Read Papantla Totonac Mateo 26 Bible Online

Mateo 26 - Papantla Totonac bible

Mateo 26

¹I a sosode ku ora Jesus a kaba di papia tur e palabranan aki, El a bisa Su disipelnan:

²"Boso sa ku aki dos dia ta e Fiesta di Pasku, i e Yu di Hende lo wordu entrega pa wordu krusifika."

³E ora ei e saserdotenan prinsipal i e ansianonan di e pueblo a reuni den palasio di e sumosaserdote ku yama Kaifas;

⁴i huntu nan a traha komplot pa na skondi gara Jesus i mat'E.

⁵Ma nan tabata bisa: "No durante di e Fiesta, pa no bin un lantamentu den e pueblo."

⁶Awor ora Jesus tabata na Betania, na kas di Simon e leproso,

⁷a bin un muhe serka djé ku un butishi di alabaster ku perfume di gran balor aden, i el a bash'e riba Su kabes mientras ku E tabata sinta na mesa.

⁸Ma ora ku e disipelnan a mira esaki, nan a keda indigna i a bisa: "Pakiko e drispidimentu aki?

⁹Pasobra e perfume aki por a wordu bendi na preis haltu i e plaka duna na hende pober."

¹⁰Ma Jesus a ripara esaki i a bisa nan: "Pakiko boso ta molestia e muhe? Pasobra el a hasi un bon obra na Mi.

¹¹Pasobra e pobernan boso tin semper serka boso, ma Ami boso no tin semper.

¹²Pasobra ora ku el a basha e perfume aki riba Mi kurpa, el a hasie pa preparaMi pa deramentu.

¹³Di berdat Mi ta bisa boso, unda ku e evangelio aki wordu predika den henter mundu, loke ku e muhe aki a hasi tambe lo wordu konta na su rekuerdo."

¹⁴E ora ei un di e diesdosnan ku yama Judas Iskariot a bai serka e saserdotenan prinsipal,

¹⁵i a puntra: "Kiko boso kier dunami si mi entregu'E na boso?" I nan a dun'e trinta pida plata.

¹⁶I for di e ora ei e tabata buska un bon oportunidat pa entregu'E.

¹⁷Awor riba e prome dia di e Fiesta di Pan Sin Zurdeg e disipelnan a bin serka Jesus, bisando: "Unda Bo kier pa nos prepara pa Bo pa kome e Pasku?"

¹⁸I El a bisa: "Bai den stat serka tal i tal hende, i bis'e: 'E Maestro ta bisa: "Mi tempu ta serka; Mi ta bai tene e Pasku na bo kas huntu ku Mi disipelnan.

¹⁹I e disipelnan a hasi manera Jesus a manda nan, i nan a prepara e Pasku.

²⁰Awor ora ku a bira nochi, E tabata sinta na mesa ku e diesdos disipelnan.

²¹I ora nan tabata kome, El a bisa: "Di berdat Mi ta bisa boso ku un di boso lo traishonaMi."

²²I masha tristu mes kada un di nan a kuminsa puntr'E: "No ta ami tog, Senor?"

²³I El a kontesta i a bisa: "Esun ku a hinka su man huntu ku Mi den e komchi ta esun ku lo traishonaMi.

²⁴E Yu di Hende mester bai, manera ta para skirbi di djé, ma ai di e homber ei dor di ken e Yu di Hende ta wordu traishona! Lo tabata bon pa e homber ei si e no a nase nunka."

²⁵I Judas, kende a traishon'E, a kontesta i a bisa: "No ta ami tog, Rabi?" El a bis'e: "Bo mes a bisa esei."

²⁶I mientras ku nan tabata kome, Jesus a kohe pan, i despues di a bendishon'e, El a kibr'e i a duna Su disipelnan i a bisa: "Tuma, kome; esaki ta Mi kurpa."

²⁷I despues ku El a kohe un kopa i a duna gradisimentu, El a duna nan esei, bisando: "Boso tur bebe for di dje;

²⁸pasobra esaki ta Mi sanger di e aliansa, ku ta wordu drama pa hopi pa pordon di pika.

