Read Papantla Totonac Mateo 25 Bible Online

Mateo 25 - Papantla Totonac bible

Mateo 25

¹"E ora ei e reino di shelu lo ta di kompara ku dies birgen ku a kohe nan lampi i a sali bai pa kontra ku e bruidehom.

²I sinku di nan tabata bobo i sinku tabata sabi.

³Pasobra e bobonan a hiba nan lampi, ma nan no a hiba zeta,

⁴ma e sabinan a hiba zeta den nan flasko, huntu ku nan lampi.

⁵Awor mientras ku e bruidehom tabata tarda pa bin, nan tur a kuminsa kabisha i a pega sono.

⁶"Ma mei anochi por a tende un gritu: 'At'e bruidehom! Sali bai kontr'e.'

⁷"E ora ei tur e birgennan ei a lanta i a prepara nan lampi.

⁸I e bobonan a bisa e sabinan: 'Duna nos poko di boso zeta, pasobra nos lampinan ta bai paga.'

⁹"Ma e sabinan a kontesta, bisando: 'No, no ta bai tin sufisiente pa nos i pa boso tambe; miho boso bai serka e bendedonan i kumpra pa boso mes.'

¹⁰"I mientras ku nan a bai pa kumpra, e bruidehom a yega, i esnan ku tabata prepara a drenta bai huntu kune na e fiesta di kasamentu; i e porta a wordu sera.

¹¹"I mas despues e otro birgennan tambe a bin, bisando: 'Senor, senor habri pa nos.'

¹²"Ma el a kontesta i a bisa: 'Di berdat mi ta bisa boso, mi no konose boso.'

¹³"Sea alerta anto, pasobra boso no sa e dia ni e ora ku e Yu di Hende ta bin.

¹⁴"Pasobra e reino di shelu ta manera un homber ku ta bai hasi un biahe pa un tera leu, i kende a yama su esklabunan i a entrega nan su propiedat.

¹⁵I na esun el a duna sinku talento, na e otro dos, i na e otro un, kada un segun su kapasidat; i despues el a bai hasi un biahe.

¹⁶Mesora esun ku a risibi e sinku talentonan a bai i a negosha ku nan, i a gana sinku talento mas.

¹⁷Di e mesun manera esun ku a risibi e dos talentonan a gana dos mas.

¹⁸Ma esun ku a risibi un talento a bai, a koba un buraku den tera, i a skonde e plaka di su shon.

¹⁹"Awor despues di hopi tempu e shon di e esklabunan ei a bolbe i a regla kuenta ku nan.

²⁰I esun ku a risibi e sinku talentonan a bin i a trese sinku talento mas, bisando: 'Senor, sinku talento bo a konfiami kune; mira, mi a gana sinku talento mas.'

²¹"Su shon a bis'e: 'Hopi bon, mi bon i fiel esklabu; bo tabata fiel den poko kos, lo mi enkargabo ku hopi kos; drenta, tuma parti den e goso di bo shon.'

²²"I tambe esun ku a risibi e dos talentonan a bin i a bisa: 'Senor, dos talento bo a konfiami kune; mira, mi a gana dos talento mas.'

²³"Su shon a bis'e: 'Hopi bon, mi bon i fiel esklabu; bo tabata fiel den poko kos, lo mi enkargabo ku hopi kos; drenta, tuma parti den e goso di bo shon.'

²⁴"I tambe esun ku a risibi un talento a bin i a bisa: 'Senor, mi tabata sa ku bo ta un hende severo, ku ta kosecha kaminda bo no a sembra, i ku ta rekohe kaminda bo no a stroi simia.

²⁵I mi tabatin miedu, i mi a bai i a skonde bo talento bou di tera. Ata loke ta di bo aki.'

²⁶"Ma su shon a kontesta i a bis'e: 'Abo, esklabu malbado i floho, bo tabata sa ku mi ta kosecha kaminda mi no a sembra, i ku mi ta rekohe kaminda mi no a stroi simia.

²⁷Pesei bo mester a pone mi plaka na banko, pa ora mi bin, mi risibi loke ta di mi ku interes.

²⁸'Pesei, kita e talento for di dje, i dun'e na esun ku tin e dies talentonan.'

²⁹Pasobra na kada un ku tin, lo wordu duna mas, i e lo tin na abundansia; ma for di esun ku no tin, asta loke e tin lo wordu kita for di dje.

³⁰I tira e esklabu ku no ta sirbi pa nada den e skuridat di pafo. Den e luga ei lo tin yoramentu i mordementu riba djente.

³¹"Ma ora ku e Yu di Hende bin den Su gloria, i tur e angelnan santu huntu kuné, E lo sinta riba e trono di Su gloria.

³²I tur e nashonnan lo wordu tresi huntu Su dilanti; i E lo separa nan un for di otro, manera wardado ta separa karne for di kabritu;

³³i E lo pone e karnenan na Su man drechi i e kabritunan na Su man robes.

³⁴"Anto e Rei lo bisa esnan na Su man drechi: 'Bin, boso ku ta bendishona di Mi Tata, ereda e reino ku ta prepara pa boso desde e fundashon di mundu.

³⁵Pasobra Mi tabatin hamber, i boso a dunaMi di kome; Mi tabatin set, i boso a dunaMi di bebe; Mi tabata un stranhero, i boso a dunaMi posada;

³⁶Mi tabata sunu, i boso a bistiMi; Mi tabata malu, i boso a bishitaMi; Mi tabata den prizon, i boso a bin serka Mi.'

³⁷"E ora ei e hustunan lo kontest'E, bisando: 'Senor, ki dia nos a miraBo ku hamber i nos a dunaBo di kome, of ku set i nos a dunaBo di bebe?

³⁸I ki dia nos a miraBo komo stranhero i nos a dunaBo posada, of sunu i nos a bistiBo?

³⁹Of ki dia nos a miraBo malu of den prizon i a bin serka Bo?'

⁴⁰"I e Rei lo kontesta i bisa nan: 'Di berdat Mi ta bisa boso, tur loke boso a hasi pa un di esnan di mas chikitu di e rumannan aki di Mi, ta pa Mi boso a hasie.'

⁴¹"E ora ei E lo bisa tambe na esnan ku ta na Su man robes: 'Aparta boso for di Mi, boso maldishonanan, bai den e kandela eterno ku a wordu prepara pa diabel i su angelnan;

⁴²pasobra Mi tabatin hamber, i boso no a dunaMi di kome; Mi tabatin set, i boso no a dunaMi di bebe;

⁴³Mi tabata un stranhero, i boso no a dunaMi posada; sunu, i boso no a bistiMi; malu i den prizon, i boso no a bishitaMi.'

⁴⁴"E ora ei nan tambe lo kontesta, bisando: 'Senor, ki dia nos a miraBo ku hamber, of ku set, of komo stranhero, of sunu, of malu, of den prizon, i nos no a sirbiBo?'

⁴⁵"E ora ei E lo kontesta nan, bisando: 'Di berdat Mi ta bisa boso, tur loke boso a keda sin hasi pa un di esnan di mas chikitu aki, ta pa Mi boso a keda sin hasie.'

⁴⁶"I esakinan lo bai den kastigu eterno, ma e hustunan den bida eterno."