Read Papantla Totonac Mateo 28 Bible Online

Mateo 28 - Papantla Totonac bible

Mateo 28

¹Awor, despues di Sabat, ora dia a kuminsa habri riba e prome dia di siman, Maria Magdalena i e otro Maria a bin wak e tumba.

²I mira, tabatin un temblor pisa, pasobra un angel di Senor a baha for di shelu, a yega serka, a lora e piedra hal'e un banda i a kai sinta riba dje.

³I su aparensia tabata manera lamper, i su pananan blanku manera sneu;

⁴i e wardadonan tabata tembla di miedu p'e, i nan a bira meskos ku hende morto.

⁵I e angel a kontesta i a bisa e muhenan: "No tene miedu, pasobra mi sa ku boso ta buska Jesus, Kende a wordu krusifika.

⁶E no t'aki, pasobra El a lanta, manera El a bisa. Bin mira e luga kaminda E tabata drumi.

⁷I hasi lihe bai bisa Su disipelnan ku El a lanta for di e mortonan; i mira, E ta bai Galilea boso dilanti, i ayanan boso lo mir'E. Mira, mi a bisa boso."

⁸I pura nan a bai for di e tumba, ku temor i gran goso, i a kore hiba e notisia pa Su disipelnan.

⁹I mira, Jesus a bin kontra ku nan i a saluda nan. I nan a bai serka djé, i a koh'E tene na Su pianan i a ador'E.

¹⁰E ora ei Jesus a bisa nan: "No tene miedu; bai i bisa Mi rumannan pa nan bai Galilea, i aya nan lo miraMi."

¹¹Ora nan tabata na kaminda, mira, algun di e soldanan di warda a bai den stat i a raporta na e saserdotenan prinsipal tur loke a sosode.

¹²I ora nan a reuni ku e ansianonan i a tene rat huntu, nan a duna e soldanan un suma grandi di plaka,

¹³i a bisa: "Boso mester bisa: 'Su disipelnan a bin den anochi i a hort'E bai kuné mientras ku nos tabata na sono.'

¹⁴I si esaki mester yega na orea di gobernado, nos lo konvens'e i tene boso for di problema."

¹⁵I nan a tuma e plaka i a hasi manera nan a wordu instrui. I te dia djawe e storia aki ta wordu plama meimei di e hudiunan.

¹⁶Ma e diesun disipelnan a sali bai Galilea, na e seru ku Jesus a indika nan pa bai.

¹⁷I ora nan a mir'E, nan a ador'E; ma algun tabata duda.

¹⁸I Jesus a hala serka i a papia ku nan, bisando: "Tur outoridat a wordu duna na Mi den shelu i riba tera.

¹⁹Pesei, bai i hasi tur e nashonnan disipel di Mi, i batisa nan den nomber di e Tata i di e Yu i di e Spiritu Santu,

²⁰i sina nan pa kumpli ku tur loke Mi a ordena boso; i mira, Mi ta ku boso semper, te na fin di mundu." Amen.