²⁹Ma Mi ta bisa boso, for di awor aki lo Mi no bebe mas di e fruta aki di e mata di wendruif te na e dia ku Mi beb'e di nobo ku boso den e reino di Mi Tata."

³⁰I despues di a kanta un himno, nan a sali bai Seru di Oleifi.

³¹E ora ei Jesus a bisa nan: "Awenochi boso tur lo trompeka pa Mi motibu, pasobra ta para skirbi: 'Lo Mi dal e Wardado mata, i e karnenan di e tou lo wordu plama.'

³²Ma despues ku Mi a wordu lanta, lo Mi bai Galilea boso dilanti."

³³Pedro a kontesta i a bis'E: "Maske tur trompeka pa Bo motibu, ami nunka lo no trompeka."

³⁴Jesus a bis'e: "Di berdat Mi ta bisabo ku awenochi mes, prome ku un gai kanta, lo bo nengaMi tres biaha."

³⁵Pedro a bis'E: "Asta si mi tin ku muri huntu ku Bo, lo mi no nengaBo." I tur e disipelnan a bisa meskos.

³⁶E ora ei Jesus a yega ku nan na un luga ku yama Getsemane, i a bisa Su disipelnan: "Sinta akinan mientras ku Ami ta bai ayanan pa hasi orashon."

³⁷I El a hiba Pedro i e dos yu hombernan di Zebedeo huntu kuné, i a kuminsa bira tristu i masha angustia.

³⁸E ora ei El a bisa nan: "Mi alma ta masha tristu mes, te na morto; keda akinan i vigila huntu ku Mi."

³⁹I El a bai un poko mas leu for di nan i a tira Su kurpa abou ku Su kara te na suela, i a hasi orashon, bisando: "Mi Tata, si ta posibel, laga e kopa aki pasa bai for di Mi; sinembargo, no manera Ami kier, ma manera Abo kier."

⁴⁰I El a bin serka e disipelnan i a hana nan ta drumi, i a bisa Pedro: "Boso no por a keda vigila ni un ora huntu ku Mi?

⁴¹Keda vigila i hasi orashon, pa boso no kai den tentashon; e spiritu ta boluntario, ma e karni ta debil."

⁴²El a bolbe bai pa di dos biaha i a hasi orashon, bisando: "Mi Tata, si e kopa aki no por pasa for di Mi sin ku Mi beb'e, ku Bo boluntat sosode."

⁴³I El a bolbe bin i a hana nan ta drumi, pasobra nan wowo tabata pisa.

⁴⁴I El a bolbe kita laga nan i a bai hasi orashon pa di tres biaha, bisando e mesun palabranan atrobe.

⁴⁵E ora ei El a bin serka e disipelnan i a bisa nan: "Ainda boso ta drumi i ta sosega? Mira, e ora ta serka i e Yu di Hende lo wordu entrega den man di pekado.

⁴⁶Lanta, laga nos ban; mira, esun ku ta traishonaMi ta serka di yega!"

⁴⁷I mientras ku E tabata papia ainda, ata, Judas, un di e diesdosnan, a bin, i huntu kune un multitut grandi ku spada i klop, manda dor di e saserdotenan prinsipal i e ansianonan di e pueblo.

⁴⁸Awor esun ku tabata traishon'E a duna nan un senal, bisando: "Esun ku mi duna un sunchi, Esei t'E; gar'E."

⁴⁹I mesora el a bai serka Jesus i a bisa: "Saludo, Rabi!" i el a dun'E un sunchi.

⁵⁰I Jesus a bis'e: "Amigu, hasi loke bo a bin pa hasi." E ora ei nan a bin i a tira man riba Jesus i a gar'E.

⁵¹I mira, un di esnan ku tabata huntu ku Jesus a ekstende su man i a saka su spada, a dal e esklabu di e sumosaserdote, i a kap su orea kit'afo.

