Read Papantla Totonac Mateo 27 Bible Online

Mateo 27 - Papantla Totonac bible

Mateo 27

¹Ora dia a habri, tur e saserdotenan prinsipal i e ansianonan di e pueblo a konsulta ku otro kontra Jesus pa laga mat'E.

²I nan a mar'E, a bai kuné i a entregu'E na gobernado Ponsio Pilato.

³Anto ora Judas, esun ku a traishon'E, a mira ku El a wordu kondena, su konsenshi a remord'e i el a debolbe e trinta pidanan di plata na e saserdotenan prinsipal i e ansianonan,

⁴bisando: "Mi a peka dor di traishona sanger inosente." Ma nan a bisa: "Kiko nos tin kunes? Esei ta bo asunto!"

⁵I el a tira e pidanan di plata den e santuario i a sali bai; i el a bai i a horka su kurpa.

⁶I e saserdotenan prinsipal a kohe e pidanan di plata i a bisa: "Lei no ta permit! pa pone nan den e kaha di ofrenda, pasobra esaki ta e preis di sanger."

⁷I nan a konsulta ku otro i ku e plaka nan a kumpra e pida tereno di e alfarero komo luga pa dera stranhero.

⁸Pa e motibu aki e pida tereno ei ta wordu yama Kampo di Sanger te dia djawe.

⁹Anto a keda kumpli loke a wordu papia dor di profeta Jeremias, bisando: "I nan a kohe e trinta pidanan di plata, e preis di Esun, Kende Su preis a wordu balora pa e yunan di Israel;

¹⁰i nan a duna esakinan pa e pida tereno di e alfarero, manera SENOR a ordenami."

¹¹Awor Jesus tabata para dilanti di e gobernado, i e gobernado a puntr'E, bisando: "Ta Abo ta e Rei di e hudiunan?" I Jesus a bis'e: "Ta manera bo ta bisa."

¹²I ora ku e saserdotenan prinsipal i e ansianonan tabata akus'E, E no tabata kontesta nada.

¹³E ora ei Pilato a puntr'E: "Bo no ta tende kuantu kos nan ta testifika kontra Bo?"

¹⁴I E no tabata kontest'e riba ningun akusashon, asina ku e gobernado a keda masha strana.

¹⁵Awor riba dia di e Fiesta e gobernado tabatin e kustumber di duna un prezo libertat, esun ku e multitut skohe.

¹⁶I na e tempu ei nan tabatin un prezo di mal fama ku yama Barabas.

¹⁷Pesei ora nan a bin huntu, Pilato a bisa nan: "Ken boso kier pa mi duna libertat pa boso? Barabas of Jesus, Kende ta wordu yama Cristo?"

¹⁸Pasobra e tabata sa ku nan a entregu'E pa motibu di envidia.

¹⁹I mientras ku e tabata sinta na tribunal, su esposa a manda bis'e: "No mete ku e Homber hustu ei, pasobra ayera nochi mi a sufri hopi den un sono pa Su motibu."

²⁰Ma e saserdotenan prinsipal i e ansianonan a persuadi e multitutnan pa nan pidi pa Barabas, i pa laga mata Jesus.

²¹Ma e gobernado a kontesta i a bisa nan: "Kual di e dosnan boso kier pa mi duna libertat pa boso?" I nan a bisa: "Barabas."

²²Pilato a puntra nan: "Kiko anto lo mi hasi ku Jesus, Kende ta wordu yama Cristo?" Nan tur a bisa: "Lagu'E wordu krusifika!"

²³I el a bisa: "Pakiko? Ta ki malu El a hasi?" Ma nan a sigui grita mas duru ainda, bisando: "Lagu'E wordu krusifika!"

²⁴I ora Pilato a mira ku e no tabata logra nada, ma ku mas bien un desordu a kuminsa, el a kohe awa i a laba su man dilanti di e multitut, bisando: "Mi ta inosente di e sanger di e Homber hustu aki; esei ta boso asunto."

²⁵I henter e pueblo a kontesta i a bisa: "Laga Su sanger bin riba nos i riba nos yunan!"

²⁶E ora ei, pa motibu di nan, el a duna Barabas libertat; ma Jesus el a laga suta i a entregu'E pa wordu krusifika.

²⁷Anto e soldanan di gobernado a hiba Jesus den e Pretorio, i a reuni henter e batayon romano ront di djé.

²⁸I nan a ranka Su pana for di Su kurpa, i a bistié un mantel kolo skarlata.

²⁹I despues di a flegt un korona di sumpina, nan a pone esei riba Su kabes, i un richi den Su man drechi; i nan a hinka rudia Su dilanti i a hasi bofon di djé, bisando: "Saludo, Rei di e hudiunan!"

³⁰I nan a skupi riba djé i a kohe e richi i a kuminsa dal E riba Su kabes.

³¹I despues ku nan a hasi bofon di djé, nan a kita e mantel for di Su kurpa, a bistié Su mes pananan i a bai kuné pa krusifik'E.

