Read Papantla Totonac Mateo 3 Bible Online

Mateo 3 - Papantla Totonac bible

Mateo 3

¹I den e dianan ei Juan Boutista a bin, i e tabata predika den e desierto di Judea, bisando:

²"Repenti, pasobra e reino di shelu ta serka."

³Pasobra esaki ta esun ku profeta Isaias a papia di dje, bisando: "E bos di un ku ta sklama den desierto: 'Prepara e kaminda di SENOR, hasi Su berehanan stret!'"

⁴Awor e mesun Juan aki tabata bisti ku un pana traha di lana di kamel, i tabatin un faha di kueru na su sintura; i su kuminda tabata tirakochi i miel di mondi.

⁵Anto Jerusalem i henter Judea, i henter e distrikto ront di Jordan, tabata sali bai serka dje;

⁶i nan tabata wordu batisa dor di dje den Riu Jordan, mientras ku nan tabata konfesa nan pikanan.

⁷Ma ora ku el a mira hopi di e fariseonan i e saduseonan ta bin pa wordu batisa, el a bisa nan: "Boso, generashon di vibora, ta ken a atverti boso pa hui for di e furia ku ta bin?

⁸Pesei, duna fruta ku ta kuadra ku repentimentu,

⁹i no kere ku boso por bisa den boso mes: 'Nos tin Abraham komo nos tata', pasobra mi ta bisa boso ku Dios por lanta yunan pa Abraham for di e piedranan aki.

¹⁰I ya kaba e hacha ta poni na rais di e palunan. Pesei tur palu ku no ta duna bon fruta ta wordu gekap i tira den kandela.

¹¹"Pa loke t'ami, ami ta batisa boso ku awa pa repentimentu, ma Esun ku ta bin despues di mi ta mas poderoso ku mi, i ami no ta digno pa kita Su sandalia; E lo batisa boso ku Spiritu Santu i kandela.

¹²I Su forki-pa-bienta ta den Su man, i E lo hasi Su plenchi-di-bati-mainshi limpi-limpi; i E lo rekohe Su trigo pone den mangasina, ma E lo kima e bagas ku kandela ku no ta paga nunka."

¹³E ora ei Jesus a yega for di Galilea na Jordan serka Juan, pa E wordu batisa dor di dje.

¹⁴Ma Juan kier a trata di strob'E, bisando: "Ta ami mester wordu batisa dor di Bo, anto Abo ta bin serka mi?"

¹⁵Ma Jesus a kontesta i a bis'e: "Permiti esaki awor, pasobra di e manera aki ta toka nos di kumpli ku tur hustisia." E ora ei el a permitié.

¹⁶I despues di a wordu batisa, Jesus a sali mesora for di awa; i ata, e shelunan a wordu habri i el a mira e Spiritu di Dios baha manera un palomba i keda riba djé.

¹⁷I ata, un bos for di e shelunan, bisando: "Esaki ta Mi Yu stima, den Kende Mi tin goso."