Read Papantla Totonac Mateo 4 Bible Online

Mateo 4 - Papantla Totonac bible

Mateo 4

¹E ora ei Jesus a wordu hiba den desierto dor di e Spiritu pa wordu tenta dor di diabel.

²I despues ku El a yuna kuarenta dia i kuarenta nochi, El a hana hamber.

³I e tentado a bin i a bis'E: "Si Bo ta e Yu di Dios, ordena e piedranan aki pa nan bira pan."

⁴Ma El a kontesta i a bisa: "Ta para skirbi: 'Hende lo no biba di pan so, ma di tur palabra ku ta sali for di boka di Dios.'"

⁵E ora ei diabel a hib'E na e stat santu; i el a pon'E para riba e pinakulo di tempel,

⁶i a bis'E: "Si bo ta e Yu di Dios, tira Bo kurpa abou; pasobra ta para skirbi: 'E lo duna Su angelnan enkargo tokante di Bo, i den nan mannan nan lo kargaBo, pa Bo no dal Bo pia na piedra.'"

⁷Jesus a kontest'e: "Tambe ta para skirbi: 'No tenta SENOR bo Dios.'"

⁸Atrobe diabel a hib'E riba un seru masha haltu mes, i a mustr'E tur e reinonan di mundu i nan gloria;

⁹i el a bis'E: "Tur e kosnan aki lo mi dunaBo, si Bo tira Bo kurpa abou i adorami."

¹⁰E ora ei Jesus a kontest'e: "Bai for di akinan, Satanas! Pasobra ta para skirbi: 'Adora SENOR bo Dios, i sirbi E so.'"

¹¹E ora ei diabel a lagu'E; i mira, angelnan a bin i a sirbié.

¹²Awor ora Jesus a tende ku Juan a wordu kohl prezo, El a bolbe pa Galilea;

¹³i saliendo for di Nazaret, El a bin biba na Kapernaum, ku ta keda kantu di laman, den e region di Zabulon i Neftali.

¹⁴Esaki a sosode pa keda kumpli loke a wordu papia dor di profeta Isaias:

¹⁵"Tera di Zabulon i tera di Neftali, na kaminda di laman, na e otro banda di Jordan, Galilea di e paganonan;

¹⁶e pueblo ku tabata sinta den skuridat a mira un gran lus, i esnan ku tabata sinta den e tera di sombra di morto, riba nan un lus a resplandese."

¹⁷For di e tempu ei Jesus a kuminsa predika i bisa: "Repenti, pasobra e reino di shelu ta serka."

¹⁸I ora Jesus tabata kana kantu di laman di Galilea, El a mira dos ruman homber: Simon, kende tabata wordu yama Pedro, i su ruman Andres, ta tira reda den laman; pasobra nan tabata piskado.

¹⁹I El a bisa nan: " SiguiMi, i lo Mi hasi boso piskado di hende."

²⁰I mesora nan a laga e redanan para i a siguié.

²¹I djei El a sigui i a mira dos otro ruman homber: Santiago, yu homber di Zebedeo, i su ruman homber Juan, den boto huntu ku nan tata Zebedeo, ta drecha nan redanan; i El a yama nan.

²²I mesora nan a laga e boto i nan tata i a siguié.

²³I Jesus tabata pasa den henter Galilea, i tabata sina den nan snoanan, i proklama e evangelio di reino i kura tur sorto di enfermedat i tur sorto di malesa den e pueblo.

²⁴I Su fama a plama den henter Siria; i nan tabata trese serka djé tur hende ku tabata afligi ku tur sorto di malesa i dolo, hende posei pa demono, epileptikonan i paralitikonan; i E tabata kura nan.

²⁵I multitutnan grandi tabata siguié for di Galilea, Dekapolis, Jerusalem, Judea i for di e otro banda di Jordan.