dianan di Noe.

³⁸Pasobra meskos ku den e dianan ei ku tabata prome ku e diluvio, nan tabata kome i bebe, nan tabata kasa i duna pa kasa, te dia ku Noe a bai den e arka,

³⁹i nan no a komprende te ora ku e diluvio a bin i a bai ku nan tur, asina e binida di e Yu di Hende lo ta.

⁴⁰E ora ei lo tin dos homber den kunuku; un lo wordu tuma i e otro lo wordu laga atras.

⁴¹Dos muhe lo ta mula na mulina; un lo wordu tuma i e otro lo wordu laga atras.

⁴²"Sea alerta anto, pasobra boso no sa ki dia boso Senor ta bin.

⁴³Ma sea sigur di esaki, ku si e kabes di kas tabata sa den ki ora di anochi e ladron tabata di bin, e lo a keda alerta i lo no a permiti pa kibra drenta su kas.

⁴⁴Pa e motibu aki boso tambe sea prepara, pasobra e Yu di Hende lo bin na un ora ku boso no ta pensa.

⁴⁵"Ken anto ta e esklabu fiel i prudente ku su shon a laga enkarga ku su kas pa duna nan nan kuminda na su debido tempu?

⁴⁶Bendishona ta e esklabu ei, ku su shon ta hana ta hasi asina ora ku e bin.

⁴⁷Di berdat Mi ta bisa boso ku e lo lagu'e keda na enkargo di tur su propiedatnan.

⁴⁸Ma si e esklabu malbado ei bisa den su kurason: 'Mi shon lo no bin p'awor,'

⁴⁹i e kuminsa bati su kompaneronan-esklabu i kome i bebe huntu ku burachenan,

⁵⁰e shon di e esklabu ei lo bin riba un dia ku e no ta sper'e i na un ora ku e no sa,

⁵¹i lo kort'e na pida-pida i lo dun'e un luga huntu ku e hipokritnan; ayanan lo tin yoramentu i mordementu riba djente.