³²I mientras ku nan tabata sali, nan a kontra ku un homber di Sirene ku yama Simon; i nan a obligu'e pa karga e krus di Jesus.

³³I ora nan a yega na un luga ku yama Golgota, ku ta nifika Luga di Kalpachi,

³⁴nan a dun'E bina meskla ku hal pa bebe, ma ora ku El a purb'e, E no kier a beb'e.

³⁵I despues ku nan a krusifik'E, nan a parti Su pananan entre nan dor di tira lot;

³⁶i sinta abou nan tabata tene warda einan serka djé.

³⁷I nan a pone riba Su kabes e akusashon kontra djé ku ta bisa: "ESAKI TA JESUS, E REI DI E HUDIUNAN."

³⁸E mesun tempu ei dos ladron a wordu krusifika huntu kuné, un na man drechi i un na man robes.

³⁹I esnan ku tabata pasa, tabata blasfem'E i sakudi kabes,

⁴⁰bisando: "Abo ku ta bai destrui e tempel i lant'e bek den tres dia, salba Bo mes! Si Bo ta e Yu di Dios, baha for di e krus ei."

⁴¹I di e mesun manera e saserdotenan prinsipal tambe, huntu ku e eskribanan i e ansianonan, tabata hasi bofon di djé, i bisa:

⁴²"El a salba otronan; E no por salba Su mes. E ta Rei di Israel; lagu'E baha for di e krus awor, i nos lo kere den djé.

⁴³E ta konfia den Dios; laga Dios libr'E awor, si E tin goso den djé; pasobra El a bisa: 'Ami ta e Yu di Dios.'"

⁴⁴I tambe e ladronnan ku a wordu krusifika huntu kuné tabata tira e mesun insulto na Su kara.

⁴⁵I for di diesdos or di merdia te tres or di atardi skuridat a baha riba henter e tera.

⁴⁶I banda di tres or di atardi Jesus a sklama na bos haltu, bisando: "|iéli, Eli, Lama Sabaktani?" ku ta nifika: "Mi Dios, Mi Dios, pakiko Bo a bandonaMi?"

⁴⁷I algun di esnan ku tabata para einan, ora nan a tende esaki, a bisa: "Ta Elias e homber aki ta yama!"

⁴⁸I mesora un di nan a kore kohe un spons; el a pap'e ku binager, hink'e na un richi, i a dun'E di bebe.

⁴⁹Ma e otronan a bisa: "Laga nos wak si Elias lo bin pa salb'E."

⁵⁰I Jesus a grita atrobe na bos haltu, i a entrega Su spiritu.

⁵¹I mira, e kortina di e tempel a sker na dos for di ariba te abou, i tera a tembla, i barankanan a spleit,

⁵²i tumbanan a habri; i hopi kurpa di e santunan ku a muri a wordu lanta;

⁵³i despues di Su resurekshon nan a sali for di e tumbanan, a bai den e stat santu i a parese na hopi hende.

⁵⁴I e senturion i esnan ku huntu kune tabata tene warda riba Jesus, ora nan a mira e temblor i e kosnan ku tabata sosode, a spanta masha i a bisa: "Di berdat esaki tabata e Yu di Dios!"

⁵⁵I einan tabatin hopi hende muhe ku tabata para wak for di un distansia, esnan ku a sigui Jesus for di Galilea pa sirbié,

⁵⁶entre nan Maria Magdalena, huntu ku Maria, mama di Santiago i di Jose, i e mama di e yu hombernan di Zebedeo.

⁵⁷I ora ku a bira tardi, a bin un homber riku for di Arimatea ku yama Jose, kende tambe a bira un disipel di Jesus.

⁵⁸E homber aki a bai serka Pilato i a pidi e kurpa di Jesus. Anto Pilato a duna ordu pa entregu'e e kurpa.

⁵⁹I Jose a tuma e kurpa i a lor'e den un pida tela di lino limpi,

⁶⁰i a pon'e den su tumba nobo ku el a koba den un baranka; i el a lora un piedra grandi pone na entrada di e tumba, i a bai.

⁶¹I Maria Magdalena i e otro Maria tabata einan, sinta dilanti di e tumba.

⁶²Su siguiente dia, kual tabata e dia despues di e preparashon, e saserdotenan prinsipal i e fariseonan a bin huntu serka Pilato,

⁶³i a bisa: "Senor, nos ta korda ku tempu ku E tabata na bida ainda, e ganado ei a bisa: 'Despues di tres dia lo Mi lanta.'

⁶⁴Pesei, duna ordu pa laga sigura e tumba te na e di tres dia, pa Su disipelnan no bin hort'E i bisa e pueblo: 'El a lanta for di e mortonan,' i e ultimo engano lo ta pio ku esun prome."

⁶⁵Pilato a bisa nan: "Ata un warda di solda pa boso; bai sigura e tumba mas miho ku boso por."

⁶⁶I nan a bai i a sigura e tumba, a seya e piedra i a pone e warda di solda.