⁵²E ora ei Jesus a bis'e: "Pone bo spada bek na su luga; pasobra tur esnan ku saka spada lo perese pa medio di spada.

⁵³Of bo ta kere ku Mi no por pidi Mi Tata, i mesora E lo pone mas ku diesdos legion di angel na Mi disposishon?

⁵⁴Kon anto e Skrituranan por wordu kumpli, ku ta bisa ku t'asina mester sosode?"

⁵⁵Na e momento ei Jesus a bisa e multitutnan: "Boso a sali bin ku spada i klop pa arestaMi komo si fuera ta ladron Mi ta? Mi tabata sinta tur dia den tempel ta sina e hendenan, i boso no a garaMi.

⁵⁶Ma tur esaki a tuma luga pa e Skrituranan di e profetanan por keda kumpli." E ora ei tur e disipelnan a bandon'E i a hui bai.

⁵⁷I esnan ku a gara Jesus a hib'E serka sumosaserdote Kaifas, kaminda e eskribanan i e ansianonan a reuni.

⁵⁸Ma Pedro tambe tabata siguié na un distansia, te na e plenchi di e sumosaserdote; i el a drenta paden i a kai sinta serka e ofisialnan pa mira kon ta bai para.

⁵⁹Awor e saserdotenan prinsipal i henter e Konsilio tabata purba hana testimonio falsu kontra Jesus, pa nan por a laga mat'E;

⁶⁰ma nan no por a hana nada, maske ku hopi testigu falsu a presenta. Ma despues dos a presenta,

⁶¹i a bisa: "E homber aki a bisa: 'Ami por destrui e tempel di Dios i lant'e bek den tres dia.'"

⁶²E ora ei e sumosaserdote a lanta para i a puntr'E: "Bo no ta kontesta nada? Ta kiko e hombernan aki ta testifika kontra Bo?"

⁶³Ma Jesus a keda ketu. I e sumosaserdote a bis'E: "Mi ta ordenaBo bou di huramentu pa den nomber di e Dios bibu Bo bisa nos si ta Abo ta e Cristo, e Yu di Dios."

⁶⁴Jesus a bis'e: "Bo mes a bisa esei; sinembargo, Mi ta bisa boso, for di awor boso lo mira e Yu di Hende sinta na man drechi di e Todopoderoso, i biniendo riba e nubianan di shelu."

⁶⁵E ora ei e sumosaserdote a sker su pananan, bisando: "El a blasfema! Pakiko nos tin mester di mas testigu? Mira, awor boso a tende e blasfemia!

⁶⁶Kiko boso ta pensa?" Nan a kontesta i a bisa: "E merese morto!"

⁶⁷E ora ei nan a skupi den Su kara i a dal E ku moketa; i otronan a boft'E,

⁶⁸i a bisa: "Abo Cristo, profetisa na nos; ta ken ta esun ku a dal Bo?"

⁶⁹Awor Pedro tabata sinta pafo riba plenchi, i un sirbido muhe a yega serka dje i a bisa: "Abo tambe tabata huntu ku Jesus e galileo."

⁷⁰Ma el a nenga esaki dilanti di nan tur, bisando: "Mi no sa di kiko bo ta papia."

⁷¹I ora ku el a sali bai na entrada di e porta, un otro sirbido muhe a mir'e i a bisa esnan ku tabata einan: "E homber aki tabata huntu ku Jesus di Nazaret."

⁷²I el a bolbe nenga esaki ku un huramentu, bisando: "Mi no konose e homber."

⁷³I un ratu despues esnan ku tabata para aserka a bin i a bisa Pedro: "Siguramente abo tambe ta un di nan, pasobra bo manera di papia ta redabo."

⁷⁴E ora ei el a kuminsa maldishona i hura, bisando: "Mi no konose e homber!" I mesora un gai a kanta.

⁷⁵I Pedro a korda e palabra ku Jesus a bisa: "Prome ku un gai kanta, lo bo nengaMi tres biaha." I el a sali bai pafo i a yora amargamente.